ചേര്ത്തല: മാലിന്യത്തൊട്ടിയായി നഗരസഭ മാര്ക്കറ്റ്, നവീകരണത്തിനായി അനുവദിച്ച ലക്ഷങ്ങള് രാഷ്ട്രീയ ഉദ്യോഗസ്ഥ കൂട്ടുകെട്ട് പങ്കിട്ടെടുത്തതാണ് മാലിന്യം കുന്നുകൂടുന്നതിന് കാരണമെന്ന് ആക്ഷേപം. ഇവിടം ശുചീകരിക്കുന്നതിനായി നഗരസഭ ജീവനക്കാരെ ചുമതലപ്പെടുത്തിയിട്ടുണ്ടെങ്കിലും ഇവരുടെ പ്രവര്ത്തനം വഴിപാടായി മാറുന്നെന്നാണ് വിമര്ശനം.
വയലാര് രവി എംപിയുടെ ഫണ്ടില് നിന്ന് 25 ലക്ഷം രൂപ നവീകരണ പ്രവര്ത്തനങ്ങള്ക്കായി അനുവദിച്ചിരുന്നെങ്കിലും തുകയുടെ നാലില് ഒരു ഭാഗം പോലും നിര്മാണ പ്രവര്ത്തനങ്ങള്ക്കായി വിനിയോഗിച്ചില്ലെന്ന് ആരോപണം ഉയര്ന്നിരുന്നു. മാര്ക്കറ്റിനുളളിലെ തറനിരപ്പ് ഉയര്ത്തിയതോടെ മാലിന്യങ്ങള് നാല് പാടേക്കും ഒഴുകുന്ന സ്ഥിതിയായി.
ഗതാഗത തിരക്കേറിയ തെക്കേ അങ്ങാടിക്കവലയ്ക്ക് പടിഞ്ഞാറ് ഭാഗത്തെ ബസ് സ്റ്റോപ്പില് യാത്രക്കാര് മൂക്ക് പൊത്തി നില്ക്കേണ്ട സ്ഥിതിയാണ്. പ്രതിദിനം മാര്ക്കറ്റിലെത്തുന്ന നൂറ് കണക്കിന് ആള്ക്കാര് മാലിന്യം ചവിട്ടിയാണ് നടക്കുന്നത്.
മഴപെയ്തു കഴിഞ്ഞാല് സമീപത്തെ വീടുകളിലേക്കടക്കം മാലിന്യം പരന്നൊഴുകും. മത്സ്യ, മാംസാവശിഷ്ടങ്ങള് ഒഴുകുന്നത് സമീപത്തെ ശുദ്ധജല സ്രോതസുകളും മലിനമാക്കി. യഥാസമയം ശുചീകരണപ്രവര്ത്തനങ്ങള് നടത്താത്തതിനാല് മാര്ക്കറ്റിലെ വ്യാപാരസ്ഥാപനങ്ങള്, ഹോട്ടലുകള്, കോഴിക്കടകള് എന്നിവിടങ്ങളില് നിന്നുള്ള അവശിഷ്ടങ്ങളും കുന്നുകൂടി.
അഞ്ഞൂറിലധികം തൊഴിലാളികള് ജോലി ചെയ്യുന്ന ഇവിടെ കംഫര്ട്ട് സ്റ്റേഷന് അടക്കം പ്രവര്ത്തിക്കുന്നത് വൃത്തിഹീനമായ സാഹചര്യത്തിലാണ്. ഇത് കടുത്ത ആരോഗ്യപ്രശ്നങ്ങളാണ് സൃഷ്ടിക്കുന്നത്.
