കുറവിങ്ങാട്: എം.സി റോഡ് വികസനവുമായി ബന്ധപ്പെട്ട് കോഴാ ജില്ലാ ക്യഷിത്തോട്ടത്തിന്റെ സ്ഥലം ഏറ്റടുക്കലിന് ശേഷം പൊളിച്ചമതില് പുനര്നിര്മ്മിച്ച് നല്കാന് കാലതാമസം നേരിടുന്നു. കെഎസ്ടിപിയുടെ അനാസ്ഥയാണ് മതില്നിര്മ്മിച്ച് നല്കാന് കാലതാമസം നേരിടുന്നതിന് കാരണം.
റോഡ് വികസനത്തിനായി അന്പതിലേറെ സെന്റ് സ്ഥലമാണ് ജില്ലാ കൃഷിത്തോട്ടത്തില് നിന്ന് ഏറ്റെടുത്തത്. ഏറ്റെടുക്കലിന് ശേഷം പൊളിച്ചമതിലിന്റെ പുനര്നിര്മാണമാണ് വൈകുന്നത്. മൂന്ന് വര്ഷം മുമ്പ് മണ്ണുമാന്തി യന്ത്രം ഉപയോഗിച്ച് മണിക്കൂറുകള്ക്കുളളിലാണ് മതില് പൊളിച്ചത്. റോഡ് വികസനത്തിന്റെ ഭാഗമായി മറ്റിടങ്ങളിലും ഇതുപോലെ മതില് പൊളിച്ചിരുന്നു. ഇതിനു ശേഷം പട്ടിത്താനം-മൂവാറ്റുപുഴ റീച്ചില് പലയിടത്തും സ്വകാര്യ വ്യക്തികള്ക്കും സ്ഥാപനങ്ങള്ക്കും കെഎസ്ടിപി മതില് പുനര്നിര്മ്മിച്ച് നല്കി. എന്നാല് സര്ക്കാര് ഉടമസ്ഥതയിലുളള സ്ഥലത്തിന്റെ സംരക്ഷണ കാര്യത്തില് അധികൃതര് അനാസ്ഥ തുടരുകയാണ്.
മതില് പുനര്നിര്മ്മിക്കണമെന്നാവശ്യപ്പെട്ട് കൃഷിത്തോട്ടം അധികൃതര് കൃഷി മന്ത്രി, പൊതുമരാമത്ത് മന്ത്രി എന്നിവര്ക്കൊക്കെ പരാതി നല്കിയിരുന്നു. എന്നാല്ആരും അനുകൂല നിലപാട് ഇതുവരെ സ്വീകരിച്ചിട്ടില്ല. മഴ ശക്തി പ്രാപിച്ചതോടെ പല സ്ഥലവും ഇടിഞ്ഞുവീഴാന് സാധ്യതയുണ്ട്. ഇങ്ങനെ സംഭവിച്ചാല് സര്ക്കാര് ഉടമസ്ഥതയിലുളള ഭൂമിയാണ് നഷ്ടപ്പെടുക. കൃഷിത്തോട്ടത്തിന്റെ മുഖ്യ ഓഫീസും വിത്തുകള് വിതരണം ചെയ്യുന്ന കൗണ്ടറും വിവിധ കാര്ഷിക ഉപകരണങ്ങള്, ട്രാക്ടറുകള്, വിവിധയിനം തൈകള് എന്നിവ സൂക്ഷിച്ചിരിക്കുന്ന സ്ഥലത്തേക്ക് പ്രവേശിക്കുന്ന മുഖ്യകവാടത്തിന് ഗേറ്റും ഇല്ല.
ഓഫീസിന്റെ പ്രവര്ത്തന സമയം കഴിയുമ്പോള് നെറ്റ് ഉപയോഗിച്ചാണ് കവാടം മറയ്ക്കുന്നത്. രാത്രി സമയങ്ങളില് ഇവിടെ സാമൂഹിക വിരുദ്ധരുടെയും മറ്റും ശല്യം രൂക്ഷമാണെന്നും തൊഴിലാളികള് തന്നെ പറയുന്നു. തൈകള് ഉള്പ്പെടെയുളളവ മോഷണം പോകുന്നുണ്ട്.
