കുറവിലങ്ങാട്: ലോകപരിസ്ഥിതി ദിനത്തില്‍ ആവശ്യാനുസരണം വൃക്ഷത്തൈകള്‍ സ്‌കൂള്‍ കുട്ടികള്‍ക്ക് വിതരണം ചെയ്യുമെന്ന സര്‍ക്കാര്‍ വാഗ്ദാനം കുട്ടികളെപറ്റിക്കുന്നതരത്തിലായി.
കൃഷിഭവന്റെയും പഞ്ചായത്തിന്റെയും സഹകരണത്തോടെ ആയിരുന്നു പല പഞ്ചായത്തുകളിലും തൈകള്‍ വിതരണം നടത്തിയത്. മരങ്ങാട്ടുപള്ളി പഞ്ചായത്തിലെ പകുതിയിലധികം സ്‌കൂളുകളിലും വൃക്ഷത്തൈകള്‍ വിതരണത്തിനെത്തിയില്ല. എത്തിയതാകട്ടെ നാമമാത്രം. ഓരോ സ്‌കൂളുകളിലും സര്‍ക്കാര്‍ സ്ഥാപനങ്ങളിലും ആവശ്യാനുസരണം വൃക്ഷത്തൈകള്‍ വിതരണം ചെയ്യുമെന്ന സര്‍ക്കാര്‍ വാഗ്ദാനമാണ് പലസ്ഥലത്തും പാലിക്കപ്പെടാതെപോയത്.
പഞ്ചായത്തുകളിലെത്തുന്ന തൈകള്‍ അതാതുപ്രദേശങ്ങളിലെത്തിക്കുന്നതിന് പഞ്ചായത്തുകള്‍ക്ക് പതിനായിരം രൂപ വീതം തനതു ഫണ്ടില്‍നിന്നോ പ്ലാന്‍ ഫണ്ടില്‍നിന്നോ ചെലവഴിക്കാം എന്നിരിക്കെയാണ് പല സ്ഥലങ്ങളിലും നേരിട്ട് വൃക്ഷത്തൈകള്‍ വിതരണം ചെയ്യപ്പെടാതിരുന്നത്. കടപ്ലാമറ്റം പഞ്ചായത്തിലെ ചില സ്‌കൂളുകള്‍ നേരിട്ട് കൃഷിഭവനില്‍നിന്ന് തൈകള്‍ ഏറ്റെടുത്ത് സ്‌കൂളിലെത്തിക്കുകയായിരുന്നു. ഇതാകട്ടെ ആവശ്യാനുസരണം ലഭിക്കാതിരുന്നത് വിതരണത്തെ ബാധിച്ചു. പഞ്ചായത്ത് പ്രദേശങ്ങളില്‍ തൊഴിലുറപ്പ് തൊഴിലാളികളെയും ഉപകരണങ്ങളും ഉപയോഗിച്ച് പദ്ധതി നടപ്പാക്കണമെന്ന നിര്‍ദ്ദേശവും പല സ്ഥലങ്ങളിലും പാലിക്കപ്പെട്ടില്ല.
പ്രാദേശിക അടിസ്ഥാനത്തില്‍ പ്ലാനുകള്‍ തയ്യാറാക്കി തൈകള്‍ വിതരണം നടത്തി വ്യക്തികളെയും സ്ഥാപനങ്ങളെയും ഉള്‍പ്പെടുത്തി കൂട്ടായ്‌മയില്‍ പരിസ്ഥിതി ദിനം ആഘോഷിക്കുമെന്ന വാഗ്ദാനവും പല സ്ഥലങ്ങളിലും പാലിക്കപ്പെട്ടില്ല.
രാവിലെ മുതല്‍ തൈകള്‍ കാത്തിരുന്ന വിദ്യാര്‍ത്ഥികളും സ്‌കൂളുകളും തൈകള്‍ എത്താതിരുന്നത് നിരാശരാക്കി.
