ന്യൂദല്ഹി: എന്ഡിഎ സര്ക്കാര് മൂന്നുവര്ഷം പൂര്ത്തിയാക്കുമ്പോള് യൂറോപ്പ്യന് രാജ്യങ്ങളുമായുള്ള വാണിജ്യ, വ്യാപാര ബന്ധം കൂടുതല് ശക്തമാക്കാന് ലക്ഷ്യമിട്ട് പ്രധാനമന്ത്രി നരേന്ദ്രമോദിയുടെ വിദേശ സന്ദര്ശനത്തിന് 29ന് തുടക്കം. ജര്മ്മനി, സ്പെയിന് എന്നീ യൂറോപ്യന് രാജ്യങ്ങള്ക്ക് പുറമേ റഷ്യയില് നടക്കുന്ന സെന്റ്പീറ്റേഴ്സ്ബര്ഗ് ഇന്റര്നാഷണല് എക്കണോമിക് ഫോറത്തിലും മോദി പ്രസംഗിക്കും.
30ന് ജര്മ്മനിയിലെത്തുന്ന മോദി ചാന്സലര് അംഗല മെര്ക്കലുമായി കൂടിക്കാഴ്ച നടത്തും. ഇരുരാജ്യങ്ങളും തമ്മിലുള്ള വാണിജ്യ ബന്ധം കൂടുതല് ദൃഢമാക്കാനുള്ള തീരുമാനം രാഷ്ട്രത്തലവന്മാരുടെ യോഗത്തിലുണ്ടാകും. ജര്മ്മന് ബിസിനസ് സമൂഹവുമായും മോദി ചര്ച്ച നടത്തും. 31ന് സ്പെയിനിലും പ്രധാനമന്ത്രി സന്ദര്ശനം നടത്തും.
ജൂണ് 1ന് സെന്റ് പീറ്റേഴ്സ്ബര്ഗ്ഗിലെത്തുന്ന പ്രധാനമന്ത്രി റഷ്യന് പ്രസിഡന്റ് വ്ളാഡമിന് പുടിനുമായി ചര്ച്ച നടത്തും. ഉഭയകക്ഷി ബന്ധത്തില് കൂടുതല് സഹകരണ പദ്ധതികള് നടപ്പാക്കാന് ചര്ച്ചയില് തീരുമാനിക്കും. പ്രതിരോധ, ആണവ, വാണിജ്യ, നിക്ഷേപ മേഖലകളിലെ സഹകരണം ചര്ച്ചയാകും. പാക്കിസ്ഥാനുമായും ചൈനയുമായും കൂടുതല് സഹകരിക്കാനുള്ള റഷ്യയുടെ ആലോചനകള്ക്കെതിരായ ഇന്ത്യയുടെ ആശങ്കകള് മോദി-പുടിന് കൂടിക്കാഴ്ചയില് ഇന്ത്യ പങ്കുവെയ്ക്കും.
തിരികെ ഇന്ത്യയിലെത്തുന്ന പ്രധാനമന്ത്രി ജൂണ് 7-8 തീയതികളില് കസാക്കിസ്ഥാനിലെ അസ്താനയില് നടക്കുന്ന ഷാങ്ഹായ് കോര്പ്പറേഷന് ഓര്ഗനൈസേഷന് യോഗത്തിലേക്കും യാത്ര തിരിക്കും. റഷ്യ, ചൈന, കസാക്കിസ്ഥാന്, കിര്ഗിസ്ഥാന്, താജിക്കിസ്ഥാന്, ഉസ്ബെക്കിസ്ഥാന്, പാക്കിസ്ഥാന് തുടങ്ങിയ രാജ്യങ്ങളുടെ തലവന്മാര് ഉച്ചകോടിയില് പങ്കെടുക്കും.
ജൂണ് അവസാനത്തോടെയോ ജൂലൈ ആദ്യവാരത്തോടെയോ പ്രധാനമന്ത്രി യുഎസ്, ഇസ്രയേല് സന്ദര്ശനത്തിനും തയ്യാറെടുക്കുന്നുണ്ട്. മോദി-ട്രംപ് കൂടിക്കാഴ്ചയും പ്രധാനമന്ത്രിയുടെ ഇസ്രയേല് സന്ദര്ശനവും ഏറെ പ്രാധാന്യമുള്ളതാണ്.
