വൈപ്പിന്: എളങ്കുന്നപ്പുഴയില് വൈപ്പിന് ആര്ട്സ് ആന്റ് സയന്സ് കോളേജിന്റെ ഉദ്ഘാടനം ആഗസ്റ്റ് ആദ്യവാരം നടക്കും. മുഖ്യമന്ത്രി പിണറായി വിജയനായിരിക്കും ഉദ്ഘാടകന്. തീയതി പിന്നീട് തീരുമാനിക്കും.
എളങ്കുന്നപ്പുഴ സര്ക്കാര് ന്യൂ എല്.പി. സ്കൂളിന്റെ കെട്ടിടവും സ്ഥലവുമാണ് കോളേജിന്റെ പ്രാരംഭപ്രവര്ത്തനങ്ങള്ക്കായി ഉപയോഗിക്കുക. എല്.പി സ്കൂളിന്റെ പ്രവര്ത്തനം സര്ക്കാര് അനുമതിയോടെ ഹൈസ്കൂള് കോമ്പൗണ്ടിലെ കെട്ടിടത്തിലേക്ക് മാറ്റും. എംഎല്എ ഫണ്ട് വിനിയോഗിച്ച് കോളേജിനും എല്പി സ്കൂളിനും പുതിയ കെട്ടിടം നിര്മ്മിച്ചു നല്കുമെന്ന് സ്വാഗതസംഘം രൂപീകരണ യോഗത്തില് എസ്. ശര്മ്മ എംഎല്എ അറിയിച്ചു.
എസ്.ശര്മ എംഎല്എ ചെയര്മാനും ജില്ലാ കലക്ടര് മുഹമ്മദ് വൈ. സഫീറുള്ള രക്ഷാധികാരിയുമായ സംഘാടകസമിതിക്ക് രൂപം നല്കി. കോളേജ് വിദ്യാഭ്യാസ വകുപ്പ് റീജിയണല് ഡെപ്യൂട്ടി ഡയറക്ടര് റാം മോഹന്, വൈപ്പിന് കോളേജ് സ്പെഷ്യല് ഓഫീസര് ഡോ.കെ.ജയകുമാര്, ഗ്രാമപഞ്ചായത്ത് പ്രസിഡന്റ് വി.കെ.കൃഷ്ണന് എന്നിവരാണ് ജനറല് കണ്വീനര്മാര്. യോഗത്തില് പഞ്ചായത്ത് പ്രസിഡന്റ് വി.കെ.കൃഷ്ണന് അദ്ധ്യക്ഷത വഹിച്ചു.
