ന്യൂദല്ഹി: പ്രധാനമന്ത്രി നരേന്ദ്രമോദി സന്ദര്ശനം നടത്താനിരിക്കെ മാവോയിസ്റ്റ് ഭീകരര് ഒഡീഷ റെയില്വേ സ്റ്റേഷന് ആക്രമിച്ചു. റായ്ഗഡ് ജില്ലയിലെ സാംബല്പൂര് ഡിവിഷനു കീഴിലുള്ള ഡോയ്കലു റെയില്വേ സ്റ്റേഷനിലാണ് നക്സലൈറ്റുകള് ആക്രമണം അഴിച്ചുവിട്ടത്. സ്റ്റേഷന് മാസ്റ്ററുടെ ഓഫീസും കണ്ട്രോള് റൂമും ചരക്കു വാഹനവും 10 -12 പേരടങ്ങുന്ന സംഘം പുലര്ച്ചെ 12.15 ഓടെ ആക്രമിക്കുകയായിരുന്നു. സ്റ്റേഷനിലെ വയര്ലെസ് സെറ്റും ഇവര് മോഷ്ടിച്ചു.
സ്റ്റേഷനിലും പരിസരത്തും പ്രധാനമന്ത്രി നരേന്ദ്രമോദി, ഒഡീഷ മുഖ്യമന്ത്രി നവീന് പട്നായിക് എന്നിവര്ക്കെതിരായ പോസ്റ്ററുകളും പതിച്ചു. സംസ്ഥാന ഭരണ വിഭാഗങ്ങളില് ഒഡിയക്കാരല്ലാത്തവരെ നിയമിക്കുന്നതിനേയും നക്സല് സംഘം വിമര്ശിച്ചിട്ടുണ്ട്. ഒഡീഷ പോലീസ് ഡയറക്ടര് ജനറല് കെ. ബി. സിങ്, ഇന്സ്പെക്ടര് ജനറല് ഡി. എസ് കുട്ടെ. ഡെപ്യൂട്ടി ഇന്സ്പെക്ടര് ജനറല് എസ്. സയ്നി എന്നിവര് മാവോയിസ്റ്റ് ഭീകരര്ക്കെതിയുള്ള അന്വേഷണം എന്ന പേരില് പ്രദേശവാസികളെ പീഡിപ്പിക്കുകയാണെന്നും പോസ്റ്ററുകളില് പറയുന്നുണ്ട്. ആക്രമണത്തെ തുടര്ന്ന് ഇതു വഴിയുള്ള റെയില് ഗതാഗതം താത്കാലികമായി നിര്ത്തിയിരിക്കുകയാണ്. ആക്രമണത്തില് സ്റ്റേഷന് നാശനഷ്ടങ്ങള് ഉണ്ടായതായി സ്റ്റേഷന് മാസ്റ്റര് എസ്. കെ. പരിദ അറിയിച്ചു.
സ്റ്റേഷനിലുണ്ടായിരുന്ന ചരക്ക് ട്രെയിനിന് ചെറിയ നാശ നഷ്ടമുണ്ടായതല്ലാതെ ആക്രമണത്തില് റെയില്വേ ജീവനക്കാര്ക്കും പ്രദേശവാസികള്ക്കും പരിക്കിെല്ലന്ന് റായ്ഗഡ് പോലീസ് സൂപ്രണ്ട് കെ. ശിവ സുബ്രമണി അറിയിച്ചു. അപകടത്തെ തുടര്ന്ന് 13ഓളം ട്രെയിനുകള് റായഗഡ് തിത്ലഗഡ്, മുനിഗുഡ എന്നിവിടങ്ങളിലായി കുടുങ്ങിക്കിടക്കുകയാണ്.
ആക്രമണം സംബന്ധിച്ച് ഡിജിപി കെ. ബി. സിങ്ങിന്റെ നേതൃത്വത്തില് അന്വേഷണത്തിന് ഉത്തരവിട്ടിട്ടുണ്ട്. സിആര്പിഎഫിന്റേയും സ്പെഷ്യല് ഓപ്പറേഷന് ഗ്രൂപ്പിന്റേയും (എസ്ഒജി) നേതൃത്വത്തിലാണ് അന്വേഷണം നടത്തുന്നത്. പ്രദേശത്തു കൂടി സഞ്ചരിക്കുന്ന ചരക്ക് വാഹനങ്ങള് സുരക്ഷാ പരിശോധനയ്ക്ക് വിധേയമാക്കുന്നുണ്ട്. എക്സ്പ്രസ്, പാസഞ്ചര് ട്രെയിനുകളിലേക്ക് അടുത്തു തന്നെ ഇത് വ്യാപിപ്പിക്കുമെന്നും പോലീസ് വൃത്തങ്ങള് അറിയിച്ചു.
