ലണ്ടന്: ഇംഗ്ലീഷ് പ്രീമിയര് ലീഗിലെ സൂപ്പര് സണ്ഡേയില് ആഴ്സണലും മാഞ്ചസ്റ്റര് സിറ്റിയും സമനിലയില് പിരിഞ്ഞു. ഇരുടീമുകളും രണ്ട് ഗോളുകള് വീതം നേടി. രണ്ട് തവണ പിന്നിട്ടുനിന്നശേഷമാണ് സ്വന്തം തട്ടകത്തില് ആഴ്സണല് സമനില പിടിച്ചത്. സമനിലയില് കലാശിച്ചതോടെ ലിവര്പൂളിനെ പിന്തള്ളി മൂന്നാമതെത്താനുള്ള അവസരം മാഞ്ചസ്റ്റര് സിറ്റിയും യുണൈറ്റഡിനെ പിന്നിലാക്കി അഞ്ചാമതെത്താനുള്ള അവസരം ആഴ്സണലിനും നഷ്ടമായി.
എമിറേറ്റ്സ് സ്റ്റേഡിയത്തില് നടന്ന പോരാട്ടത്തില് മാഞ്ചസ്റ്റര് സിറ്റിക്കായിരുന്നു മുന്തൂക്കം. പന്തടക്കത്തിലും ഷോട്ടുകള് പായിക്കുന്നതിലും അവര് എതിരാളികളേക്കാള് മുന്നിട്ടുനിന്നു. കളിയുടെ അഞ്ചാം മിനിറ്റില് തന്നെ സിറ്റി ലീഡ് നേടി. സ്വന്തം പകുതിയില് നിന്ന് കെവിന് ഡി ബ്രൂയന് നീട്ടി നല്കിയ പാസ് ഓടിപ്പിടിച്ചെടുത്ത ലിറോയ് സാനേ ഒരു ആഴ്സണല് പ്രതിരോധനിര താരത്തേയും മുന്നോട്ടുകയറിവന്ന ഗോളിയെയും മറികടന്ന് ഉജ്ജ്വലമായി വലയിലെത്തിച്ചു.
പിന്നീട് 10-ാം മിനിറ്റില് ബ്രൂയന്റെ ഷോട്ട് പോസ്റ്റില്ത്തട്ടിതെറിച്ചത് വലയിലെത്തിക്കാനുള്ള ഡേവിഡ് സില്വയുടെ ശ്രമം ഗോളി പരാജയപ്പെടുത്തി. 21-ാം മിനിറ്റില് ആഴ്സണലിന് ഗോള് മടക്കാന് അവസരം ലഭിച്ചു. എന്നാല് മെസ്യൂട്ട് ഓസിലിന്റെ ഷോട്ടിന് സിറ്റി ഗോളിയെ കീഴടക്കാന് കഴിഞ്ഞില്ല. പിന്നീട് 40-ാം മിനിറ്റില് ആഴ്സണല് സമനില പിടിച്ചു. സ്കോഡ്രാന് മുസ്താഫി തലകൊണ്ട് മറിച്ചു നല്കിയ പാസ് വലം കാലന് ഷോട്ടിലൂടെ തിയോ വാല്ക്കോട്ട് ലക്ഷ്യത്തിലെത്തിച്ചു. എന്നാല് സമനില പിടിച്ചതിന്റെ ആഹ്ലാദം ആഴ്സണല് ക്യാമ്പില് ഏറെ നീണ്ടുനിന്നില്ല. രണ്ട് മിനിറ്റിനുശേഷം സിറ്റി വീണ്ടും ലീഡ് നേടി. ഡേവിഡ് സില്വയുടെ പാസില് നിന്ന് സെര്ജിയോ അഗ്യൂറോയാണ് ലക്ഷ്യം കണ്ടത്. ഇതോടെ ആദ്യപകുതിയില് സിറ്റി 2-1ന് മുന്നില്.
രണ്ടാം പകുതി ആരംഭിച്ച് എട്ട് മിനിറ്റായപ്പോഴേക്കും ആഴ്സണല് രണ്ടാമതും സമനില ഗോള് നേടി. മെസ്യൂട്ട് ഓസില് എടുത്ത കോര്ണര് കിക്കിന് ഉയര്ന്നുചാടി തലവെച്ച മുസ്താഫിയാണ് ടീമിന്റെ സമനില ഗോള് നേടിയത്. തുടര്ന്ന് ഇരുടീമുകളും മികച്ച മുന്നേറ്റങ്ങള് നടത്തിയെങ്കിലും കൂടുതല് ഗോളുകള് പിറക്കാതിരുന്നതോടെ കളി സമനിലയില് സമാപിച്ചു.
മറ്റൊരു മത്സരത്തില് സ്വാന്സീ സിറ്റിയും മിഡിസില്ബറോയും ഗോള്രഹിത സമനിലയില് പിരിഞ്ഞു.
