കരിമണല് വേര്തിരിക്കുന്നതറിഞ്ഞ് മത്സ്യത്തൊഴിലാളികള് തടഞ്ഞപ്പോള്
അമ്പലപ്പുഴ: ഹൈക്കോടതി ഉത്തരവ് ലംഘിച്ച് തോട്ടപ്പള്ളി ഹാര്ബറില് ഐആര് ഇ മണല് വേര്തിരിച്ചു, മത്സ്യത്തൊഴിലാളികള് തടഞ്ഞതിനെ തുടര്ന്ന് നിര്ത്തിവച്ചു. ഇന്നലെ ഉച്ചയ്ക്ക് രണ്ടു മണിയോടെയാണ് രഹസ്യമായി ഐആര്ഇ ജീവനക്കാര് സ്പൈറല് യൂണിറ്റ് വഴി മണല് വേര്തിരിക്കല് ആരംഭിച്ചത്.
സംഭവം അറിഞ്ഞ ധീവരസഭാ കരയോഗം ഭാരവാഹികള് മത്സ്യത്തൊഴിലാളികളെ സംഘടിപ്പിച്ച് തുറമുഖത്ത് എത്തുകയും വേര്തിരിക്കല് നിര്ത്തിവെയ്പിക്കുകയുമായിരുന്നു. അമ്പലപ്പുഴ പോലിസും സ്ഥലത്ത് എത്തി. എട്ട് മാസം മുമ്പ് 55, 58, 59, 60, 61 ധീവരസഭ കരയോഗങ്ങളുടെ ശക്തമായ പ്രതിഷേധത്തെ തുടര്ന്നാണ് ഹാര്ബറില് ഐആര്ഇ നടത്തിവന്ന മണല് വേര്തിരിക്കല് നിര്ത്തിവെച്ചത്.
നേരത്തെ കരയോഗങ്ങള് ഹൈക്കോടതിയെ സമീപിച്ചതോടെ കോടതിയില് നിന്ന് ഐആര്ഇക്കെതിരെ വിധിയും വന്നിരുന്നു. ഹാര്ബറിന്റെ രണ്ടാംഘട്ട വികസനം ആരംഭിക്കാതെ ഇവിടെ നിന്നും കരിമണല് വേര്തിരിക്കാന് അനുവദിക്കില്ലന്ന നിലപാടിലാണ് ധീവരസഭ കരയോഗങ്ങള്.
കരിമണല് വേര്തിരിക്കാനായി ഐആര്ഇ സ്ഥാപിച്ച സ്പൈറല് യൂണിറ്റ് നീക്കം ചെയ്യണമെന്നും ഇല്ലങ്കില് ശക്തമായ പ്രക്ഷോഭത്തിന് വീണ്ടും തുടക്കമിടുമെന്നും കരയോഗം ഭാരവാഹികള് അറിയിച്ചു.
