നിര്ത്തൂ ഈ അരുംകൊല.. സിപിഎം അക്രമത്തിനെതിരെ ബെംഗളൂരില് നടന്ന പ്രതിഷേധം.
കേരളത്തിലെ സിപിഎം അക്രമങ്ങള്ക്കെതിരെ രാജ്യമെങ്ങും പ്രതിഷേധം. ഇടതു സര്ക്കാര് അധികാരത്തിലെത്തിയ ശേഷം സംഘപരിവാര് പ്രവര്ത്തകര്ക്ക് നേരേ നടന്ന ക്രൂരതകള് രാജ്യത്തിന് മുന്നില് തുറന്നു കാട്ടുന്ന പ്രതിഷേധ പരിപാടികളാണ് അഞ്ഞൂറിലേറെ കേന്ദ്രങ്ങളില് നടന്നത്.
നാഗ്പൂരില് ആര്എസ്എസ് ആസ്ഥാനത്ത് സര്കാര്യവാഹ് ഭയ്യാജി ജോഷി പങ്കെടുത്തു. ബിജെപി ദേശീയ നിര്വാഹക സമിതിയംഗം വി. മുരളീധരന് അക്രമസംഭവങ്ങള് സദസിന് വിശദീകരിച്ചു. കന്യാകുമാരി മുതല് കശ്മീര് വരെയും ദ്വാരക മുതല് ഷില്ലോങ് വരെയുമുള്ള ജനങ്ങള് കേരളത്തിലെ പ്രവര്ത്തകര്ക്കൊപ്പം അണിനിരന്നതായി അഖില ഭാരതീയ സഹപ്രചാര് പ്രമുഖ് ജെ. നന്ദകുമാര് പറഞ്ഞു.
ഗുവാഹതിയിലും മറ്റു ജില്ലകളിലും നടന്ന പ്രതിഷേധ പരിപാടികളില് ആയിരങ്ങള് പങ്കാളികളായി. ഹിമാചല് തലസ്ഥാനമായ ഷിംലയില് നടന്ന പരിപാടിയില് ക്ഷേത്രീയ പ്രചാര് പ്രമുഖ് നരേന്ദ്ര താക്കൂര് പ്രസംഗിച്ചു. മുംബൈ ആസാദ് മൈതാനത്തും ദല്ഹിയിലെ വിവിധ കേന്ദ്രങ്ങളിലും പ്രതിഷേധവുമായി ജനങ്ങള് അണിനിരന്നു. സംസാരിക്കാനും പ്രവര്ത്തിക്കാനുമുള്ള സ്വാതന്ത്ര്യത്തിന്റെ പേരില് ദല്ഹിയില് തെരുവിലിറങ്ങുന്നവരാണ് കേരളത്തിലെ അക്രമങ്ങള്ക്കും അസഹിഷ്ണുതകള്ക്കും നേതൃത്വം നല്കുന്നതെന്ന് വിരോധാഭാസമെന്ന് ഓര്ഗനൈസര് പത്രാധിപര് പ്രഫുല്ല കേത്ക്കര് പറഞ്ഞു.
കര്ണാടകത്തില് ബെംഗളൂരുവില് അടക്കം എല്ലാ ജില്ലാ കേന്ദ്രങ്ങളിലും ആയിരക്കണക്കിന് പ്രവര്ത്തകര് പങ്കെടുത്തു. മുന് മുഖ്യമന്ത്രി ബി.എസ് യെദ്യൂരപ്പ, മീനാക്ഷി ലേഖി എംപി, ക്ഷേത്രീയ സംഘചാലക് വി. നാഗരാജ് എന്നിവര് ബെംഗളൂരു പരിപാടിയില് നേതൃത്വം നല്കി. മഹാരാഷ്ട്ര, മധ്യപ്രദേശ്, ഗുജറാത്ത്, ആസാം, മേഘാലയ, ആന്ധ്രാപ്രദേശ്, തെലങ്കാന, തമിഴ്നാട് തുടങ്ങിയ എല്ലാ സംസ്ഥാനങ്ങളിലും പ്രതിഷധപരിപാടികള് നടന്നു.
‘സിപിഎം അക്രമം ഉപേക്ഷിക്കുക’ എന്ന ഹാഷ് ടാഗില് നടന്ന പ്രചാരണം ട്വിറ്ററിലും ട്രെന്റിങ്ങില് ഒന്നാമതെത്തി. കേരളത്തിലെ സിപിഎം അക്രമങ്ങളുടെ ക്രൂരത അഖില ഭാരതീയ സഹപ്രചാര് പ്രമുഖ് ജെ. നന്ദകുമാര് നാഗ്പൂരില് മാധ്യമപ്രവര്ത്തകരുമായി നടത്തിയ സംഭാഷണത്തില് വ്യക്തമാക്കി.
