തിരുവനന്തപുരം: കോഴിക്കോട് കാശ്യപ വേദ റിസര്ച്ച് ഫൗണ്ടേഷന്റെ ഗീത പഠിക്കൂ വേദത്തിലേക്ക് മടങ്ങൂ എന്ന സന്ദേശവുമായി വിളംബര രഥയാത്ര ഫെബ്രുവരി 20 ന് ആരംഭിക്കുമെന്ന് സംഘാടകര് വാര്ത്താസമ്മേളനത്തില് അറിയിച്ചു. 20 ന് രാവിലെ 6.30ന് പാറശ്ശാല ശ്രീകൃഷ്ണസ്വാമി ക്ഷേത്രസന്നിധിയില് നിന്നാരംഭിക്കുന്ന രഥയാത്ര സി.കെ. ഹരീന്ദ്രന് എംഎല്എ ഉദ്ഘാടനം ചെയ്യും.
ഗാന്ധിയന് പി. ഗോപിനാഥന്നായര് അധ്യക്ഷത വഹിക്കും. വിവിധ ക്ഷേത്രങ്ങള്, ആശ്രമങ്ങള് എന്നിവിടങ്ങളിലെ സ്വീകരണം ഏറ്റുവാങ്ങി 20, 21 തീയതികളില് രഥം തിരുവനന്തപുരം ജില്ലയില് പര്യടനം നടത്തും. മാര്ച്ച് 31 ന് കൊല്ലൂരാണ് വിളംബര യാത്ര സമാപിക്കുക.
വേദവിദ്യ പഠന ഗവേഷണകേന്ദ്രമായ മഹാശയ് ധരംപാല് എംഡിഎച്ച് വേദ റിസര്ച്ച് ഫൗണ്ടേഷന്റെ ഉദ്ഘാടനവും ആചാര്യശ്രീ രാജേഷ് രചിച്ച ഭഗവദ് ഗീതയുടെ വൈദിക വ്യാഖ്യാനമായ യഥാര്ഥ ഭഗവദ് ഗീത എന്ന ഗ്രന്ഥത്തിന്റെ പ്രകാശനവും ഏപ്രില് 1, 2, 3 തീയതികളില് കോഴിക്കോട് നടക്കും.
ഫൗണ്ടേഷന്റെ ഉദ്ഘാടനത്തിന്റെയും യഥാര്ഥ ഭഗവദ്ഗീതയുടെ പ്രകാശനത്തിന്റെയും ഗീതാ ജ്ഞാനയജ്ഞത്തിന്റെയും പ്രചാരണാര്ഥമാണ് വിളംബര രഥയാത്ര നടത്തുന്നതെന്നും അവര് പറഞ്ഞു. മനു കമല്, ബി. ഉണ്ണികൃഷ്ണന്, ജി. രാധാമണി എന്നിവര് വാര്ത്താസമ്മേളനത്തില് പങ്കെടുത്തു.
