കവരത്തി ദ്വീപില് മത്സ്യബന്ധന തൊഴിലാളി അബ്ദുറഹിമാന്റെ വീട്ടിലേക്ക് പോകുന്നതിനിടെ വഴിയില് സ്വീകരിക്കാന് നിന്ന കുട്ടികളോട് കുശലം പറഞ്ഞ് അമിത് ഷാ (ചിത്രം – രഞ്ജിത് നാരായണന്)
കവരത്തി: ആര്എസ്എസ്, ബിജെപി പ്രവര്ത്തകര്ക്കെതിരെ കേരളത്തിലെ ഇടതു സര്ക്കാര് പ്രോത്സാഹിപ്പിക്കുന്ന ആക്രമണങ്ങളെ നിയമത്തിന്റെ വഴിയിലും നിയമനിര്മാണ സഭകളിലും തെരുവിലും ചെറുക്കുമെന്ന് ബിജെപി ദേശീയ അധ്യക്ഷന് അമിത്ഷാ. കേരളത്തില് ബിജെപിയുടെ വളര്ച്ചയും പ്രവര്ത്തനവും ലക്ഷ്യം കാണുന്നു. ഇതില് വിറളി പൂണ്ടാണ് ആക്രമണങ്ങള്. തെരഞ്ഞെടുക്കപ്പെട്ട ഒരു സര്ക്കാരിന് ചേര്ന്നതല്ല ഇത്തരം പ്രവര്ത്തനങ്ങളെന്നും അമിത്ഷാ പറഞ്ഞു.
ഇപ്പോള് നടക്കുന്നത് വെറും ക്രമസമാധാന പ്രശ്നങ്ങളല്ല. പതിമൂന്ന് പ്രവര്ത്തകര് കമ്യൂണിസ്റ്റ് ആക്രമണങ്ങളില് കൊല്ലപ്പെട്ടു. ഇത് ഗുരുതര വിഷയമാണ്. ബിജെപിയുടെ വളര്ച്ചയ്ക്കുള്ള മറുപടി അക്രമത്തിലൂടെയാവരുത്. ആക്രമണങ്ങള്ക്ക് ഇരയായവരുടെ കുടുംബാംഗങ്ങള് സിബിഐ അന്വേഷണം ആവശ്യപ്പെട്ട് ഹൈക്കോടതിയെ സമീപിച്ചിട്ടുണ്ട്. കോടതിയുടെ തീരുമാനം വരട്ടെ. ബിജെപി ഈ അക്രമണങ്ങള്ക്കെതിരെ പരമാവധി പ്രചാരണങ്ങള് നടത്തുമെന്നും അമിത്ഷാ പറഞ്ഞു.
ചിത്രം രഞ്ജിത് നാരായണന്
ബിജെപി സംസ്ഥാന അധ്യക്ഷന് കുമ്മനം രാജശേഖരനെതിരെ സംസ്ഥാന സര്ക്കാര് എന്ത് നീക്കമാണ് നടത്തുന്നതെന്ന് അറിയില്ല. എന്തായാലും ഇതൊന്നുമല്ല ഒരു ജനാധിപത്യ സര്ക്കാര് ചെയ്യേണ്ടതെന്നും അമിത് ഷാ പറഞ്ഞു.
ലക്ഷദ്വീപിലെ സന്ദര്ശനം പാര്ട്ടി ശക്തിപ്പെടുത്താനുള്ള പ്രവര്ത്തനങ്ങളുടെ ഭാഗമായാണ്. ജൂണ് ഒന്നു മുതല് മെമ്പര്ഷിപ്പ് പ്രചാരണം നടത്തും. എല്ലാ ദ്വീപിലും ബൂത്തു തലങ്ങളില് പ്രവര്ത്തനം തുടങ്ങും. അയ്യായിരം പേരെ അംഗങ്ങളാക്കും. അതാണ് ലക്ഷ്യം. ദ്വീപിന്റെ വികസനത്തിന് പദ്ധതി തയാറാക്കും. മത്സ്യബന്ധനം, വിദ്യാഭ്യാസം, ആരോഗ്യമേഖല, ഗതാഗതം തുടങ്ങി ഒട്ടേറെ വിഷയങ്ങളുണ്ട്. ദല്ഹിയില് മടങ്ങിയെത്തിയാല് ഓരോ വകുപ്പ് മന്ത്രിമാരുമായും വിഷയങ്ങള് ചര്ച്ച ചെയ്യും. പദ്ധതി തയാറാക്കും. നവംബറില് പ്രധാനമന്ത്രി നരേന്ദ്ര മോദി ദ്വീപ് സന്ദര്ശിക്കുമെന്നും അമിത് ഷാ വ്യക്തമാക്കി.
ദ്വീപില് ഏതെങ്കിലും രാഷ്ട്രീയ പാര്ട്ടികളുമായി സഖ്യമുണ്ടാക്കുന്നതൊന്നും ഇപ്പോള് വിഷയമല്ല. ബിജെപി ഒറ്റയ്ക്ക് വളരാനാണ് ശ്രമിക്കുന്നത്. തെരഞ്ഞെടുപ്പ് വരുമ്പോഴാണ് സഖ്യവും ധാരണയും മറ്റും. അത് അപ്പോള് നോക്കാമെന്നും അമിത് ഷാ പറഞ്ഞു.
