കൊച്ചി: ഓളപ്പരപ്പിലെ ഇന്ത്യയുടെ സുവര്ണതാരം ഒളിമ്പ്യന് സജന് പ്രകാശിന് അവഗണന. രാജ്യാന്തര നീന്തല് ചാംപ്യന്ഷിപ്പുകളില് രാജ്യത്തിന്റെ അഭിമാനം വാനോളമുയര്ത്തി മെഡലുകള് നീന്തിയെടുക്കുന്ന താരത്തെ രാജ്യത്തെയും കേരളത്തിലെയും സര്ക്കാരുകളും കായിക സംഘടനകളും കണ്ടില്ലെന്ന് നടിക്കുകയാണ്.
വായ്പ എടുത്തും കടം വാങ്ങിയുമാണ് കഴിഞ്ഞ അഞ്ച് വര്ഷമായി സജന് പ്രകാശിനെ മുന് ദേശീയ കായികതരം കൂടിയായ അമ്മ ഷാന്റി മോള് രാജ്യാന്തര ചാമ്പ്യന്ഷിപ്പുകളില് പങ്കെടുപ്പിക്കുന്നത്. അഞ്ച് വര്ഷത്തിനിടെ ചിലവഴിച്ചത് 90 ലക്ഷത്തിലേറെ രൂപയാണ്. ഒളിമ്പിക്സിന് പോകാനും ദേശീയ ഗെയിംസില് കേരളത്തിനായി സ്വര്ണ മെഡലുകള് വാരിക്കൂട്ടിയതിനും സംസ്ഥാന സര്ക്കാര് നല്കിയ ഏതാനും ലക്ഷങ്ങള് മാത്രമാണ് ആകെ ലഭിച്ച സഹായം. മലേഷ്യന് ഓപ്പണ് നീന്തല് ചാംപ്യന്ഷിപ്പിലും സിങ്കപ്പൂര് നാഷ്ണല് നീന്തല് ചാംപ്യന്ഷിപ്പിലും സജന് മെഡലുകള് നീന്തിയെടുത്തിരുന്നു. മലേഷ്യന് ഓപ്പണില് ഒരു സ്വര്ണവും രണ്ട് വെള്ളിയും നേടിയപ്പോള് സിങ്കപ്പൂരില് രണ്ട് വെള്ളി മെഡലുകള് നീന്തിയെടുത്തു.
ഹങ്കറിയില് ഈ മാസം നടക്കുന്ന ലോക നീന്തല് ചാമ്പ്യന്ഷിപ്പിന് യോഗ്യത നേടിയ സജന് തീവ്രപരിശീലനത്തിലാണ്. തായ്ലന്ഡിലാണ് പരിശീലനം നടത്തുന്നത്. ഇതിന് മാസം ഒരു ലക്ഷം രൂപ വേണം. പണമില്ലാത്തതിനാല് വിദേശ പരിശീലനം മുടങ്ങിയ അവസ്ഥയിലാണ്.
ഹങ്കറിയിലേക്ക് പോകാനുള്ള ചിലവുകളെല്ലാം സ്വയം വഹിക്കേണ്ട ഗതികേടിലാണ്. വിമാന ടിക്കറ്റ്, താമസ സൗകര്യം, ഭക്ഷണം, വിസ ഫീ ഉള്പ്പടെ എല്ലാ ചിലവുകള്ക്കുമായി ലക്ഷങ്ങളാണ് മുടക്കേണ്ടി വരുന്നത്.
റെയില്വേ ജീവനക്കാരനായിരുന്ന സജന് ദേശീയ ഗെയിംസിലെ പ്രകടനം മാനിച്ച് സംസ്ഥാന പൊലിസില് സര്ക്കിള് ഇന്സ്പെക്ടറായി നിയമനം നല്കിയിരുന്നു. കഴിഞ്ഞ ജനുവരിയില് ജോലിയില് പ്രവേശിച്ച സജന് പരിശീലനത്തിനും രാജ്യാന്തര ചാംപ്യന്ഷിപ്പുകളിലും പങ്കെടുക്കാനായി ശമ്പളമില്ലാത്ത അവധിയിലാണ്. സര്വ്വീസ് ബുക്കില് വിരലടയാളം പതിച്ചിട്ടില്ലെന്ന പേരുപറഞ്ഞാണ് ശമ്പളം നല്കാത്തത്. തായ്ലന്ഡില് നിന്ന് തിരിച്ചുവന്ന് ബുക്കില് വിരലടയാളം പതിച്ച് തിരിച്ചുപോകുന്നതിന് ഏകദേശം ഒരുലക്ഷം രൂപയോളം ചെലവു വരും. ഇത് സജന് തന്നെ വഹിക്കണം. മാത്രമല്ല അഞ്ച് ദിവസത്തെ പരിശീലനവും മുടങ്ങും. ഇത് ലോക ചാമ്പ്യന്ഷിപ്പിലെ പ്രകടനത്തെ ബാധിക്കുകയും ചെയ്യും.
30 വര്ഷമായി നെയ്വേലി ലിഗ്നറ്റ് കോര്പ്പറേഷനില് ഉദ്യോഗസ്ഥയായ അമ്മ ഷാന്റി മോളുടെ സമ്പാദ്യമെല്ലാം സജനെ ലോക ചാമ്പ്യന്ഷിപ്പുകളില് പങ്കെടുപ്പിക്കാനും പരിശീലനത്തിനുമായി ചിലവഴിച്ചു കഴിഞ്ഞു. സ്വന്തമായി വീടോ ഭൂമിയോ ഇല്ലാത്ത സജന്റെയും ഷാന്റി മോളുടെയും സമ്പാദ്യം ബാങ്ക് വായ്പയുടെ കടവും കുറെ മെഡലുകളുമാണ്. പുതിയ കായിക താരങ്ങളെ സൃഷ്ടിക്കാന് ഖേലോ ഇന്ത്യ പദ്ധതിയും ഓപറേഷ്യന് ഒളിംപ്യയും പ്രഖ്യാപിച്ച് വര്ഷം തോറും കോടികള് ചിലവഴിക്കുന്ന നാട്ടിലാണ് സജന് പ്രകാശ് ലോക ചാമ്പ്യന്ഷിപ്പില് പങ്കെടുക്കാന് പണം കണ്ടെത്താനാവാതെ പ്രതിസന്ധിയില് കഴിയുന്നത്. ജൂലൈ 14 മുതല് 30 വരെയാണ് ലോക ചാമ്പ്യന്ഷിപ്പ്.
