അരൂര്: കായല് ശുചീകരിക്കാത്തതിനെതിരെ മത്സ്യതൊഴിലാളികളും നാട്ടുകാരും രംത്തെത്തി. അരൂര് വ്യവസായ മേഖലയോടു ചേര്ന്നു കിടക്കുന്ന കുമ്പളങ്ങി കായലാണ് രാസമാലിന്യങ്ങളും, ജൈവമാലിന്യങ്ങളും തള്ളിയതിനെ തുടര്ന്ന് എക്കലും ചെളിയും അടിഞ്ഞ് ഒഴുക്ക് നിലച്ച് കിടക്കുന്നത്.
വ്യവസായ മേഖലയില് പ്രവര്ത്തിക്കുന്ന വിവിധ വ്യവസായ ശാലകളില് നിന്നും കായലിലേക്ക് ഒഴുക്കി വടുന്ന മാലിന്യങ്ങളാണ് ഒഴുക്ക് നിലച്ച് അടിഞ്ഞു കൂടി കിടക്കുന്നത്. കായലില് തന്നെ ഒരേക്കറിലധികം വരുന്ന സ്ഥലമാണ് ഇത്തരത്തില് കിടക്കുന്നത്.
പ്രദേശവാസികള്ക്കും മല്സ്യ തൊഴിലാളികള്ക്കും ഏറെ ദുരിതമാണ് അനുഭവിക്കേണ്ടി വരുന്നത്. വരള്ച്ച രൂക്ഷമായതിനെ തുടര്ന്ന് ഇവ കായലിന്റെ അടിത്തട്ടിലെത്തി കിടക്കുകയും വെള്ളം വറ്റിയതോടെ അതി രൂക്ഷമായ ദുര്ഗന്ധം വമിക്കുകയാണെന്നും ഇതോടൊപ്പം തന്നെ കൊതുക് ശല്യവും മറ്റ് രോഗങ്ങളും പിടിപെടുകയാണെന്നും പരാതിയുണ്ട്.
കൂടാതെ മറ്റ് ജലജന്യ രോഗങ്ങള് പടരുന്നുമുണ്ടെന്ന് മത്സ്യ തൊഴിലാളികള് പറയുന്നു. നേരത്തെ കായലില് നിന്നും മാലിന്യം നീക്കം ചെയ്യുന്നതിനും മേലില് ഒഴുക്കാതിരിക്കുന്നതിനും തീരുമാനമെടുത്തിരുന്നു.
മാസങ്ങള്മുന്പാണ് തീരുമാനങ്ങള് എടുത്തിരുന്നതെങ്കിലും നാളിതുവരെ യാതൊരവിധ നടപടികളും സ്വീകരിച്ചിട്ടില്ലെന്ന് നാട്ടുകാര് പറയുന്നു. തങ്ങളുടെ ഉപജീവനമാര്ഗ്ഗമായ തൊഴിലിടം ഇല്ലാതാക്കുന്ന സമീപനമാണ് അരൂര് വ്യവസായ മേഖലയിലെ ചില വ്യവസായികള് സ്വീകരിച്ചിരിക്കുന്നതെന്നും കായലില് നിന്നും വള്ളംപോലും കരയിലക്ക് അടുപ്പിക്കുവാന് കഴിയാത്ത സാഹചര്യമാണ് ഉള്ളതെന്നും മത്സ്യത്തൊഴിലാളികള് ചൂണ്ടിക്കാട്ടി.
