പാലപ്പിള്ളി: ചിമ്മിനി വന്യജീവി സങ്കേതത്തില് വനം വകുപ്പ് സ്ഥാപിച്ച ട്രാപ്പ് ക്യാമറകളില് നിന്നും കടുവയുടെ ചിത്രങ്ങള് ലഭിച്ചു. കടുവൗെ കൂടാതെ ആനക്കൂട്ടവും മ്ലാവും കാട്ട്പോത്തും മുള്ളന്പന്നിയുമെല്ലാം ക്യാമറയില് പതിഞ്ഞിട്ടുണ്ട്്.
ചിമ്മിനി ഉള്ക്കാട്ടിലെ വിറക് തോട്, മങ്കുഴി എന്നിവിടങ്ങളില് സ്ഥാപിച്ചിരുന്ന ക്യാമറകളാണ് തിങ്കളാഴ്ച തുറന്നത്. ഈ രണ്ടിടങ്ങളില് സ്ഥാപിച്ച ക്യാമറയിലും കടുവയുടെ ചിത്രങ്ങള് പതിഞ്ഞിട്ടുണ്ട്. ചിമ്മിനി ഡാമില് നിന്നും മൂന്ന് കിലോമീറ്റര് ദൂരം മാത്രമാണ് ഇവിടെയ്ക്കുള്ളത്. മങ്കുഴിയില് വെള്ളം കുടിക്കാനെത്തിയ കടുവയുടെ ചിത്രങ്ങളാണുള്ളത്. മൂന്ന് ക്യാമറകളില് പതിഞ്ഞതും ഒരു കടുവ തന്നെയാണെന്ന് ഫോറസ്റ്റ് അധികൃതര് സ്ഥിരീകരിച്ചു.
ചിമ്മിനി വനമേഖലയെ ആറ് ബ്ലോക്കുകളായി തിരിച്ച് 27 ഇടങ്ങളിലാണ് ക്യാമറ സ്ഥാപിച്ചിരിക്കുന്നത്. വനം വകുപ്പും പറമ്പിക്കുളം ടൈഗര് ഫൗണ്ടേഷനും ചേര്ന്നാണ് ക്യാമറകള് സ്ഥാപിച്ചിരിക്കുന്നത്. കടുവകളുടെ എണ്ണം കണക്കാക്കുന്നതിന്റെ ഭാഗമായി കടുവകള് പതിവായി എത്തുന്ന സ്ഥലങ്ങളിലാണ് ക്യാമറകള് സ്ഥാപിച്ചത്. ക്യാമറ പരിധിയില് എത്തുന്ന മൃഗങ്ങളുടെ ശരീര ഊഷ്മാവ് സെന്സറിലൂടെ പിടിച്ചെടുത്താണ് ക്യാമറകള് പ്രവര്ത്തിക്കുന്നത്. ക രാത്രിയിലും പ്രവര്ത്തിക്കുന്ന ക്യാമറകളില് ഇന്ഫ്രാറെഡ് കിരണങ്ങളുടെ സഹായത്തോടെ ഊഷ്മാവിന്റെ വ്യതിയാനമനുസരിച്ച് ഫ്ളാഷുകള് പ്രവര്ത്തിക്കും.
ആറു മാസം മുന്പ് വനം വകുപ്പും ടൈഗര് ഫൗണ്ടേഷനും ചേര്ന്ന് സര്വ്വേ നടത്തിയാണ് ക്യാമറകള് സ്ഥാപിക്കാനുള്ള സ്ഥലങ്ങള് നിശ്ചയിച്ചത്. കടുവകളുടെ ദേഹത്തെ വരകള് നിരീക്ഷിച്ചാണ് അവയെ തിരിച്ചറിയുന്നത്. ഏഴ് ദിവസം കൂടുമ്പോള് തുറന്നു പരിശോധിക്കാവുന്ന ക്യാമറയാണെങ്കിലും വനാന്തരത്തിലായതിനാല് മാസത്തില് ഒരു തവണ പരിശോധിക്കാനാണ് തീരുമാനം. ചിമ്മിനി റേഞ്ച് ഓഫീസര് കെ.ടി പയസ്സിന്റെ നേതൃത്വത്തിലാണ് ക്യാമറകള് തുറന്ന് പരിശോധിച്ചത്.
