ന്യൂദല്ഹി: കരസേനാ മേധാവി ജനറല് ബിപിന് റാവത്തിനെ കടന്നാക്രമിച്ച് സിപിഎം. കശ്മീരില് സംഘര്ഷമുണ്ടാക്കുന്ന വിഘടനവാദികള്ക്കും ഭീകരര്ക്കും സൈന്യം ശക്തമായി തിരിച്ചടി നല്കുന്നതാണ് സിപിഎമ്മിനെ ചൊടിപ്പിച്ചത്.
ഭീകരരുമായി ഏറ്റുമുട്ടലുണ്ടാകുമ്പോള് സൈന്യത്തെ ആക്രമിക്കുന്നവരെ ഭീകരരായി കരുതുമെന്ന റാവത്തിന്റെ പ്രസ്താവന കരസേനാ മേധാവിക്ക് ചേര്ന്നതല്ലെന്ന് സിപിഎം മുഖപത്രമായ പീപ്പിള്സ് ഡമോക്രസി കുറ്റപ്പെടുത്തി. ഇത് പ്രതിഷേധക്കാരെ ആയുധമെടുപ്പിക്കുന്നതിനുള്ള അനാവശ്യ പ്രകോപനമാണ്. പോളിറ്റ് ബ്യൂറോ അംഗം പ്രകാശ് കാരാട്ടാണ് പീപ്പിള്സ് ഡമോക്രസിയുടെ എഡിറ്റര്.
കശ്മീരില് പാക്കിസ്ഥാന്റെയും ഭീകരസംഘടനകളുടെയും പിന്തുണയോടെ വിഘടനവാദികള് നടത്തുന്ന അക്രമത്തെ ജനങ്ങളുടെ രാഷ്ട്രീയ സമരമെന്നാണ് എഡിറ്റോറിയല് വിശേഷിപ്പിക്കുന്നത്. സൈന്യത്തെ ആക്രമിക്കാനെത്തിയ വിഘടനവാദിയെ ജീപ്പിന് മുന്നില് കെട്ടിയിട്ട സംഭവത്തിലും റാവത്തിനെ സിപിഎം കുറ്റപ്പെടുത്തുന്നു. ഇതിന് നേതൃത്വം നല്കിയ മേജര് ഗൊഗോയിയെ റാവത്ത് പിന്തുണച്ചിരുന്നു.
റാവത്തിന്റെ പ്രസ്താവന സൈന്യത്തിന്റെ നിലവാരം ഇടിച്ചു. കശ്മീരിലെ ജനങ്ങളെ അടിച്ചമര്ത്തുന്ന മോദി സര്ക്കാരിന്റെ നയമാണ് റാവത്തിന്റെ പ്രവൃത്തിയില് പ്രതിഫലിക്കുന്നത്. ജീപ്പിന് മുന്നില് കെട്ടിയിട്ടത് വോട്ടുചെയ്യാന് പോയ സാധാരണക്കാരനെയാണെന്നും എഡിറ്റോറിയല് വാദിക്കുന്നു.
കശ്മീരിലെ വിഘടനവാദികളെ പരസ്യമായി പിന്തുണക്കുന്ന സിപിഎം ആദ്യമായല്ല സൈന്യത്തെ കുറ്റപ്പെടുത്തുന്നത്. കശ്മീര് സംഘര്ഷത്തിനിടെ വീട്ടുതടങ്കലിലുള്ള വിഘടനവാദി നേതാക്കളെ ജനറല് സെക്രട്ടറി സീതാറാം യച്ചൂരിയുടെ നേതൃത്വത്തില് ഇടത് നേതാക്കള് സന്ദര്ശിച്ചിരുന്നു. വിഘടനവാദികള് ഇവരെ കാണാന് വിസമ്മതിച്ചതിനാല് നാണംകെട്ട് മടങ്ങുകയായിരുന്നു.
സൈനികരെ ബലാത്സംഗം ചെയ്യുന്നവരും കൊലപാതകികളുമാക്കി സിപിഎം സെക്രട്ടറി കോടിയേരി ബാലകൃഷ്ണന് അടുത്തിടെ പ്രസംഗിച്ചതും വിവാദമായി. കശ്മീരില് സൈന്യത്തിനെതിരായി നടക്കുന്ന ആക്രമണങ്ങള്ക്കെതിരെ സിപിഎം പ്രതികരിക്കാറില്ല.
സിപിഎം എന്നാല് ചൈന, പാക്കിസ്ഥാന് മൗത്ത് പീസ്(ചൈനയുടെയും പാക്കിസ്ഥാന്റെയും ശബ്ദം) ആയി മാറിയെന്നാണ് ബിജെപിയുടെ പ്രതികരണം. സിപിഎം സൈന്യത്തെ അപമാനിക്കുകയാണെന്നും ബിജെപി ആരോപിച്ചു.
