ഗാന്ധിനഗര്: മാരാകായുധങ്ങള് ഉപയോഗിച്ച് ഉറങ്ങികിടന്നവരെ ആക്രമിച്ച ശേഷം മോഷണസംഘം സ്വര്ണ്ണാഭരണങ്ങള് തട്ടിയെടുത്തു. ആക്രമണത്തില് നാല് പേര്ക്ക് പരിക്ക്.ഗുരുതരമായി പരിക്കേറ്റ രണ്ടുപേരെ കോട്ടയം മെഡിക്കല് കോളേജില് പ്രവേശിപ്പിച്ചു. നീറിക്കാട് തെക്കേ ചേനയ്ക്കല് ഡെയ്സി(43)ഇടപ്പള്ളില് കുഞ്ഞുമോന്(55)എന്നിവരാണ് മോഷ്ടാക്കളുടെ ആക്രമണത്തിലും മര്ദ്ദനത്തിലും പരിക്കേറ്റ് മെഡിക്കല് കോളേജ്ആശുപത്രിയിലുള്ളത്. ഡെയ്സിയുടെ ഭര്ത്താവ് റോയി(45)കുഞ്ഞുമോന്റെ ഭാര്യ ശോഭന(45)എന്നിവര്ക്കും പരിക്കേറ്റു. മൂന്ന് വീടുകയകളിലാണ് കവര്ച്ച നടന്നത്. പോലീസ് എത്തി ഒരു വീട്ടില് പരിശോധന നടത്തുന്ന സമയത്ത് മോഷ്ടക്കാള് മറ്റൊരു വീട്ടില് കയറിയിരുന്നു.
തിങ്കളാഴ്ച രാത്രി ഒന്നരയോടെയാണ് മോഷ്ടാക്കള് അയര്ക്കുന്നം നീറിക്കാട് ഭാഗത്തെ ജനങ്ങളെയാകെ ഭീതിയിലാഴ്ത്തി മോഷണവും വടിവാളും വെട്ടുകത്തിയും ഉപയോഗിച്ച് ആക്രമണം നടത്തിയത്. റോയിയുടെ വീട്ടിലെത്തിയ മോഷ്ടാക്കള് അടുക്കളയുടെ കതക് തകര്ത്താണ് അകത്ത് കടന്നത്. ഉറങ്ങിക്കിടന്നിരുന്ന റോയിയുടെ ഭാര്യ ഡെയ്സിയുടെ കഴുത്തില് കിടന്ന മാല പൊട്ടിച്ചെടുത്തപ്പോള് ഉണര്ന്ന ഇവര് ബഹളം കൂട്ടി.തുടര്ന്ന് കൈയ്യില് കിടന്ന വളകള് ഊരിഎടുക്കാന് കഴിയാതെ വന്നപ്പോള് മോഷ്ടാക്കള് ഡെയ്സിയെ വടിവാള് കൊണ്ട് ആക്രമിക്കുകയായിരുന്നു.
ഡെയ്സിയുടെ ഇടത് കണ്ണിന് ആഴത്തില് പരിക്കേറ്റു. ബഹളം കേട്ട് ഉണര്ന്ന റോയിയേയും മോഷ്ടാക്കള് ആക്രമിക്കുകയും നെറ്റിയില് ഇടിച്ച് വീഴ്ത്തുകയും ചെയ്തു. ഡെയ്സിയുടെ വളകളും ഒടിച്ചെടുത്ത് ആക്രമികള് പുറത്ത്കടന്നു.
കരച്ചില് കേട്ട് ഉണര്ന്ന പരിസരവാസികള് ഓടിയെത്തിയപ്പോഴേക്കും അക്രമികള് ഇരുട്ടില്മറഞ്ഞു. നാട്ടുകാര് അയര്ക്കുന്നം പോലീസില് വിവരം അറിയിച്ചതിനെ തുടര്ന്ന് പോലീസ് സ്ഥലത്തെത്തി പരിശോധന നടത്തി. ഈ സമയത്തുതന്നെയാണ് നാനൂറ് മീറ്റര് അകലെയുള്ള ഇടപ്പള്ളില് കുഞ്ഞുമോന്റെ വീട്ടില് മോഷണസംഘം എത്തുന്നത്. സമാനമായ രീതിയില് അകത്തുകടന്ന മോഷ്ടാക്കള് കുഞ്ഞുമോന്റെ ഭാര്യ ശോഭനയുടെ കഴുത്തില് കിടന്ന മാലപൊട്ടിച്ചെടുത്തു. ബഹളം കേട്ട് ഉണര്ന്ന കുഞ്ഞുമോനെ മോഷ്ടാക്കള് ചേര്ന്ന് മര്ദ്ദിക്കുകയും വെട്ടുകത്തികൊണ്ട് വെട്ടാന് മുതിരുകയും ചെയ്തു. അക്രമിയുടെ കയ്യില്കടന്ന് പിടിച്ച കുഞ്ഞുമോനെ മോഷ്ടാക്കള് ചേര്ന്ന് മര്ദ്ദിച്ച് അവശനാക്കി. മര്ദ്ദനത്തില് കുഞ്ഞുമോന്റെ വാരിയെല്ലുകള്ക്ക് പൊട്ടലുണ്ട്.
ഇവിടെയും ബഹളവും ഉച്ചത്തിലുള്ള കരിച്ചിലും കേട്ട നാട്ടുകാര് ഉണര്ന്ന് ലൈറ്റിട്ടപ്പോഴേക്കും മോഷ്ടാക്കള് രക്ഷപ്പെട്ടിരുന്നു. സമീപത്തെ വീട്ടില്നിന്നും ബൈക്കുമായാണ് മോഷ്ടാക്കള് രക്ഷപ്പെട്ടതെന്നും അറിയുന്നു. അതേ രാത്രിയില്തന്നെ പോളച്ചിറയില് ബേക്കറി നടത്തുന്ന ഇലവുങ്കല് മോഹനന്റെ വീട്ടിലും മോഷണശ്രമം ഉണ്ടായി. വീടിന്റെ പിന്നിലെ കതക് തകര്ക്കുവാന് ശ്രമം നടന്നതായും പറയുന്നു.
ഒരേദിവസം തന്നെ പ്രദേശത്ത് മൂന്ന് വീടുകളില് ആക്രമണവും മോഷണവും നടന്നതില് ജനങ്ങളാകെ പരിഭ്രാന്തിയിലാണ്. റോയിയുടെ വീട്ടിലെ മോഷണവിവരം അറിഞ്ഞെത്തിയ പേ#ാലീസ് പരിശേ#ാധന നടക്കുമ്പോഴാണ് അയല്വാസിയായ കുഞ്ഞുമോന്റെ വീട്ടിലും കവര്ച്ചസംഘം എത്തിയത്. അടിവസ്ത്രം മാത്രം ധരിച്ചെത്തിയ മൂന്ന് പേരാണ് കവര്ച്ച നടത്തിയതെന്നാണ് വിവരമെന്ന് പോലീസ് പറഞ്ഞു. പ്രദേശത്തേ സിസിടിവി ക്യാമറ പരിശോധിച്ച് വരുകയാണെന്നും പോലീസ് അറിയിച്ചു. സംഭവുമായി ബന്ധപ്പെട്ട് രണ്ട് അന്യസംസ്ഥാന തൊഴിലാളികളെ പോലീസ് കസ്റ്റഡിയിലുണ്ടെന്നാണ് സൂചന. അയര്ക്കുന്നം പോലീസ് കേസെടുത്ത് അന്വേഷണം തുടങ്ങി.
