പൂനെ: മിന്നുന്ന ബൗളിംഗില് കിങ്ങ്സ് ഇലവന് പഞ്ചാബിനെ വീഴ്ത്തി റൈസിങ്ങ് പൂനെ സൂപ്പര്ജയന്റ്സ് ഇന്ത്യന് പ്രീമിയര് ലീഗിന്റെ പ്ലേ ഓഫില് കടന്നു. നിര്ണായക ലീഗ് മത്സരത്തില് ഒമ്പതു വിക്കറ്റിനാണ് അവര് ജയിച്ചുകയറിയത്. ഈ വിജയത്തോടെ പൂനെ പോയിന്റു നിലയില് രണ്ടാം സ്ഥാനം നേടി.
പൂനെയുടെ ബൗളര്മാര് നിറഞ്ഞാടിയതോടെ കിങ്ങ്സ് ഇലവന് പഞ്ചാബ് 15.5 ഓവറില് കേവലം 73 റണ്സിന് ഓള് ഔട്ടായി. മറുപടിയായി പൂനെ 12 ഓവറില് ഒരുവിക്കറ്റ് മാത്രം നഷ്ടപ്പെടുത്തി വിജയപീഠം കയറി. രഹാനെയും (34), സ്മിത്തും (15) പുറത്താകാതെ നിന്നു. 28 റണ്സ്് എടുത്ത ത്രിപാഠിയാണ് പുറത്തായത്.
മൂന്ന് ഓവറില് 12 റണ്സ് മാത്രം വിട്ടുകൊടുത്ത് കിങ്ങ്സ് ഇലവന് ഓപ്പണര് ഗുപ്ടിലിന്റെതുള്പ്പെടെ രണ്ടു വിക്കറ്റുകള് നേടിയ ഉനദ്ഘട്ടാണ് കളിയിലെ കേമന്. താക്കുര് നാല് ഓവറില് പത്തൊന്പതു റണ്സിന് മൂന്ന് വിക്കറ്റ് വീഴ്ത്തി. സാമ്പയും ക്രിസ്റ്റിയനും രണ്ടു വിക്കറ്റുകള് വീതം ലഭിച്ചു.
ബാറ്റിംഗിനയക്കപ്പെട്ട കിങ്ങ്സ് ഇലവനെ പൂനെയുടെ ബൗളര്മാര് വരിഞ്ഞു മുറുക്കി.ഓപ്പണര് ഗുപ്ടിലിനെ ഉനദ്ഘട്ട് ആദ്യ പന്തില് പുറത്താക്കി. തുടക്കത്തിലെ തകര്ച്ചയില് നിന്ന് കിങ്ങ്സ് ഇലവന് കരയകറാനായില്ല.ഒരോ ഇടവേളകളിലും വിക്കറ്റുകള് നിലം പൊത്തി.
ഗുപ്റ്റിലിന് പുറമെ മോര്ഗന് (4), ടിവെറ്റ (4), മാക്സ്വെല് (0),എം.എം.ശര്മ (6) ഇയാന് ശര്മ (1) എന്നിവരും വേഗത്തില് കളത്തിന് പുറത്തേയക്ക് മടങ്ങി. വൃദ്ധിമാന് സാഹ (13) ,മാര്ഷ് (10) ,പട്ടേല് (22), എസ്.സിംഗ് (10) എന്നിവര് മാത്രമാണ് രണ്ടക്കം കടന്നത്.
അനാസായ വിജയം ലക്ഷ്യമിട്ട് ക്രീസിലിറങ്ങിയ പൂനെയുടെ രഹാനെയും ത്രിപാഠിയും പൊരുതി നിന്ന് ടീമിനെ വിജയത്തിലേയ്ക്ക് അടുപ്പിച്ചു. ആദ്യ വിക്കറ്റില് ഇവര് 5.1 ഓവറില് 41 റണ്സ് നേടി. ത്രിപാഠി 28 റണ്സുമായി മടങ്ങി. പിന്നീടെത്തിയ നായകന് സ്മിത്ത് രാഹനെയ്ക്കൊപ്പം പിടിച്ചു നിന്ന് ടീമിനെ വിജയത്തിലേക്ക് ഉയര്ത്തി.
പൂനെയ്ക്ക് പുറമെ മുംബൈ ഇന്ത്യന്സ്്, സണ്റൈസേഴ്സ് ഹൈദരാബാദ്, കൊല്ക്കത്ത നൈറ്റ് റൈഡേഴ്സ് എ്ന്നീ ടീമുകളും പ്ലേ ഓഫില് കടന്നിട്ടുണ്ട്.
