മ്യൂണിക്ക്: ചാമ്പ്യന്സ് ലീഗ് ഫുട്ബോളില് ഇന്ന് സൂപ്പര് പോരാട്ടം. നിലവിലെ ചാമ്പ്യന്മാരായ റയല് മാഡ്രിഡും മുന് ചാമ്പ്യന്മാരും ജര്മ്മന് ലീഗ് ജേതാക്കളുമായ ബയേണ് മ്യൂണിക്കും തമ്മിലാണ് സൂപ്പര് പോരാട്ടത്തില് കൊമ്പുകോര്ക്കുന്നത്. മ്യൂണിക്കിലെ അലയന്സ് അരീനയിലാണ് ഒന്നാം പാദ ക്വാര്ട്ടര് ഫൈനല് പോരാട്ടം.സ്പെയിനില് റയല് മാഡ്രിഡും ജര്മ്മനിയില് ബയേണും ലീഗ് കിരീടം നേടുന്നതിനുള്ള കുതിപ്പ് തുടരുകയാണ്.
2014-ല് ഇരുടീമുകളും സെമിഫൈനലില് ഏറ്റുമുട്ടിയിരുന്നു. അന്ന് ഇരുപാദങ്ങളിലുമായി 5-0ന്റെ വിജയം നേടിയ റയല് മാഡ്രിഡ് ഫൈനലില് നാട്ടുകാരായ അത്ലറ്റികോയെ പരാജയപ്പെടുത്തി കിരീടവും ചൂടി. സെമിയില് സ്വന്തം മൈതാനമായ സാന്റിയാഗോ ബെര്ണാബ്യൂവിലെ ആദ്യ പാദത്തില് 1-0ന്റെ വിജയം നേടിയ റയല് മ്യൂണിക്കിലെ അലയന്സ് അരീനയില് നടന്ന കളിയില് 4-0ന്റെ വിജയവും സ്വന്തമാക്കി.
ക്രിസ്റ്റിയാനോ റൊണാള്ഡോ, ഗരെത്ത് ബെയ്ല്, കരിം ബെന്സേമ, ജെയിംസ് റോഡ്രിഗസ് എന്നിരാണ് ടീമിന്റെ കരുത്തര്. ക്രിസ്റ്റിയാനോയും ബെയ്ലും ബെന്സേമയും ആദ്യ ഇലവനില് ഇറങ്ങും. പകരക്കാരുടെ നിരയിലായിരിക്കും റോഡ്രിഗസിനും ആല്വാരോ മൊറാട്ട എന്നിവരുള്പ്പെടെയുള്ളവരുടെ സീറ്റ്. സെര്ജിയോ റാമോസ്, മാഴ്സെലോ, കാര്വാജല് എന്നിവരടങ്ങിയ പ്രതിരോധവും ടോണി ക്രൂസ്, ലൂക്കാ മോഡ്രിച്ച്, കാസെമിറോ എന്നിവരടങ്ങിയ മധ്യനിരയും റയലിന്റെ സാധ്യതകള് വര്ധിപ്പിക്കുന്നു.
റോബര്ട്ടോ ലെവന്ഡോവ്സ്കി, ആര്യന് റോബന്, ഫ്രാങ്ക് റിബറി എന്നിവരാണ് ബയേണ് ആക്രമണത്തിന്റെ കുന്തമുനകള്. ക്യാപ്റ്റന് ഫിലിപ്പ് ലാം നായകത്വം വഹിക്കുന്ന പ്രതിരോധനിര റയല് മുന്നേറ്റത്തെ പിടിച്ചുകെട്ടാന് കെല്പുള്ളവരാണ്. ലാമിന് പുറമെ ബോട്ടെങ്, റാഫീഞ്ഞ, മാറ്റ് ഹമ്മല്സ് എന്നിവരും ഉള്പ്പെടുമ്പോള് റൊണാള്ഡോയും കൂട്ടരും വിഷമിക്കുമെന്ന് ഉറപ്പ്. മധ്യനിരയില് സാബി അലോണ്സോ, ജാവി മാര്ട്ടിനസ്, ആര്ട്ടുറോ വിദാല് തുടങ്ങിയവരും എതിരാളികളുടെ നോട്ടപ്പുള്ളികളാകും.
ഇരു ടീമുകളും തമ്മില് 23-ാം തവണയാണ് ഏറ്റുമുട്ടാനിറങ്ങുന്നത്. മുന്പ് 22 കളികളില് 11 എണ്ണത്തില് വിജയം ബയേണിനൊപ്പം നിന്നപ്പോള് റയലിന് 9 എണ്ണത്തിലേ വിജയിക്കനായുള്ളൂ. രണ്ടെണ്ണം സമനിലയില് കലാശിക്കുകയും ചെയ്തു. എതിര്തട്ടകത്തില് ചെന്ന് വിജയം നേടി സെമിഫൈനല് ഉറപ്പിക്കാന് റയലും സ്വന്തം മൈതാനത്ത് റയലിനെതിരെ മികച്ച വിജയം നേടാന് ബയേണും ഇറങ്ങുമ്പോള് വാശിയേറിയ പോരാട്ടം പ്രതീക്ഷിക്കാം.
മറ്റൊരു മത്സരത്തില് നിലവിലെ റണ്ണേഴ്സപ്പുകളായ അത്ലറ്റികോ മാഡ്രിഡ് പ്രീമിയര് ലീഗ് ടീമായ ലെസ്റ്റര് സിറ്റിയുമായി ഏറ്റുമുട്ടും. ടൂര്ണമെന്റില് ആദ്യമായി കളിക്കാെനത്തി ക്വാര്ട്ടറിലെത്തി ചരിത്രം സൃഷ്ടിച്ചാണ് ലെസ്റ്ററിന്റെ വരവ്.
