ഏറ്റുമാനൂര്: ശബരിമലയിലെ സ്വര്ണ്ണ കൊടിമര പുനഃപ്രതിഷ്ഠയുടെ ഭാഗമായി കൊടിമരത്തിന്റെ മുകളില് പ്രതിഷ്ഠിക്കുവാനുള്ള വാജിവാഹനം (കുതിര), കൊടിമരത്തറയില് സ്ഥാപിക്കേണ്ട അഷ്ടദിക്പാലകരും വഹിച്ചുകൊണ്ടുള്ള രഥയാത്രക്ക് ഞായറാഴ്ച്ച ഉച്ചക്ക് ഒരു മണിക്ക് ഏറ്റുമാനൂര് മഹാദേവ സന്നിധിയില് വച്ചു സ്വീകരണം നല്കും.
മുഖ്യ ശില്പി പരുമല അനന്തനാചാരിയുടെ പണിശാലയില് നിന്നും തിരുവിതാംകൂര് ദേവസ്വം ബോര്ഡ് പ്രസിഡന്റ് പ്രയാര് ഗോപാലകൃഷ്ണന്, ദേവസ്വം ബോര്ഡ് അംഗമായ കെ. രാഘവന് എന്നിവര് ഭദ്രദീപം കൊളുത്തി ഹൈക്കോടതി അഡ്വ.കമ്മീഷണര് എ.എസ്.പി.കുറുപ്പിന്റെ നേതൃത്വത്തില് ഏറ്റുവാങ്ങി ഘോഷയാത്രയായി പരുമലയില് നിന്നും പുറപ്പെട്ട് 11 മണിയോടെ കോട്ടയം തിരുനക്കര മഹാദേവ ക്ഷേത്രത്തില് എത്തിച്ചേരും. ഇവടെ നിന്നും ഏറ്റുമാനൂര് ക്ഷേത്ര ഭാരവാഹികളും ,ക്ഷേത്ര ഉപദേശക സമിതിയും, ഭക്തജനങ്ങളും ചേര്ന്നു ഏറ്റമാനൂര് മഹാദേവക്ഷേത്രത്തിലേക്ക് ആനയിക്കും.
ഒരു മണിയോടെഏറ്റുമാനൂര് സെന്ട്രല് ജംങ്ഷനില് സുരേഷ് കുറുപ്പ് എംഎല്എ, നഗരസഭാ അദ്ധ്യക്ഷന് ജയിംസ് പ്ലാക്കി തൊട്ടി, ഏറ്റുമാനൂര് രാധാകൃഷ്ണന്, വിവിധ ഹിന്ദുസംഘടനാ നേതാക്കള് എന്നിവരുടെ നേതൃത്വത്തില് വാദ്യമേളങ്ങളുടെയും, നാമജപത്തിന്റെയും അകമ്പടിയോടെ വരവേല്ക്കും.
ക്ഷേത്രസന്നിധിയില് ദേവസ്വം ബോര്ഡ് മെമ്പര് അജയ് തറയില് ,ഗുരുവായൂര് ദേവസ്വം ബോര്ഡ് ചെയര്മാന് എന്. പീതാംബരക്കുറുപ്പ്, വാഴൂര് തീര്ത്ഥപാദാശ്രമത്തിലെ വിജയബോധാനന്ദ, ദേവസ്വം അഡ്മിനസ്ട്രേറ്റര് എ.ഗോപാലകൃഷ്ണന് തുടങ്ങിയവര് ഹാരമണിയിച്ചും,പുഷ്പവൃഷ്ടി നടത്തിയും സ്വീകരിക്കും. തുടര്ന്നു രണ്ടു മണിയോടെ ഘോഷയാത്രയായി കിടങ്ങൂര് ,എരുമേലി ,നിലക്കല് എന്നിവടങ്ങനിലെ സ്വീകരണങ്ങള് ഏറ്റുവാങ്ങി രാത്രി എട്ടരയോടെ പമ്പ ഗണപതി ക്ഷേത്രത്തില് എത്തിച്ചേരും.
