തലശ്ശേരി: കണ്ണൂര്‍ പെരുന്താറ്റില്‍ കഴിഞ്ഞദിവസം ഉദ്ഘാടനം ചെയ്ത കേശവസ്മൃതി സേവാലയം സിപിഎം സംഘം അടിച്ചുതകര്‍ത്തു. തിങ്കളാഴ്ച രാവിലെ രാവിലെ ഏഴുമണിയോടെ മുഖംമൂടിധരിച്ച് ആയുധങ്ങളുമായെത്തിയ അക്രമികള്‍ സേവാലയത്തിന്റെ ജനലുകളും വാതിലുകളും തകര്‍ത്ത ശേഷം കമ്പ്യൂട്ടറുകളും ഫര്‍ണിച്ചറുകളും തകര്‍ക്കുകയായിരുന്നു. ചുമരിലാകെ ചുവന്ന പെയിന്റടിച്ച് വൃത്തിഹാനമാക്കുകയും ചെയ്തിട്ടുണ്ട്.
ഉദ്ഘാടനം കഴിഞ്ഞ് ഇരുപത്തിനാല് മണിക്കൂറിനുള്ളിലാണ് പെരുന്താറ്റിലെ കേശവസ്മൃതി സേവാലയം സിപിഎം അക്രമികള്‍ അടിച്ചുതകര്‍ത്തത്. പ്രദേശത്തെ ആര്‍എസ്എസ് പ്രവര്‍ത്തകരുടെ ചിരകാല സ്വപ്‌നമാണ് ഇന്നലെ പ്രജ്ഞാപ്രവാഹ് ദേശീയ സംയോജക് ജെ.നന്ദകുമാര്‍ സേവാലയത്തിന്റെ ഉദ്ഘാടനം നിര്‍വ്വഹിച്ചതോടെ സഫലമായത്. വര്‍ഷങ്ങളായി പെരുന്താറ്റിലെ ആര്‍എസ്എസ് പ്രവര്‍ത്തകരും അനുഭാവികളും വിയര്‍പ്പൊഴുക്കി പടുത്തുയര്‍ത്തിയ സേവാകേന്ദ്രം ഗൃഹപ്രവേശം കഴിഞ്ഞ് മണിക്കൂറുകള്‍ക്കകം സിപിഎം ക്രിമിനലുകള്‍ തകര്‍ക്കുകയായിരുന്നു. വര്‍ഷങ്ങള്‍ക്ക് മുമ്പ് സേവാലയത്തിന്റെ പണി ആരംഭിച്ചപ്പോള്‍ തന്നെ എതിര്‍പ്പുമായി സിപിഎമ്മുകാര്‍ രംഗത്തെത്തിയിരുന്നു. നിര്‍മ്മാണഘട്ടത്തില്‍ തന്നെ പലവട്ടം കെട്ടിടത്തിനു നേരെ അക്രമണമുണ്ടായി.
അക്രമസംഭവവുമായി ബന്ധപ്പെട്ട് നിരവധി സിപിഎം പ്രവര്‍ത്തകര്‍ക്കെതിരെ പോലീസ് കേസെടുത്ത് അന്വേഷണമാരംഭിച്ചു.
