മേപ്പാടി: ലോക പരിസ്ഥിതി ദിനത്തില് എം. എസ്. സ്വാമിനാഥന് ഗവേഷണ നിലയവും വയനാട് സോഷ്യല് ഫോറസ്ട്രിയും, മേപ്പാടി ഗ്രാമപഞ്ചായത്തും,സന്നദ്ധസംഘടനകളും സംയുക്തമായി വിത്ത് കാടില് നിന്ന് ഉത്ഭവിച്ച് കമ്പനി നദിയുടെ പോഷക നദിയിലേക്ക് വന്ന് ചേരുന്ന പത്തു കിലോമീറ്റര് നീളമുള്ള അരുവിയുടെ പുനരുജ്ജീവനം ലക്ഷ്യമാക്കി വിവിധ കര്മ്മ പരിപാടികള് സംഘടിപ്പിച്ചു. ഒരു വര്ഷം നീണ്ട് നില്ക്കുന്ന ‘അരുവിക്കൊരു പുനര്ജ്ജനി’ പദ്ധതിയുടെ ഉദ്ഘാടനം ജൂണ് അഞ്ച് പരിസ്ഥിതി ദിനത്തില് നടന്നു. തുടര്ന്ന് അരുവിയുടെ ശുചീകരണവും രണ്ട് കിലോമീറ്ററിലധികം ദൂരത്തില് അരുവിയുടെ ഇരുപുറങ്ങളിലും ഓടയും കൈതയും നട്ട് പിടിപ്പിച്ചു. പൊതുജനപങ്കാളിത്തം കൊണ്ട് അരുവിക്കൊരു പുനര്ജ്ജനി ശ്രദ്ധേയമായി. വിത്ത് കാട് പ്രദേശവാസികള്ക്ക് എം. എസ്. സ്വാമിനാഥന് ഗവേഷണ നിലയം വംശനാശം നേരിടുന്ന പത്ത് ഇനം വൃക്ഷതൈകള് നല്കി.അരുവിക്കൊരു പുനര്ജ്ജനി പദ്ധതിയുടെ ഉദ്ഘാടന സമ്മേളത്തിന് എം. എസ്. സ്വാഗതം ആശംസിച്ചു.
മേപ്പാടി പഞ്ചായത്ത് നടത്തിവരുന്ന ‘കുടുംബമരം’ പദ്ധതി പോലെതന്നെ അരുവിക്കൊരു പുനര്ജ്ജനി ജനങ്ങള് ഏറ്റെടുക്കണമെന്നും മാറുന്ന കാലവസ്ഥയുടെ രൂക്ഷതയെ മറികടക്കാന് പ്രകൃതി സംരക്ഷണം മാത്രമാണ് ഏകമാര്ഗ്ഗമെന്നും അതിനായി മറ്റൊന്നും നോക്കാതെ പൊതുജനങ്ങള് ഒറ്റക്കെട്ടായി നില്ക്കണമെന്നും ചടങ്ങ് ഉദ്ഘാടനം ചെയ്തുകൊണ്ട് മേപ്പാടി ഗ്രാമപഞ്ചായത്ത് പ്രസിഡന്റ് കെ. കെ. സഹദ് പറഞ്ഞു. വാര്ഡ് മെമ്പര് ലളിത മോഹന്ദാസ് ചടങ്ങിന് അദ്ധ്യക്ഷത വഹിച്ചു.
ജനകീയ പങ്കാളിത്തത്തോടെ മാത്രമെ ഇനിയൊരു പരിസ്ഥിതി സംരക്ഷണ പ്രവര്ത്തനത്തിന് സാധ്യതയുള്ളൂവെന്നും അതുകൊണ്ട് തന്നെയാണ് പത്ത് കിലോമീറ്ററിലധികം ദൂരത്തിലുള്ള അരുവിയുടെ പുനരുജ്ജീവന പ്രവര്ത്തനങ്ങള് ജനകീയ പങ്കാളിത്തത്തോടെ ഏറ്റെടുത്തു നടത്താന് എം. എസ്. സ്വാമിനാഥന് ഗവേഷണ നിലയം തീരുമാനമെടുത്തതെന്ന് ഗാര്ഡന് മാനേജര് ജിതിന് എം. എം. പറഞ്ഞു. സ്വാമിനാഥന് ഗവേഷണ നിലയം സീനിയര് സയന്റിസ്റ്റ് വി. വി. ശിവന് ,വാര്ഡ് മെമ്പര് സഹിഷ്ണ, സി. കെ. വര്ഗ്ഗീസ് കുട്ടി വിത്ത് കാട് പൗരസമിതി കണ്വീനര് സുകുമാരന്തുടങ്ങിയവര് സംസാരിച്ചു.
