ദുരന്തം ഒഴിവായത് ആര്എസ്എസ് പ്രവര്ത്തകന്റെ അവസരോചിതമായ ഇടപെടല്
മാവേലിക്കര: വഴുവാടി കടവില് വള്ളം മറിഞ്ഞു കടത്തുകാരനും അഞ്ചു പേരും വെള്ളത്തില് വീണു. ആര്എസ്എസ് പ്രവര്ത്തകന്റെ അവസരോചിതമായ ഇടപെടലില് അഞ്ചുപേരും രക്ഷപെട്ടു.
അച്ചന്കോവിലാറ്റില് തഴക്കര പഞ്ചായത്തിലെ വഴുവാടി കടവില് ഇന്നലെ വൈകിട്ടു മൂന്നരയോടെയാണു സംഭവം. തഴക്കര തോമസ് വില്ലയില് രാജന്, ഭാര്യ കുഞ്ഞമ്മ, വഴുവാടി ആയിക്കാട്ട് ഏലിയാമ്മ, ലത, പനച്ചമൂട്ടില് സാലി, കടത്തുകാരന് ശശി എന്നിവരാണു വള്ളം മറിഞ്ഞു വെള്ളത്തില് വീണത്.
ആറിന്റെ മറുകരയില് പെരിങ്ങിലിപ്പുറത്തു നടക്കുന്ന ചടങ്ങില് പങ്കെടുക്കുന്നതിനു കടത്തു കടന്നു പോകുന്നതിനിടെയാണു വള്ളം ഒരു വശത്തേക്കു മറിഞ്ഞത്.
കടത്തുകാരന് ശശി വെള്ളത്തില് വീണവരെ രക്ഷിക്കാന് ശ്രമിക്കുന്നതിനിടെ കുളിക്കാനായി കടവിലെത്തിയ തഴക്കര വഴുവാടി അഭിജിത് ഭവനം ഹരികുമാറിന്റെയും ശ്രീകലയുടെയും മകനായ അഭിജിത് ഹരികുമാര് (19) ആണു വള്ളത്തില് നിന്നും വീണവര്ക്കു രക്ഷകനായത്.
നിലവിളി കേട്ടു അഭിജിത് ആറ്റിലേക്കു എടുത്തു ചാടുകയായിരുന്നു. മുങ്ങിത്താണ രാജന്, ലത എന്നിവരെ അഭിജിത് കരയിലെത്തിക്കുകയായിരുന്നു. അഭിജിതിന്റെ സമയോചിതമായ ഇടപെടലാണു എല്ലാവര്ക്കും ജീവിതത്തിലേക്കു തിരികെയെത്താന് സഹായകമായതെന്നു അപകടത്തില് നിന്നും രക്ഷപ്പെട്ട സാലി പറഞ്ഞു.
ഹരികുമാര് ബിജെപി വഴുവാടി 26-ാം ബൂത്ത് കമ്മറ്റി സെക്രട്ടറിയാണ്. വഴുവാടി ശാഖാ സ്വയംസേവകനായ അഭിജിത്ത് മാവേലിക്കര മെക്സിലെ ബികോം ഒന്നാം വര്ഷ വിദ്യാര്ഥിയാണ്.
വിവരമറിഞ്ഞെത്തിയ പഞ്ചായത്തംഗങ്ങളായ ടി.കെ. മത്തായി, സാലി റെജി, നാട്ടുകാരായ രാജന് തോമസ്, എം.ജോയി, ജോണ് തോമസ്, ഹരികുമാര്, രെജു, സിബിന്, സജി പോളച്ചിറയ്ക്കല്, വിനീത്, രാജേഷ് എന്നിവരുടെ നേതൃത്വത്തില് അനുമോദിച്ചു.
