വൈദ്യുതി ഇല്ല ഇവര്ക്ക് റാന്തല് വെളിച്ചം……… സമ്പൂര്ണ്ണ വൈദ്യുതീകരണ പ്രഖ്യാപന വേദിക്കു മുന്നില് വിലങ്ങാട് ആദിവാസി കോളനിയിലെ വീട്ടുകാര്ക്ക് യുവമോര്ച്ചയുടെ നേതൃത്വത്തില് സംസ്ഥാന പ്രസിഡന്റ് അഡ്വ. കെ.പി. പ്രകാശ് ബാബു റാന്തല് വിളക്ക് നല്കുന്നു.
കോഴിക്കോട്: കേരളം സമ്പൂര്ണ്ണമായി വൈദ്യുതീകരിച്ചുവെന്ന ഇടതു സര്ക്കാറിന്റെ അവകാശവാദത്തിലെ പൊള്ളത്തരം തുറന്നുകാട്ടി യുവമോര്ച്ചയുടെ പ്രതിഷേധ റാന്തല്. കോഴിക്കോട് ജില്ലയിലെ വാണിമേല് പഞ്ചായത്തിലെ വിലങ്ങാട് കമ്പിളിപ്പാറ കോളനിയില് താമസിക്കുന്ന ആറ് ആദിവാസി കുടുംബങ്ങള്ക്ക് പ്രതീകാത്മകമായി റാന്തല് നല്കിയാണ് യുവമോര്ച്ച സംസ്ഥാന സര്ക്കാറിന്റെ അവകാശവാദത്തിനെതിരെ പ്രതികരിച്ചത്.
കോളനിയിലെ വൈദ്യുതീകരണ പ്രവൃത്തി യുവമോര്ച്ച ഏറ്റെടുക്കുന്നതായി യുവമോര്ച്ച സംസ്ഥാന പ്രസിഡന്റ് അഡ്വ. കെ.പി. പ്രകാശ്ബാബു പറഞ്ഞു. വൈദ്യുതീകരണത്തിന്റെ ചെലവിലേക്ക് ആദ്യഗഡു നല്കി. വൈദ്യുതിയെത്താത്ത കമ്പിൡപ്പാറ കോളനിയിലെ ആറ് ആദിവാസി വീടുകളെക്കുറിച്ച് ജന്മഭൂമി കഴിഞ്ഞ ദിവസം വാര്ത്ത പ്രസിദ്ധീകരിച്ചിരുന്നു.
ഉദ്ഘാടന ചടങ്ങിനു വേദിയായ കോഴിക്കോട് ഗവ. മോഡല് ഹൈസ്കൂളിന് മുമ്പില് സംഘടിപ്പിച്ച ചടങ്ങിലാണ് റാന്തല് നല്കിയത്. കോളനിയിലെ രാജു, വെള്ളച്ചി, കറുപ്പന്, റൂബി, കുമ്പ എന്നിവര്ക്ക് പ്രകാശ്ബാബു റാന്തല് നല്കി.
സംസ്ഥാനത്ത് സമ്പൂര്ണ്ണ വൈദ്യുതീകരണമെന്ന മുഖ്യമന്ത്രിയുടെ പ്രഖ്യാപനം പച്ചക്കള്ളവും പ്രഹസനവുമാണെന്ന് പ്രകാശ്ബാബു പറഞ്ഞു. വൈദ്യുതീകരണത്തിനെന്ന് പേര് പറഞ്ഞ് 2000 രൂപ വീതം വാങ്ങിച്ച് ആറു കുടുംബങ്ങളെ വഞ്ചിക്കുകയായിരുന്നു. കേരളത്തില് ആയിരക്കണക്കിന് വെളിച്ചമെത്താത്ത വീടുകള് കാണിച്ചു തരാന് യുവമോര്ച്ച തയ്യാറാണെന്നും ആ വെല്ലുവിളി സ്വീകരിക്കാന് സര്ക്കാര് തയ്യാറുണ്ടോ എന്നും അദ്ദേഹം ചോദിച്ചു.
കോഴിക്കോട് ജില്ലയില് മാത്രം വെളിച്ചമെത്താത്ത നൂറുകണക്കിന് വീടുകള് ഉള്ളപ്പോള് സമ്പൂര്ണ്ണ വൈദ്യുതീകരണ പ്രഖ്യാപനം നടത്തി മുഖ്യമന്ത്രി അപഹാസ്യനായിരിക്കുന്നു. കേന്ദ്രഫണ്ട് ദുര്വിനിയോഗം ചെയ്ത് വന് അഴിമതി ഇക്കാര്യത്തില് നടന്നിട്ടുണ്ടെന്നും അന്വേഷണം ആവശ്യപ്പെട്ട് മുഖ്യമന്ത്രിക്കും കേന്ദ്രത്തിനും യുവമോര്ച്ച പരാതി അയച്ചിട്ടുണ്ടെന്നും അദ്ദേഹം പറഞ്ഞു. പ്രതിഷേധത്തിന് കെ.ടി.വിപിന്, പ്രബീഷ് മാറാട്. ബി. ദിപിന് എന്നിവര് നേതൃത്വം നല്കി.
