സിംഗപ്പൂര് സിറ്റി: ഇന്ത്യന് ബാഡ്മിന്റണിലെ സൂപ്പര് താരം പി.വി. സിന്ധുവും ഒളിമ്പിക്സ് സ്വര്ണ്ണമെഡല് ജേത്രി സ്പെയിനിന്റെ കരോലിന മാരിനും വീണ്ടും നേര്ക്കുനേര്. സിംഗപ്പൂര് ഓപ്പണ് സൂപ്പര് സീരീസിന്റെ ക്വാര്ട്ടര് ഫൈനലിലാണ് രണ്ട് സൂപ്പര് താരങ്ങള് വീണ്ടും മുഖാമുഖം എത്തുന്നത്.
ഇന്നലെ നടന്ന രണ്ടാം റൗണ്ട് മത്സരത്തില് ഇന്തോനേഷ്യയുടെ ഫിട്രിയാനിയെ മൂന്ന് ഗെയിം നീണ്ട വാശിയേറിയ പോരാട്ടത്തിനൊടുവില് കിഴടക്കിയാണ് സിന്ധു ക്വാര്ട്ടറിലേക്ക് കുതിച്ചത്. ഒരു മണിക്കൂര് നീണ്ട മത്സരത്തിനൊടുവില് 19-21, 21-17, 21-8 എന്ന സ്കോറിനായിരുന്നു സിന്ധുവിന്റെ വിജയം. ആദ്യ ഗെയിം നഷ്ടപ്പെട്ടശേഷമാണ് സിന്ധു വിജയം പിടിച്ചെടുത്തത്. ചൈനീസ് തായ്പേയിയുടെ ചിയാ സിന് ലീയെ 27 മിനിറ്റ് മാത്രം നീണ്ട മത്സരത്തിനൊടുവില് 21-7, 21-11 എന്ന സ്കോറിന് പരാജയപ്പെടുത്തിയാണ് സ്പാനിഷ് താരം കരോലിന ക്വാര്ട്ടറിലെത്തിയത്. ഇക്കഴിഞ്ഞ ഇന്ത്യന് സൂപ്പര് സീരീസിന്റെ ഫൈനലില് കരോലിന മാരിനെ പരാജയപ്പെടുത്തി സിന്ധു കിരീടം നേടിയിരുന്നു.
പുരുഷ വിഭാഗത്തില് ഇന്ത്യയുടെ സായിപ്രണീത്, മിക്സഡ് ഡബിള്സില് അശ്വിനി പൊന്നപ്പ-സുമീത് റെഡ്ഡി സഖ്യവും ക്വാര്ട്ടറിലെത്തി. സായിപ്രണീത് ചൈനയുടെ ക്വിയാവോ ബിനിനെ 21-15, 21-23, 21-16 എന്ന ഗെയിമുകള്ക്ക് പരാജയപ്പെടുത്തിയാണ് അവസാന എട്ടില് ഇടംപിടിച്ചത്. മിക്സഡ് ഡബിള്സില് ദക്ഷിണ കൊറിയയുടെ ജി ഹ്വാന് കിം-ലീ സോ ഹീ സഖ്യത്തെ 17-21, 21-17, 21-16 എന്ന സ്കോറിന് പരാജയപ്പെടുത്തിയാണ് അശ്വിനി-സുമീത് സഖ്യം ക്വാര്ട്ടറിലെത്തിയത്.
