കോട്ടയം: കുമരകത്ത് വീണ്ടും സിപിഎം ആക്രമണം. കരിയില് ലക്ഷം വീട് കോളനിയില് വീട് കയറി നാശനഷ്ടം വരുത്തി. ഗ്രാമപഞ്ചായത്ത് അംഗം പി. കെ. സേതുവിന്റെ വീട്ടിലും അതിക്രമം നടന്നു.
കുമരകം ഗ്രാമപഞ്ചായത്ത് അംഗങ്ങളെ മര്ദ്ദിച്ച് കൊലപ്പെടുത്തുവാന് ശ്രമിച്ചതിന് റിമാന്ഡ് ചെയ്തിരുന്ന പ്രതികള്ക്ക് ഇന്നലെ ജാമ്യം ലഭിച്ചിരുന്നു. ഇതിന് പുറമെ ഒളിവിലുണ്ടായിരുന്ന സിപിഎം, ഡിവൈഎഫ്ഐ അക്രമി സംഘത്തിന് മുന്കൂര് ജാമ്യവും ലഭിച്ചു. ഇതിന്റെ പേരില് ആഹ്ലാദപ്രകടനവുമായി എത്തിയ 40അംഗ സംഘം കുമരകത്ത് ജനങ്ങളെ ഭീതിയിലാഴ്ത്തി രാത്രിയില് മാരകായുധങ്ങളുമായി കൊലവിളി നടത്തി. പോലീസ് സാന്നിദ്ധ്യത്തിലാണ് ഇവരുടെ അഴിഞ്ഞാട്ടം. കോടതി റിമാന്ഡ് ചെയ്തിരുന്ന വിനീഷ്, റാവു, മനോജ് ഒളിവില് കഴിഞ്ഞിരുന്ന മിഥുന് എന്ന അമ്പിളിയും തുടങ്ങിയവരുടെ നേതൃത്വത്തിലായിരുന്നു രാത്രിയില് വീടുകള്ക്ക് മുമ്പിലെത്തി അസഭ്യവര്ഷവും ഭീഷണിയും ഉയര്ത്തിയത്. കരിയില് ലക്ഷംവീട് കോളനിയില് എത്തിയ അക്രമികള് രാജപ്പന്റെ വീട്ടുപകരണങ്ങള് നശിപ്പിക്കുകയും വീട്ടമ്മയെ ആക്രമിക്കുവാന് ശ്രമിക്കുകയും ചെയ്തു.
പഞ്ചായത്തംഗം പി.കെ.സേതുവിന്റെ വീടിന് മുമ്പിലെത്തിയ സംഘം കമ്പിവടിയും വടിവാളുമായി ആക്രോശിക്കുകയും കുടിവെള്ളം ശേഖരിച്ച് വച്ചിരുന്ന പാത്രങ്ങള് അടിച്ച് തകര്ക്കുകയും ചെയ്തു. സേതുവിന്റെ അമ്മയെയും ഭീഷണിപ്പെടുത്തി.
കവണാറ്റിന്കരയിലേക്ക് നീങ്ങിയസംഘം വഴിയരികില് സ്ഥാപിച്ചിരുന്ന ബിജെപിയുടെ കൊടിമരങ്ങളും മറ്റും വ്യാപകമായി നശിപ്പിച്ചതിന് പുറമെ പ്രവര്ത്തകരുടെ വീട്ടുമുറ്റത്തെത്തി കൊലവിളി ഉയര്ത്തുകയും ചെയ്തു.
ജനാധിപത്യപരമായി പ്രവര്ത്തിക്കുവാനോ തെരുവിലിറങ്ങി നടക്കുവാനോ സാധിക്കാത്ത സാഹചര്യമാണ് ഇപ്പോള് സിപിഎം കുമരകത്ത് നടത്തുന്നത്. ഇതിന് നേതൃത്വം വഹിക്കുന്ന പ്രതികളുടെ ജാമ്യം റദ്ദാക്കണമെന്നും മറ്റുപ്രതികളെയും അറസ്റ്റ് ചെയ്ത് നിയമത്തിന് മുന്പില് കൊണ്ടുവരണമെന്നും ആവശ്യപ്പെട്ട് വീട്ടമ്മമാരും പഞ്ചായത്തംഗങ്ങളായ പി.കെ.സേതുവും, വി.എന്.ജയകുമാറും ഐജിക്കും സിഐക്കും പരാതി നല്കി.
