ഹൈദരാബാദ്: ചാമ്പ്യന്സ്ലീഗ് ട്വന്റി 20 ക്രിക്കറ്റിന്റെ ഗ്രൂപ്പ് ഘട്ടത്തിലെ ആദ്യ കളിയില് കൊല്ക്കത്ത നൈറ്റ് റൈഡേഴ്സിന് അപ്രതീക്ഷിത വിജയം. പരാജയത്തിന്റെ വക്കത്തുനിന്നാണ് ഗംഭീറിന്റെ പോരാളികള് വിജയം പിടിച്ചെടുത്തത്. 25 പന്തില് നിന്ന് 58 റണ്സ് നേടിയ റസ്സലിന്റെയും പുറത്താകാതെ 51 റണ്സ് നേടിയ റയന് ടെന് ഡസ്ചേറ്റിന്റെയും ഉജ്ജ്വല ഇന്നിംഗിന്റെ കരുത്തിലാണ് കൊല്ക്കത്ത വിജയം കരസ്ഥമാക്കിയത്. 21 റണ്സിന് നാല് വിക്കറ്റ് വീഴ്ത്തിയ മുന് ഇന്ത്യന് ബൗളര് ആശിഷ് നെഹ്റക്കും ധോണിപ്പടയെ അപ്രതീക്ഷിത പരാജയത്തില് നിന്ന് രക്ഷിക്കാനായില്ല. ആദ്യം ബാറ്റ് ചെയ്ത ചെന്നൈ സൂപ്പര് കിംഗ്സ് 20 ഓവറില് നാല് വിക്കറ്റ് നഷ്ടത്തില് 157 റണ്സെടുത്തു. മറുപടി ബാറ്റിംഗിനിറങ്ങിയ കൊല്ക്കത്ത നൈറ്റ് റൈഡേഴ്സ് 7 വിക്കറ്റ് നഷ്ടത്തില് ഒരു ഓവര് ബാക്കിനില്ക്കേ 159 റണ്സെടുത്താണ് വിജയം നേടിയത്. റസ്സലാണ് മാന് ഓഫ് ദി മാച്ച്.
ടോസ് നേടിയ കൊല്ക്കത്ത നായകന് ഗംഭീര് എതിരാളികളെ ബാറ്റിംഗിനയച്ചു. ഓപ്പണര്മാരായ സ്മിത്തും (20), ബ്രണ്ടന് മക്കല്ലവും (22) ചേര്ന്ന് ഭേദപ്പെട്ട തുടക്കവും ടീമിന് നല്കി. സുരേഷ് റെയ്ന 28 റണ്സെടുത്തപ്പോള് ക്യാപ്റ്റന് ധോണി പുറത്താകാതെ നേടിയ 35 റണ്സും ബ്രാവോ (28 നോട്ടൗട്ട്)യും നടത്തിയ പ്രകടനമാണ് ചെന്നൈ സ്കോര് 157-ല് എത്തിച്ചത്.
തുടര്ന്ന് മറുപടി ബാറ്റിംഗ് ആരംഭിച്ച കൊല്ക്കത്ത നൈറ്റ് റൈഡേഴ്സ് മുന്നിര ചീട്ടുകൊട്ടാരം കണക്കെ തകര്ന്നടിയുന്നതാണ് കണ്ടത്. സ്കോര്ബോര്ഡില് 51 റണ്സായപ്പോഴേക്കും അഞ്ച് മുന്നിര വിക്കറ്റുകള് വീണു. ആശിഷ് നെഹ്റയാണ് കൊല്ക്കത്ത മുന് നിരയെ തകര്ത്തത്. മന്വീന്ദര് ബിസ്ല (2), ഗംഭീര് (6), മനീഷ് പാണ്ഡെ (0), സൂര്യകുമാര് യാദവ് (19) എന്നിവരെ നെഹ്റയും യൂസഫ് പഠാനെ (1) മോഹിത് ശര്മ്മയും പുറത്താക്കി. പിന്നീട് റയന് ടെന് ഡസ്ചേറ്റിയും റസ്സലും ചേര്ന്ന് ചെന്നൈയെ വിറപ്പിക്കുന്നതാണ് കണ്ടത്. ഒടുവില് വിജയത്തിന് 27 റണ്സ് അകലെ വച്ച് 25 പന്തില് നിന്ന് നാല് ഫോറും അഞ്ച് സിക്സറുമടക്കം 58 റണ്സെടുത്ത റസ്സല് മടങ്ങി. ഇതോടെ ചെന്നൈയുടെ വിജയപ്രതീക്ഷകള് വീണ്ടും സജീവമായി. എന്നാല് റയന് ടെന് ഡസ്ചേറ്റിയുടെ മികച്ച പ്രകടനം കൊല്ക്കത്തയെ വിജയത്തിലെത്തിച്ചു.
