29തിരുവന്തപുരം: സജീവിന് കായിക മത്സരങ്ങളുടെ നിയമങ്ങളറിയില്ല. സ്പോര്ട്സ് ഷൂവോ ജേഴ്സിയോ കണ്ടിട്ടുപോലുമില്ല. ഷൂ ഇല്ലാതെ 5000 മത്സരിക്കാനെത്തിയതിന്റെ പേരില് സജീവിനെ സംഘാടകര് ട്രാക്കില് നിന്ന് മാറ്റിനിര്ത്തുകയും ചെയ്തു.
ആദ്യ ദിനത്തിലെ മത്സരത്തില് കടംവാങ്ങിയ ഷൂ ധരിച്ച് 10,000 മീറ്ററിന് ഇറങ്ങി. ആദ്യമായാണ് ഷൂ ഇട്ട് ട്രാക്കിലിറങ്ങിയത്. വര്ഷങ്ങളായി മികച്ച പരിശീലനം നേടുന്ന ഏഴുപേരെ പിന്നിലാക്കി സജീവ് എട്ടാമത് ഫിനിഷ് ചെയ്തു. എന്നാല് ഇന്നലെ രാവിലെ 5000 മീ. മത്സരത്തിനിറങ്ങാന് സജീവിന് ഷൂ കിട്ടിയല്ല. ഷൂ ഇല്ലാത്തതിനാല് സജീവിനെ സംഘാടകര് ട്രാക്കിന് പുറത്താക്കുകയും ചെയ്തു. തിരുവനന്തപുരം വാമനപുരം കരിംകുറ്റിക്കര രാമന്കുഴി തോട്ടരികത്ത് വീട്ടില് സജീവ് എന്ന 25 കാരന് തന്റെ ജീവിത പ്രാരാബ്ധങ്ങള്ക്ക് പരിഹാരമായാണ് ദീര്ഘദൂര ഓട്ടം പരിശീലിച്ചത്.
കൂലിപ്പണിക്കാരായ അച്ഛന് സത്യനും അമ്മ സുമംഗലയ്ക്കും ഒരു കൈ സഹായം നല്കാന് ആര്മിയില് ഒരു ജോലി നേടുക എന്നതായിരുന്നു ലക്ഷ്യം. അതിനായി 18 വയസ്സു മുതല് സുഹൃത്തിനൊപ്പം ഗ്രാമ വീഥികളില് ഓടി പരിശീലിച്ചു. ആദ്യ റിക്രൂട്ട്മെന്റ് റാലിയില് തന്നെ സജീവ് 1500 മീറ്ററില് ഒന്നാമതെത്തിയെങ്കിലും ആരോഗ്യപ്രശ്നങ്ങള് കാരണം അയോഗ്യനാക്കി. തന്റെ അവസാനത്തെ അവസരമായ 23 വയസ്സുവരെ സജീവ് റിക്രൂട്ട്മെന്റില് മത്സരിച്ച് ഓട്ടത്തില് ഒന്നാമതെത്തി. അപ്പോഴെല്ലാം കൂടെ ഓടുന്നവര് വിലകൂടിയ ഷൂസ് ധരിക്കുമ്പോള് വെറും കാലില് ഓടിയാണ് സജീവ് ഒന്നാമതെത്തിയത്. തുടര്ന്നാണ് കഴിഞ്ഞ വര്ഷത്തെ കേരളോത്സവത്തില് മത്സരിക്കുന്നതും ഒന്നാമതെത്തുന്നതും.
സജീവിലെ കായിക താരത്തെ തിരിച്ചറിഞ്ഞത് സമീപത്തെ സ്കൂളിലെ കായികാധ്യാപകന് വിജയകുമാറാണ്. അദ്ദേഹത്തിന്റെ നിര്ദ്ദേശ പ്രകാരം ആറുമാസം മുമ്പ് കല്ലമ്പലം കുടവൂര് എകെഎച്ച്എസിലെ കായിക അധ്യാപകന് അന്സറിനെ സമീപിച്ചു. അന്സര് സജീവിനും പരിശീലനം നല്കി തുടങ്ങി. പണിയില്ലാത്ത സമയത്താണ് പരിശീലനം. ജില്ലയില് മത്സരമില്ലാത്തതിനാല് നേരിട്ടാണ് സജീവിനെ സംസ്ഥാന മത്സരത്തിലേക്ക് തെരെഞ്ഞെടുത്തത്.
ഇടിഞ്ഞു വീഴാറായ രണ്ടുമുറി വീട്ടില് സഹോദരിക്കും മാതാപിതാക്കള്ക്കും അമ്മൂമ്മയ്ക്കുമൊപ്പം അരപ്പട്ടിണിയില് കഴിയുന്ന സജീവിന് സ്പോര്ട്സ് ഷൂ സ്വപ്നം കാണാന് മാത്രമേ കഴിയൂ എന്ന് മനസ്സിലാക്കാന് സംഘാടകര്ക്കായില്ല. മഴയത്ത് ജാവലിന് ത്രോ മത്സരം വരെ നടത്തിയവര് സജീവിനെ നിയമത്തിന്റെ പേരില് മാറ്റി നിര്ത്തി. മികച്ച പരിശീലനത്തിലൂടെ ഭാരതത്തിനൊരു മെഡല് നേടി ഒരു ജോലി സ്വന്തമാക്കണമെന്ന ആഗ്രഹത്തിന് എന്നെങ്കിലും ചിറകുമുളയ്ക്കുമെന്ന പ്രതീക്ഷയിലാണ് സജീവ്.
