നാഗര്കോവില്: മഴയെയും വെയിലിനെയും കൂസാതെ 23 സംസ്ഥാനങ്ങളിലായി 23,100 കിലോമീറ്റര് ദൂരം സഞ്ചരിച്ച മുന് അഖില ഭാരതീയ സേവാ പ്രമുഖ് സീതാറാംജിയുടെ ഭാരതപരിക്രമയാത്രയ്ക്ക് ഇന്നു സമാപനം. 2350 വില്ലേജുകളിലെ ഗ്രാമീണ ജനങ്ങളുമായി നേരിട്ട് സംവദിച്ച ഒരു ചരിത്രയാത്രയ്ക്ക് രാവിലെ 8.30ന് കന്യാകുമാരിയിലാണ് സമാപനം. സീതാറാം കെഡില്ലിയ 2012 ആഗസ്റ്റ് 9ന് ജന്മാഷ്ടമി ദിവസം തുടങ്ങിയ സ്ഥലത്തു തന്നെ യാത്ര സമാപിക്കുമ്പോള് അതൊരു ചരിത്ര സംഭവമാകുകയാണ്.
ഭാരതത്തെ അറിയുക, ഭാരതീയനായി ജീവിക്കുക, ഭാരതത്തെ വിശ്വഗുരുവായി സ്വീകരിക്കുക എന്നീ തത്വങ്ങള് വിളംബരം ചെയ്തുകൊണ്ടാണ് അഞ്ചു വര്ഷങ്ങളിലായി 1797 ദിവസം അദ്ദേഹം ഗ്രാമഗ്രാമാന്തരങ്ങളില് കാല്നടയായി സഞ്ചരിച്ച് ഭാരതത്തിന്റെ ആത്മാവിനെ തൊട്ടറിയാന് ശ്രമിച്ചത്.
യാത്രയുടെ സമാപനം കുറിച്ചുകൊണ്ട് സീതാറാംജി ഇന്ന് രാവിലെ 4ന് വിവേകാനന്ദ കേന്ദ്രത്തില് നിന്നു യാത്ര തുടങ്ങും. 4.30ന് കന്യാകുമാരി ഭഗവതിയമ്മന് ക്ഷേത്രത്തെ പ്രദക്ഷിണം നടത്തി നിര്മ്മാല്യദര്ശനം നടത്തും. തുടര്ന്ന് ത്രിവേണി സംഗമത്തിലേക്ക് യാത്ര തുടങ്ങും. അവിടെ നടത്തുന്ന പ്രത്യേക പൂജയ്ക്കും ഹോമത്തിനും ശേഷം യാത്രയിലുടനീളം സൂക്ഷിച്ചിരുന്ന ധ്വജം കടലില് നിമജ്ജനം ചെയ്ത് യാത്ര അവസാനിപ്പിക്കും.
ആര്എസ്എസ് സര് സംഘചാലക് ഡോ. മോഹന് ഭാഗവത് ചടങ്ങില് പങ്കെടുക്കും. വൈകുന്നേരം 4ന് നാഗരാജക്ഷേത്ര മൈതാനത്ത് നടക്കുന്ന സത്സംഗത്തില് ഡോ. മോഹന് ഭഗവത്, വെള്ളിമല ആശ്രമം മഠാധിപതി സ്വാമി ചൈതന്യാനന്ദജി, ആര്എസ്എസ് അഖിലേന്ത്യാ ജോയിന്റ്സെക്രട്ടറി ദത്താേത്രയ ഹൊസബളേ, കേന്ദ്രമന്ത്രി പൊന് രാധാകൃഷ്ണന്, സിനിമാ സംവിധായകന് വിശു, കവി പിറയ്ചൂടന്, സ്ഥാണുമാലയന് തുടങ്ങിയവര് പങ്കെടുക്കും.
