ഹിന്ദുഐക്യവേദി സംഘടിപ്പിച്ച മാറാട് അനുസ്മരണ സമ്മേളനം ആര്എസ്എസ് പ്രാന്ത
സഹകാര്യവാഹ് എം. രാധാകൃഷ്ണന് ഉദ്ഘാടനം ചെയ്യുന്നു. എം. പ്രേമാനന്ദന്, അഡ്വ. എ.സി.
അംബിക, കെ. ഷൈനു, ചേറ്റൂര് മാധവന്, അഡ്വ. ബി.എന്. ബിനേഷ് ബാബു, എ. അംബുജന്
എന്നിവര് സമീപം
കോഴിക്കോട്: ഉറ്റവര് കൊലചെയ്യപ്പെട്ടിട്ടും സംയമനം പാലിച്ചുകൊണ്ട്, ഭരണഘടനാനുസൃതമായി ജനാധിപത്യ ക്രമം അനുവദിച്ച മാര്ഗ്ഗങ്ങളിലൂടെ പോരാടിയ ഹൈന്ദവ സംഘടനകളുടെയും ഹിന്ദു സമൂഹത്തിന്റെയും വിജയമാണ് മാറാട് സിബിഐ അന്വേഷണ പ്രഖ്യാപനത്തിലൂടെ ഉണ്ടായതെന്ന് ആര്എസ്എസ് സഹ പ്രാന്തകാര്യവാഹ് എം. രാധാകൃഷ്ണന് പറഞ്ഞു.
2003 മെയ് രണ്ടിന് മാറാട് നടന്ന കൂട്ടക്കൊലയില് ബലിദാനികളായവരെ അനുസ്മരിക്കാന് ഹിന്ദു ഐക്യവേദി സംഘടിപ്പിച്ച ശ്രദ്ധാഞ്ജലി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കേരളത്തില് നടന്ന സമരങ്ങളുടെ ചരിത്രത്തില് മുഴുവന് ആവശ്യങ്ങളും നേടിയെടുത്ത പ്രക്ഷോഭമായി ഇതറിയപ്പെടും. സിബിഐ അന്വേഷണമെന്ന ആവശ്യത്തെ എല്ലാ അര്ത്ഥത്തിലും എതിര്ത്തവര് ഇന്ന് അതിന്റെ വക്താക്കളായി വരുന്നതും പ്രക്ഷോഭത്തിന്റെ വിജയമാണ്.
എല്ഡിഎഫും യുഡിഎഫും സിബിഐ അന്വേഷണ ആവശ്യത്തെ അട്ടിമറിക്കാന് ഒന്നിച്ചണിനിരന്നു. അന്വേഷണം നടത്താനാവില്ലെന്ന സിബിഐയുടെ നിലപാടു മാറ്റമാണ് ഹൈക്കോടതിയില് അനുകൂല വിധിയുണ്ടാകാന് സുപ്രധാന കാരണം. തങ്ങളുടെ രാഷ്ട്രീയാവശ്യത്തിന് സിബിഐയെ സമ്മര്ദ്ദത്തിലാക്കിയ യുപിഎ ഭരണകൂടം കേന്ദ്രത്തില് നിര്ണ്ണായക സ്വാധീനമുള്ള മുസ്ലിം ലീഗിന്റെ ആവശ്യത്തിന് പിന്തുണ നല്കുകയായിരുന്നു.
വ്യാജ ബിംബങ്ങളെ സൃഷ്ടിച്ച് വസ്തുതകള് മറച്ചുവെക്കാന് ശ്രമിക്കുന്നവര് മാറാട് പ്രക്ഷോഭ ചരിത്രത്തെ വളച്ചൊടിക്കാന് ശ്രമിക്കുകയാണ്. ആയുധ ബലവും വന് സാമ്പത്തിക പിന്തുണയും അന്താരാഷ്ട്ര ബന്ധങ്ങളുമുള്ള ശക്തികള്ക്കെതിരായ പോരാട്ടത്തില് ഒരുമിച്ചു നിന്നാല് വിജയിക്കാമെന്ന പാഠമാണ് മാറാട് നല്കുന്നത്. രാഷ്ട്രീയക്കാരുടെയും ബുദ്ധിജീവികളുടെയും മാധ്യമങ്ങളുടെയും വ്യാജ മുഖംമൂടികള് കേരളത്തിന് മനസ്സിലാക്കിക്കൊടുക്കാന് മാറാട് പ്രക്ഷോഭത്തിന് കഴിഞ്ഞു. അദ്ദേഹം പറഞ്ഞു.
ഹിന്ദുഐക്യവേദി സംസ്ഥാന വൈസ് പ്രസിഡന്റ് അഡ്വ. എ.സി. അംബിക അദ്ധ്യക്ഷത വഹിച്ചു. സംസ്ഥാന സെക്രട്ടറി കെ. ഷൈനു ആമുഖപ്രഭാഷണം നടത്തി. മാറാട് അരയസമാജം പ്രസിഡന്റ് എ. അംബുജന്, ചേറ്റൂര് മാധവന്, അഡ്വ. ബി.എന്. ബിനേഷ് ബാബു, ബൈജു കൂമുള്ളി, ടി.പി. അനില്കുമാര്, എം. പ്രേമാനന്ദ്, എന്നിവര് പങ്കെടുത്തു.
ഇന്നലെ രാവിലെ ഏഴു മണിക്ക് മാറാട് നടന്ന ശ്രദ്ധാഞ്ജലി ചടങ്ങില് എം. രാധാകൃഷ്ണന്, കെ. വാസുദേവന്, എ. അംബുജന്, ബിജെപി ജില്ലാ പ്രസിഡന്റ് ടി.പി. ജയചന്ദ്രന്, മത്സ്യ പ്രവര്ത്തക സംഘം സംസ്ഥാന വൈസ് പ്രസിഡന്റ് എന്. പി. രാധാകൃഷ്ണന് തുടങ്ങിയവര് സംബന്ധിച്ചു.
