ചങ്ങനാശേരി: നഗരത്തിലെ പൊതുനിരത്തുകളില് കുന്നുകൂടിയ മാലിന്യം അടിയന്തിരമായി നീക്കം ചെയ്ത് ശുചീകരണ പ്രവര്ത്തനങ്ങള് കാര്യക്ഷമമാക്കാന് സര്വ്വകക്ഷി യോഗം തീരുമാനിച്ചു. നഗരസഭാ കൗണ്സില് ഹാളില് കൂടിയ യോഗത്തില് പൊതുനിരത്തില് മാലിന്യം തള്ളുന്നവര്ക്കെതിരെ കര്ശന നടപടി ആരോഗ്യ വിഭാഗം കൈക്കൊള്ളണമെന്നും ആവശ്യപ്പെട്ടു.
ഫാത്തിമാപുരത്തുള്ള ഡംബിങ് യാര്ഡില് മാലിന്യം കുന്നുകൂടിയതാണ് പ്രശ്നം സങ്കീര്ണമാക്കിയത്. നഗരത്തില് അഞ്ച് ഏറോബിക് മാലിന്യ സംസ്ക്കരണ യൂണിറ്റുകള് പ്രവര്ത്തിക്കുന്നുണ്ടെങ്കിലും മാലിന്യ സംസ്ക്കരക്കരണം ഫലവത്താകുന്നില്ല. പുതിയതായി ഏഴെണ്ണം സ്ഥാപിക്കുന്നതിന് ആരോഗ്യ സ്റ്റാന്ഡിംഗ് കമ്മറ്റി തീരുമാനിച്ചെങ്കിലും നടപടിയൊന്നുമായിട്ടില്ല.
വികേന്ദ്രീകൃത മാലിന്യ സംസ്ക്കരണ സംവിധാനങ്ങളായ ബൈയോഗ്യാസ് പ്ലാന്റുകള്, വെര്മികം പോസ്റ്റിങ്ങ്, പൈപ്പ് കംപോസ്റ്റിങ്ങ് യൂണിറ്റുകള് സ്ഥാപിച്ച് മാലിന്യത്തിന്റെ അളവ് കുറയ്ക്കുന്നതിനുള്ള നടപടിയും നഗരസഭ സ്വീകരിക്കണമെന്ന് യോഗത്തില് അഭിപ്രായമുയര്ന്നു. ശക്തമായ രാത്രികാല പട്രോളിങ്ങും പരിശോധനകളും ഉദ്യോഗസ്ഥര് നടത്തിയാല് മാലിന്യം വലിച്ചെറിയുന്നവരെ കണ്ടെത്തി ശിക്ഷിക്കുന്നതിന് കഴിയുമെന്നും യോഗം വിലയിരുത്തി.
