കൊച്ചി: പ്രസിദ്ധമായ മരട് വെടിക്കെട്ടിന് കളക്ടര് അനുമതി നിഷേധിച്ചു. കാണികളും കരിമരുന്നു പ്രയോഗം നടക്കുന്ന സ്ഥലവും തമ്മില് 100 മീറ്റര് ദൂരപരിധി എന്ന വ്യവസ്ഥ പാലിക്കുന്നില്ലെന്ന കാരണം പറഞ്ഞാണ് അപേക്ഷ തള്ളിയത്. മാര്ച്ച് 9, 10 തീയതികളിലാണ് വെടിക്കെട്ട് നടക്കേണ്ടിയിരുന്നത്.
മരടില് കൊട്ടാരം ഭഗവതി ദേവസ്വം തെക്കേ ചേരുവാരം ഉത്സവത്തിന്റെ ഭാഗമായാണ് വെടിക്കെട്ട്. അപേക്ഷകള് ജില്ലാ കളക്ടര് മുഹമ്മദ് വൈ സഫീറുള്ള തള്ളി. വടക്കേ ചേരുവാരം പ്രസിഡന്റ് എം.ആര്. ജയകാന്ത ഭട്ട്, തെക്കേ ചേരുവാരം പ്രസിഡന്റ് സതീഷ് ബാബു എന്നിവരാണ് അപേക്ഷിച്ചത്.
അഗ്നിരക്ഷാ വിഭാഗം, കണയന്നൂര് തഹസില്ദാര്, സിറ്റി പോലീസ് മേധാവി എന്നിവര് കരിമരുന്ന് പ്രയോഗം നടത്തുന്നത് സംബന്ധിച്ച് കളക്ടര്ക്ക് അന്വേഷണ റിപ്പോര്ട്ടുകള് നല്കി. വെടിക്കെട്ടിനെതിരെ സമീപവാസികളുടെ പരാതിയുമുണ്ടായി.
2008 ല് വെടിക്കെട്ടിനിടെ ഉണ്ടായ അപകടത്തില് നാലുപേര് മരിച്ചതായി പോലീസ് മേധാവിയുടെ റിപ്പോര്ട്ടില് ചൂണ്ടിക്കാട്ടി. കഴിഞ്ഞ വര്ഷത്തെ അപകടത്തില് രണ്ട് സ്ത്രീകള് കൊല്ലപ്പെട്ടു. കേസുകള് തീര്ന്നിട്ടില്ല. അഡീഷണല് ജില്ലാ മജിസ്ട്രേറ്റ് സി.കെ. പ്രകാശ് സ്ഥലപരിശോധന നടത്തി റിപ്പോര്ട്ട് നല്കി.
വെടിക്കെട്ടിന് അനുമതി നിഷേധിക്കുകയാണെന്നും ജില്ലാ പോലീസ് മേധാവി ഉത്തരവ് നടപ്പാക്കേണ്ടതാണെന്നും കളക്ടറുടെ ഉത്തരവില് പറയുന്നു.
