മയ്യഴി: മാഹിയിലെ ഏക ഫ്രഞ്ച് ഗവ.ഹൈസ്കൂളായ എക്കോള് സെന്ത്റാള് എകൂര് കോംപഌമാന്തേറില് ഇദം പ്രഥമമായി പാഠപുസ്തക വിതരണം നടത്തി.
കഴിഞ്ഞ ഒരു വ്യാഴ വട്ടത്തിലധികമായി ഏതാനും പാഠ ഭാഗങ്ങളുടെ പകര്പ്പു കോപ്പി ഉപയോഗിച്ചു കൊണ്ടുളള ഒരു പഠന പ്രവര്ത്തനമാണു ഇവിടെ നടന്നിരുന്നത്. കഴിഞ്ഞ അധ്യയന വര്ഷാവസാനം പൂര്ണ്ണ രൂപത്തിലുളള പാഠ പുസ്തകം ലഭ്യമാക്കണമെന്ന ആവശ്യമുന്നയിച്ചു അധ്യാപക രക്ഷാകര്തൃസമിതി നടത്തിയ പ്രവര്ത്തനങ്ങളുടെ അടിസ്ഥാനത്തില് മാഹി എംഎല്എ ഡോ.വി.രാമചന്ദ്രന് മാസ്റ്റര് നല്കിയ നിര്ദ്ദേശം കണക്കിലെടുത്ത് മാഹി വിദ്യാഭ്യാസ വകുപ്പു മേലധ്യക്ഷന് എസ്.സൂര്യ നാരായണനാണു ഫ്രഞ്ച് പാഠ പുസ്തകങ്ങള് വിദ്യാലയത്തിലെത്തിച്ചത്.
വിദ്യാലയത്തില് നടന്ന ലളിതമായ ചടങ്ങില് സ്കൂള് ലീഡര് ഫാത്തിമ വാജിതക്ക് ഫ്രഞ്ചു പാഠപുസ്തകം കൈമാറിക്കൊണ്ട് ചരിത്രപരമായ പാഠപുസ്തക വിതരണത്തിന്റെ ഒന്നാം ഘട്ടം ഡോ.വി.രാമചന്ദ്രന് ഉദ്ഘാടനം ചെയ്തു.
ഫ്രാന്സിസ് മെന്ഡോസ അധ്യക്ഷത വഹിച്ചു. വിദ്യാഭ്യാസ വകുപ്പ് മേലധ്യക്ഷന് എസ്.സൂര്യനാരായണന് മുഖ്യപ്രഭാഷണം നടത്തി.
