ന്യൂദല്ഹി: ജൂലൈ ഒന്ന് മുതല് നടപ്പാക്കുന്ന ജിഎസ്ടി നികുതി ഘടന പ്രധാനമന്ത്രി നരേന്ദ്ര മോദിയുടെ അധ്യക്ഷതയില് ചേര്ന്നയോഗം വിലയിരുത്തി. യോഗത്തില് ധനമന്ത്രി അരുണ് ജെയ്റ്റ്ലി, റവന്യൂ സെക്രട്ടറി ഹസ്മുഖ് അധിയ, കേന്ദ്ര എക്സൈസ്, കസ്റ്റംസ് (സിബിആസി) ഉയര്ന്ന ഉദ്യോഗസ്ഥരും പങ്കെടുത്തു.
ജിഎസ്ടി കൗണ്സില് നികുതി ഘടന പരിഷ്ക്കരിച്ചതിന് ശേഷമുള്ള പ്രധാനമന്ത്രി പങ്കെടുത്ത ആദ്യ അവലേകനയോഗമായിരുന്നു ഇത്. മെയ് രണ്ടിന് ജിഎസ്ടി ഘടന അംഗീകരിച്ചതിന് ശേഷമുള്ള രണ്ടാമത്തെ യോഗവുമായിരുന്നു ഇത്. ധനമന്ത്രി അധ്യക്ഷത വഹിച്ച യോഗത്തിലാണ് ജിഎസ്ടി നികുതി സംബന്ധിച്ച് തീരുമാനമുണ്ടായത്.
ഏറ്റവും കുറഞ്ഞ നികുതി അഞ്ചു ശതമാനവും പരമാവധി നികുതി 28 ശതമാനവുമാണ്. 12 ശതമാനം, 18 ശതമാനം നികുതികൂടി ഉള്പ്പെട്ടതാണ് നാലു സ്ലാബുള്ള ഘടന. ആഡംബരകാറുകള്ക്കും പാന്മസാലയ്ക്കും ശീതളപാനീയങ്ങള്ക്കും സെസ് ചുമത്തും.
സാധാരണക്കാര്ക്ക് ആശ്വാസം നല്കുന്നതിനായി അവശ്യഭക്ഷ്യധാന്യങ്ങളെ നികുതിയില് നിന്നു ഒഴിവാക്കിയിരുന്നു. നിത്യോപയോഗസാധനങ്ങള്ക്ക് വില കുറയും. സ്വര്ണ്ണത്തിന് മൂന്ന് ശതമാനവും ഡയമണ്ടിന് 0.25 ശതമാനവുമാണ് നികുതി നിശ്ചയിച്ചിരിക്കുന്നത്.
