മൂന്നാം ക്ലാസ് വിദ്യാര്ത്ഥിനിയെ ലൈംഗീകമായി പീഡിപ്പിച്ച പ്രതിയെ അറസ്റ്റ് ചെയ്യാത്തതില് പ്രതിഷേധിച്ച് നാട്ടുകാര് വല്ലാര്പാടത്ത് റോഡ് ഉപരോധിച്ചപ്പോള്
കൊച്ചി: വല്ലാര്പാടം സെന്റ് ആന്റണീസ് സ്കൂളിലെ മൂന്നാംക്ലാസ് വിദ്യാര്ത്ഥിനിയെ പീഡിപ്പിച്ച സിപിഎം നേതാവിന്റെ അറസ്റ്റ് വൈകുന്നതില് പ്രതിഷേധിച്ച നാട്ടുകാരെ പോലീസ് തല്ലിച്ചതച്ചു. ലാത്തിച്ചാര്ജില് സ്ത്രീകളടക്കം നിരവധി പേര്ക്ക് പരിക്ക്. ഗുരുതരമായി പരിക്കേറ്റ അഞ്ചു പേരെ എറണാകുളത്തെ സ്വകാര്യ ആശുപത്രിയില് പ്രവേശിപ്പിച്ചു.
കേസെടുത്ത് 18 ദിവസം കഴിഞ്ഞിട്ടും സിപിഎം പ്രാദേശിക നേതാവ് പി.എന്. ഷഗിയെ പോലീസ് അറസ്റ്റ് ചെയ്യാത്തതില് പ്രതിഷേധിച്ച് നാട്ടുകാര് വൈപ്പിന്-എറണാകുളം ഗോശ്രീ റോഡ് ഉപരോധിച്ചു. വല്ലാര്പാടം മുളവുകാട് ജംക്ഷനില് രാവിലെ എട്ടു മണിയോടെയാണ് ഉപരോധം തുടങ്ങിയത്. ആംബുലന്സ് ഉള്പ്പെടെയുള്ള അത്യാവശ്യ വാഹനങ്ങള് കടത്തിവിട്ടു. ഇതിനിടെ സെന്ട്രല് സിഐ അനന്തലാലിന്റെ നേതൃത്വത്തിലെത്തിയ പോലീസ് ഉപരോധക്കാരെ നേരിട്ടു. എതിര്ത്ത നാട്ടുകാരെ പോലീസ് തല്ലിച്ചതച്ചു.
പീഡനക്കേസ് ഒതുക്കിത്തീര്ക്കാന് ശ്രമിച്ച പോലീസ്, നാട്ടുകാരുടെ പ്രതിഷേധത്തെത്തുടര്ന്നാണ് സിപിഎം നേതാവിനെതിരെ കേസെടുത്തത്. പോലീസിന്റെ ഉദാസീന നിലപാടാണ് നേതാവിന് ഒളിവില് പോകാന് അവസരമൊരുക്കിയതെന്ന് നാട്ടുകാരുടെ പരാതി. ഇയാളെ ഉടന് അറസ്റ്റ് ചെയ്യാമെന്ന കമ്മീഷണറുടെ ഉറപ്പിനെത്തുടര്ന്നാണ് ഇന്നലെ നാട്ടുകാര് പ്രതിഷേധം അവസാനിപ്പിച്ചത്. പ്രകോപനമില്ലാതെ നാട്ടുകാരെ തല്ലിച്ചതച്ച സിഐ അനന്തലാലിനെതിരെ നടപടിയെടുക്കണമെന്നാവശ്യപ്പെട്ട് ആക്ഷന് കൗണ്സില് സിറ്റി പോലീസ് കമ്മീഷണര്ക്ക് പരാതി നല്കി.
