കൊച്ചി: കോര്പ്പറേഷന് അനുമതിയില്ലാതെ റോഡ് കുത്തിപ്പൊളിച്ച് കേബിളിട്ട എയര്ടെല് ടെലികോം കമ്പനിക്കെതിരെ നിയമനടപടി സ്വീകരിക്കാന് മേയര് സെക്രട്ടറിയോട് നിര്ദേശിച്ചു. റോഡ് പൊളിച്ച് കേബിളിട്ടതില് വന് അഴിമതി നടന്നെന്ന പ്രതിപക്ഷ ആരോപണം ഉയര്ന്നതിന് പിന്നാലെയാണ് ഇക്കാര്യത്തില് വിശദമായ അന്വേഷണം നടത്തി റിപ്പോര്ട്ട് സമര്പ്പിക്കാന് മേയര് സൗമിനി ജെയിന് സെക്രട്ടറിയോട് നിര്ദേശിച്ചത്. അഴിമതി നടന്നിട്ടുണ്ടെങ്കില് ഇക്കാര്യത്തില് നഗസരസഭാ ഉദ്യോഗസ്ഥരുടെ പങ്കിനെ കുറിച്ച് അന്വേഷിക്കണമെന്നും മേയര് ഉത്തരവില് ആവശ്യപ്പെട്ടിട്ടുണ്ട്.
കൗണ്സിലില് പാസാക്കാതെ തന്നെ ചില ഫയലുകളുടെ ഡിമാന്ഡ് നോട്ടുകള് ബന്ധപ്പെട്ട കക്ഷികള്ക്കെത്തുന്നു എന്ന ആരോപണം നിലനില്ക്കേയാണ് ഈ നടപടി. എയര്ടെല് പല സ്ഥലങ്ങളിലായി 18 കി.മി. റോഡ് പൊളിക്കാന് അപേക്ഷ നല്കിയിരുന്നുെവന്ന് മേയര് കൗണ്സില് യോഗത്തിനു ശേഷം മാധ്യമങ്ങളോടു പറഞ്ഞു. എന്നാല് എത്ര തുക ഈടാക്കണമെന്നു തീരുമാനിക്കാന് ഫിനാന്സ് കമ്മിറ്റിക്ക് ഫയല് കൈമാറി. മുന് തീരുമാനപ്രകാരമുള്ള തുക ഈടാക്കാന് നിര്ദേശിച്ച് ഫിനാന്സ് കമ്മിറ്റി ഫയല് മടക്കി. പക്ഷേ അതു കൗണ്സിലിലേക്ക് എത്തിക്കുന്നതിനു പകരം എയര്ടെലിന് ഡിമാന്ഡ് നോട്ട് നല്കുകയാണ് ഉദ്യോഗസ്ഥര് ചെയ്തത്. ഈ വീഴ്ച്ച ഗുരുതരമാണെന്നും ഇതു പരിശോധിക്കുമെന്നും മേയര് വ്യക്തമാക്കി. മുമ്പ് കൗണ്സിലര് സുധാ ദിലീപിന്റെ ഡിവിഷനില് റോഡ് വെട്ടിപ്പൊളിച്ചതിന്റെ പേരില് എയര്ടെലിനെതിരെ കേസ് നിലവിലുണ്ട്.
എയര്ടെലിനെ കരിമ്പട്ടികയില് പെടുത്താനും ആലോചനയുണ്ട്. ഇതു വരെ റോഡ് കട്ടിംഗിന് അനുമതി ആര്ക്കും നല്കിയിട്ടില്ല. രാത്രിയില് യന്ത്രങ്ങള് എത്തിച്ചാണ് കമ്പനികള് റോഡ് പൊളിക്കുന്നത്. ഇതു മൂലം കുടിവെള്ള പൈപ്പുകളും മറ്റും തകരാറിലാവുന്നു. 38-ാം ഡിവിഷനിലും 48-ാം ഡിവിഷനിലും റോഡ് വെട്ടിപ്പൊളിച്ചതായി ഇന്നലെ കൗണ്സില് യോഗത്തിനിടെ കൗണ്സിലര്മാര് ആരോപിച്ചിരുന്നു.
