ന്യൂദല്ഹി: വ്യാജ ആരോപണങ്ങള് ഉന്നയിച്ചതിനെ തുടര്ന്ന് നേരിടുന്ന മാനനഷ്ടക്കേസുകളിലെ വക്കീല് ഫീസ് പൊതുഖജനാവില് നിന്ന് അടയ്ക്കാന് ദല്ഹി മുഖ്യമന്ത്രി അരവിന്ദ് കെജ്രിവാളിന്റെ നീക്കം.
അഭിഭാഷകനായ രാംജത്മലാനിക്ക് നല്കാനുള്ള 3.86 കോടി രൂപ ഖജനാവില് നിന്ന് അടയ്ക്കാനുള്ള ഉപമുഖ്യമന്ത്രി മനീഷ് സിസോദിയയുടെ ശ്രമം ലഫ്. ഗവര്ണ്ണര് തടഞ്ഞു. സംഭവം പുറത്തു വന്നത് കെജ്രിവാളിനും ആംആദ്മി പാര്ട്ടിക്കും വലിയ നാണക്കേടായി.
സിവില് അപകീര്ത്തിക്കേസില് രാംജത് മലാനിയാണ് കെജ്രിവാളിന്റെ അഭിഭാഷകന്. ദല്ഹിയിലെ വിവിധ കോടതികളില് കേന്ദ്രധനമന്ത്രി അരുണ് ജെയ്റ്റ്ലി അടക്കം നിരവധി നേതാക്കള് കെജ്രിവാളിന്റെ വ്യാജ ആരോപണങ്ങള്ക്കെതിരെ കേസുകള് കൊടുത്തിട്ടുണ്ട്.
കേസേറ്റെടുക്കാന് ഒരു കോടി രൂപയും ഓരോ സിറ്റിംഗിനും 22 ലക്ഷം രൂപയും വീതമാണ് രാംജത് മലാനിയുടെ ഫീസ്. 14 തവണയാണ് രാംജത്മലാനി കെജ്രിവാളിന് വേണ്ടി ഹാജരായത്. വ്യക്തിപരമായ കേസ് നടത്തിപ്പിനായി ഇത്ര ഉയര്ന്ന തുക ചെലവഴിക്കുന്നതിന് പുറമേ അതു സര്ക്കാര് ഖജനാവില് നിന്ന് എടുക്കാനുമാണ് കെജ്രിവാള് ശ്രമിച്ചിരിക്കുന്നത്.
കഴിഞ്ഞ ഡിസംബറില് ഇറക്കിയ സിസോദിയയുടെ ഉത്തരവിന്റെ ഫയലില് ഇതു ലഫ്. ഗവര്ണ്ണറെ കാണിക്കരുതെന്നും നിര്ദ്ദേശിച്ചിട്ടുണ്ട്.
എന്നാല് പൊതുഭരണ വിഭാഗം എതിര്ത്തതോടെ ലഫ്. ഗവര്ണ്ണര് അറ്റോര്ണി ജനറലുടെ നിയമോപദേശം തേടിയിട്ടുണ്ട്. ചാരപ്പണിക്കായി പ്രത്യേക ഏജന്സിയെ നിയോഗിച്ച് അമ്പതിനായിരം രൂപ വീതം പൊതുഖജനാവില് നിന്ന് ചെലവഴിക്കുന്ന വാര്ത്ത കഴിഞ്ഞയാഴ്ച പുറത്തുവന്നിരുന്നു. യാതൊരു ജോലിയും ചെയ്യാതെ ചാരപ്പണിക്കാര്ക്ക് തുക അനുവദിക്കുന്നത് ലഫ്. ഗവര്ണ്ണര് തടഞ്ഞിട്ടുണ്ട്.
