കോട്ടയം: കെഎസ്ആര്‍ടിസി യുടെ ഭരണനേതൃത്വത്തിനും തൊഴിലാളി യൂണിയനുകള്‍ക്കുമെതിരെ ജീവനക്കാര്‍. കോര്‍പ്പറേഷന്റെ എക്‌സിക്യൂട്ടീവ് ഡയറക്ടമാര്‍ അടക്കമുള്ളവര്‍ കഴിവില്ലാത്തവരാണെന്ന് 66 ശതമാനം ജീവനക്കാര്‍ അഭിപ്രായപ്പെട്ടപ്പോള്‍ 40 ശതമാനം പേര്‍ യൂണിയനുകളില്‍ വിശ്വാസമില്ലെന്ന് രേഖപ്പെടുത്തി.
പൊന്‍കുന്നം സെന്റ് ആന്റണീസ് ഇന്‍സ്റ്റിറ്റ്യൂട്ട് ഓഫ് അഡ്വാന്‍സ്ഡ് സ്റ്റഡീസിലെ എംബിഎ വിദ്യാര്‍ത്ഥികള്‍ അദ്ധ്യാപകരുടെ സഹായത്തോടെ കോട്ടയം എറണാകുളം ഇടുക്കി ജില്ലകളിലെ കെഎസ്ആര്‍ടിസി പ്രവര്‍ത്തനങ്ങളെക്കുറിച്ച് നടത്തിയ അന്വേഷണത്തിലാണ് ഭരണനേതൃത്വത്തിനും തൊഴിലാളി യൂണിയനുകള്‍ക്കുമെതിരെ ജീവനക്കാര്‍ അഭിപ്രായപ്രകടനം നടത്തിയത്.
രണ്ട് വര്‍ഷത്തെ അന്വേഷണങ്ങള്‍ക്കൊടുവില്‍ തയാറാക്കിയ 500ലധികം പേജുകള്‍ വരുന്ന പഠനറിപ്പോര്‍ട്ട് കോളേജ് അധികൃതരുടെ നേതൃത്വത്തില്‍ മുഖ്യമന്ത്രി പിണറായി വിജയന് കൈമാറി.
കേരളത്തിലെ ഏറ്റവും വലിയ പൊതുമേഖലാ സ്ഥാപനവും ഏതാണ്ട് 90,000 ജീവനക്കാരെയും / പെന്‍ഷന്‍കാരെയും പോറ്റുന്ന കെഎസ്ആര്‍ടിസിയിലാണ് സംസ്ഥാനത്തെ ശക്തമായ തൊഴിലാളി യൂണിയനുകള്‍ പ്രവര്‍ത്തിക്കുന്നത്. എന്നാല്‍ 40% തൊഴിലാളികള്‍ക്കും യൂണിയനുകളില്‍ വിശ്വാസമില്ല എന്നാണ് അവര്‍ക്കിടയില്‍ നടത്തിയ സര്‍വ്വേ ഫലങ്ങള്‍ തെളിയിക്കുന്നത്.
നിശ്ചിത വിദ്യാഭ്യാസ യോഗ്യതയോ കഴിവോ ഇല്ലാത്ത എക്‌സിക്യൂട്ടീവ് ഡയറക്ടര്‍മാര്‍ ആണ് കോര്‍പ്പറേഷന്‍ പ്രവര്‍ത്തനങ്ങളെ അവതാളത്തിലാക്കിയതെന്ന പൊതുചിന്തയാണുള്ളത്. കോളേജ് നടത്തിയ പഠനത്തില്‍ 66% ജീവനക്കാരും കെഎസ്ആര്‍ടിസിയിലെ ഉന്നത ഉദ്യോഗസ്ഥര്‍ കഴിവില്ലാത്തവരാണെന്ന് അഭിപ്രായപ്പെട്ടു.
ദേശസാല്‍ക്കരണ റൂട്ടുകളെ സംബന്ധിച്ച് ഏറെ വിവാദങ്ങള്‍ക്കു വേദിയായ കോട്ടയം-കുമളി റൂട്ടില്‍ നടത്തിയ ട്രാഫിക് സര്‍വ്വേയില്‍ പൊന്‍കുന്നത്തു നിന്നും മുണ്ടക്കയം ഭാഗത്തേയ്‌ക്ക് 210 സ്വകാര്യ ബസ്ട്രിപ്പുകളും 130 കെഎസ്ആര്‍ടിസി ട്രിപ്പുകളുമുണ്ടെന്നും കോട്ടയം ഭാഗത്തേയ്‌ക്ക് 220 സ്വകാര്യ ബസ്ട്രിപ്പുകളും 124 കെഎസ്ആര്‍ടിസി ട്രിപ്പുകളുമുണ്ടെന്ന് കണ്ടെത്തിയിരുന്നു. പീക്ക് ടൈം ഒഴിവാക്കിയാല്‍ 90% ബസുകളിലും പകുതിപോലും യാത്രക്കാരില്ല. ദേശസാല്‍കൃത/സ്വകാര്യ ബസ് റൂട്ട് എന്ന പരിഗണനയില്ലാതെ ഓര്‍ഡിനറി സര്‍വ്വീസുകള്‍ സ്വകാര്യമേഖലയ്‌ക്കും ലിമിറ്റഡ് ഓര്‍ഡിനറി അടക്കമുള്ള സൂപ്പര്‍ക്ലാസ്സ് സര്‍വ്വീസുകള്‍ കെഎസ്ആര്‍ടിസി നടത്തിയാല്‍ കെഎസ്ആര്‍ടിസിയെ ലാഭകരമാക്കാം.
സ്വകാര്യബസുകള്‍ ഓടാത്ത പ്രദേശങ്ങളിലേയ്‌ക്ക് മാത്രം കെഎസ്ആര്‍ടിസി ഓര്‍ഡിനറി ബസുകള്‍ പരിമിതപ്പെടുത്തണമെന്ന നിര്‍ദ്ദേശമാണ് പഠന റിപ്പോര്‍ട്ട് സൂചിപ്പിക്കുന്നത്.
