കളവുസംഘത്തിനും കൊള്ളസംഘത്തിനും പാര്‍ട്ണര്‍ഷിപ്പ് കമ്പനിക്കും സഹകരണസംഘത്തിനും ക്രിക്കറ്റ് ടീമിനും ഫുട്‌ബോള്‍ ടീമിനുമെല്ലാം ഒരു പാരസ്പര്യം വേണം. അവയെല്ലാം പരിമിതമായ അര്‍ത്ഥത്തില്‍ കൊച്ചുകൊച്ചു സമൂഹങ്ങളാണ്. കലവറയില്ലാത്ത പാരസ്പര്യത്തിന്റെ അഭാവത്തില്‍ അവ ഉദ്ദേശ്യത്തില്‍ ചെന്നെത്തുകയില്ല. പരാജയപ്പെടും. പഞ്ചതന്ത്രത്തിലെ കാകോലുകീയഭാഗത്തില്‍ ഇതുതെളിയിക്കുന്ന ഒരു സരസകഥയുണ്ട്.
ഒരിക്കല്‍ ഒരു രാക്ഷസനും കള്ളനും കൂട്ടുചേര്‍ന്നു. രാക്ഷസന്റെ ഉദ്ദേശ്യം സ്വല്‍പമകലെ താമസിച്ചിരുന്ന ബ്രാഹ്മണനെ കൊന്നുതിന്നണമെന്നും കള്ളന്റെ ഉദ്ദേശ്യം ആ ബ്രാഹ്മണന്റെ രണ്ട് പശുക്കളെ കക്കണമെന്നുമായിരുന്നു. രണ്ടുപേരും ശട്ടം കെട്ടി വീട്ടുപടിക്കലെത്തി. അപ്പോഴേക്കും രണ്ടുപേര്‍ക്കും അവനവന്റെ കാര്യം നടത്താന്‍ തിടുക്കമായി. കള്ളന്‍ പറഞ്ഞു- ‘ഞാന്‍ ആദ്യം പശുക്കുട്ടികളെ കൊണ്ടുപോകട്ടെ-തന്റെ പണിക്കിടയില്‍ ബ്രാഹ്മണന്‍ ഉണര്‍ന്നാല്‍ എന്റെ പണി നടക്കില്ല’. രാക്ഷസന്‍ വാദിച്ചു. ‘അതുവേണ്ട പശുക്കുട്ടി നിലവിളിച്ചാല്‍ ബ്രാഹ്മണന്‍ ഉണരും. അപ്പോള്‍ എന്റെ പണി നടക്കില്ല’. തര്‍ക്കം മൂത്തു. രണ്ടുപേരുടേയും കുശുകുശുപ്പ് ഒച്ചപ്പാടായി. ബ്രാഹ്മണര്‍ അവര്‍ വീട്ടില്‍ കടക്കും മുമ്പേ ഉണര്‍ന്നു. രണ്ടുപേരുടേയും കാര്യം നടന്നില്ല. രണ്ടുപേരുടേയും പരാജയത്തിന് എന്തായിരുന്നു കാരണം?.അവരുടെ കഴിവുകുറവല്ല. നേരെ മറിച്ച് അവര്‍ ഒരുമിച്ചു ചേര്‍ന്നപ്പോഴത്തെ പാരസ്പര്യക്കുറവ്.
ഒരു കൊള്ളസംഘം എപ്പോഴാണ് പോലീസിന്റെ കൈയില്‍പ്പെടുക? അവര്‍ക്കിടയിലെ ഒരാള്‍ അപസ്വരമുയര്‍ത്തുമ്പോള്‍,ഒറ്റിക്കൊടുക്കുമ്പോള്‍, അവര്‍ തമ്മില്‍ ചതിക്കാന്‍ പദ്ധതിയിടുമ്പോള്‍ കൂട്ടായ ഉദ്ദേശ്യത്തിന്റെ മറവില്‍ ഒരാള്‍ക്ക് സ്വാര്‍ഥോദ്ദേശ്യമുള്ളപ്പോള്‍ അവര്‍ കൂട്ടുചേര്‍ന്ന് അന്യന്റെ മുതല്‍ അന്യായമായി തട്ടിപ്പറിക്കുമായിരിക്കാം. എന്നാല്‍ തമ്മില്‍ തമ്മില്‍ തട്ടിപ്പറി തുടങ്ങരുത്, സത്യം പാലിക്കുകയും വേണം. അപ്പോഴേ അവര്‍ അവരുടെ പ്രവര്‍ത്തിയില്‍ ജയിക്കൂ, അവരുടെ വിജയത്തിന്റെ രഹസ്യം താളപ്പിഴയില്ലാത്ത പാരസ്പര്യമാണ്.
അതുകൊണ്ടാണ് ഭാരതീയ മനശാസ്ത്രജ്ഞന്മാര്‍,
”അപിപാപകൃതോരെദ്രോഃസത്യം കൃത്വാ പൃഥക് പൃഥക്
അദ്രോഹം അവിസംവാദം പ്രവര്‍ത്തന്തേ തദാശ്രയാഃ”
ക്രൂരന്മാരായ പാപകര്‍മാക്കളാണെങ്കിലും അവര്‍ പരസ്പരം ദ്രോഹിക്കാതെ, കലഹിക്കാതെ താന്താങ്ങളുടെ സത്യം പാലിച്ചു പ്രവര്‍ത്തിക്കുന്നു.
ക്രിക്കറ്റ് ടീമിന്റെ കാര്യമെടുക്കാം. പരസ്പരമുള്ള ഈര്‍ഷ്യകാരണം കപില്‍ദേവ് ബൗള്‍ ചെയ്യുന്ന പന്ത് വിക്കറ്റ് കീപ്പറായി നില്‍ക്കുന്ന ഗവാസ്‌കര്‍ പിടിക്കുന്നില്ലെന്നുവയ്‌ക്കുക. എങ്ങനെ എതിര്‍പക്ഷത്തിന്റെ വിക്കറ്റ് തകര്‍ക്കാന്‍ കഴിയും. രണ്ടുപേരും മികച്ച കളിക്കാരായിരിക്കാം. എങ്കിലും ഇന്ത്യന്‍ ടീം തോല്‍ക്കും.
(ആര്‍എസ്എസ് അഖിലേന്ത്യാ മുന്‍ ബൗദ്ധിക് പ്രമുഖ് ആര്‍. ഹരിയുടെ ‘ഇനി ഞാന്‍ ഉണരട്ടെ’ എന്ന പുസ്തകത്തില്‍ നിന്ന്)
(തുടരും)
