കൊച്ചി: നടിയെ ആക്രമിച്ച കേസില് സിനിമാ മേഖലയില് ഉള്ളവരെയും ചോദ്യം ചെയ്യാന് അന്വേഷണ സംഘം തീരുമാനിച്ചു. പള്സര് സുനിയുടെ മൊബൈല് ഫോണ് വിളികളുടെ പരിശോധനയുടെ അടിസ്ഥാനത്തിലാണിത്.
സുനിയുടെ കഴിഞ്ഞ മൂന്ന് മാസത്തെ ഫോണ് വിളികളാണ് പോലീസ് ശേഖരിച്ചത്. ഇതില് സംഭവം നടന്ന ദിവസവും അതിന് തൊട്ടുമുമ്പുള്ള ദിവസങ്ങളിലെ വിളിയും സംശയാസ്പദമാണെന്നാണ് അന്വേഷണ സംഘം പറയുന്നത്. ഈ സാഹചര്യത്തിലാണ് സിനിമാ മേഖലയിലേക്ക് ഉള്ളവരെയും ചോദ്യം ചെയ്യാന് അന്വേഷണ സംഘം തീരുമാനിച്ചത്. സുനി പതിവായി ഉപയോഗിക്കുന്ന മോബൈല് നമ്പറും വ്യാജ തിരിച്ചറിയല് കാര്ഡ് ഉപയോഗിച്ച് കരസ്ഥമാക്കിയ സിം കാര്ഡ് നമ്പറുകളും പോലീസ് പരിശോധിച്ചിരുന്നു.
സംഭവദിവസത്തെ ചില കോളുകള് സംശയാസ്പദമാണെന്നും തട്ടിക്കൊണ്ടുപോകലിന് ക്വട്ടേഷന് നല്കിയിട്ടുണ്ടോയെന്ന കാര്യവും പോലീസ് അന്വേഷിക്കും. സംഭവം നടന്ന ദിവസം ഒരു സിനിമാ നിര്മാതാവിന്റെ ഫോണില് നിന്നും പോലീസ് വിളിക്കുമ്പോഴാണ് താന് കുടുങ്ങിയ കാര്യം പള്സര് സുനി അറിയുന്നത്. തുടര്ന്ന് മൊബൈല് ഫോണ് സ്വിച്ച് ഓഫ് ചെയ്ത് ഒളിവില് പോവുകയും ചെയ്തു. അതിനിടെ പാലക്കാട് അതിര്ത്തിയില് നിന്നും കഴിഞ്ഞ ദിവസം പിടികൂടിയ മണികണ്ഠന്റെ ആദ്യഘട്ട ചോദ്യം ചെയ്യല് പൂര്ത്തിയായി.
പണത്തിന് വേണ്ടി ബ്ലാക്ക്മെയില് ചെയ്യുക മാത്രമാണ് ഉദ്ദേശ്യമെന്നായിരുന്നു മണികണ്ഠന് മൊഴി നല്കിയിരിക്കുന്നത്. താന് നടിയെ ഉപദ്രവിച്ചിട്ടില്ലെന്നും ഇയാള് പറയുന്നു. പണം വീതം വയ്ക്കുന്നത് സംബന്ധിച്ച് സുനിയുമായി തര്ക്കം ഉണ്ടായെന്നും മണികണ്ഠന്റെ മൊഴിയിലുണ്ട്.
