തിരുവനന്തപുരം: വീടിനു മുന്നിലെ ക്രഷറിന്റെ പ്രവര്ത്തനം നിര്ത്തിവയ്ക്കണമെന്ന് ആവശ്യപ്പെട്ട് സെക്രട്ടേറിയറ്റ് പടിക്കല് സമരം നടത്തുന്ന സേതുവിനും കുടുംബത്തിനും വധഭീഷണി. കിളിമാനൂര് എകെആര് ക്രഷറിയില് പാറ പൊട്ടിക്കുന്നതിനിടെ സേതുവും കുടുംബവും താമസിച്ചിരുന്ന വീട് തകര്ന്നു.നഷ്ട പരിഹാരം ആവശ്യപ്പെട്ടെങ്കിലും ക്വാറി ഉടമകള് നല്കാന് തയ്യാറായില്ല. ഇതേ തുടര്ന്നാണ് സെക്രട്ടേറിയറ്റ് പടിക്കല് സമരം നടത്തുന്നത്. സമരം നിര്ത്തുന്നതിനായി വധഭീഷണി ഉയര്ത്തുന്നതായി സേതു പറഞ്ഞു.
മുഖ്യമന്ത്രിക്കും ജില്ലാ കളക്ടര്ക്കും നിവേദനം നല്കിയെങ്കിലും നടപടി എടുത്തില്ല. പോലീസ് സ്റ്റേഷനില് പരാതി നല്കിയപ്പോള് സാക്ഷി ഇല്ലാത്തതുകൊണ്ട് കേസ് രജിസ്റ്റര് ചെയ്യാന് പറ്റില്ല എന്നായിരുന്നു മറുപടി. ക്വാറിയുടമകളെ ഭയന്ന് ആരും സാക്ഷി പറയുന്നില്ല. മ്യൂസിയം, കന്റോണ്മെന്റ് സ്റ്റേഷനുകളിലെ പോലീസ് ഉദേ്യാഗസ്ഥന് സമരം നിര്ത്തിപോകാന് ആവശ്യപ്പെടുകയും ഭീഷണിപ്പെടുത്തുകയും ചെയ്യുന്നതായി സേതു പറഞ്ഞു. നിര്ദ്ദനരായ ദളിതരാണ് ക്വാറി പ്രദേശത്ത് താമസിക്കുന്നത്. വീടുകള് നശിപ്പിച്ച് തുച്ഛമായ നഷ്ടപരിഹാരം നല്കി ആ സ്ഥലം വാങ്ങിയെടുക്കുക എന്ന ഗൂഢലക്ഷ്യമാണ് ഉടമകള്ക്കുള്ളത്. ജനപ്രതിനിധികളുടെ പിന്തുണയും ക്വാറി ഉടമകള്ക്കുണ്ട്.
