കുറവിലങ്ങാട്: എം.സി റോഡ് വികസനത്തിന്റെ ഭാഗമായി പിഴുതെടുത്ത ദിശാബോര്ഡുകള്ക്ക് പകരമായി താല്ക്കാലിക ബോര്ഡുകള്പോലും എത്താത്തതിനാല് വാഹനങ്ങള്ക്ക് വഴിതെറ്റുന്നു. എം.സി റോഡും വൈക്കം റോഡും സംഗമിക്കുന്ന സെന്ട്രല് ജംഗ്ഷനിലാണ് ബോര്ഡുകളില്ലാത്തത് വാഹനങ്ങള്ക്ക് പ്രതിസന്ധി സൃഷ്ടിക്കുന്നത്.
ഒരേനിലവാരത്തിലുള്ള രണ്ട് റോഡുകള് ഒരുമിച്ച് കാണുന്നതോടെ എങ്ങോട്ട് തിരിയണമെന്നറിയാതെ വാഹനങ്ങള് ആശയക്കുഴപ്പത്തിലെത്തി പെട്ടെന്ന് നിറുത്തുകയും തിരിക്കുകയും ചെയ്യുന്നത് വലിയ അപകടഭീഷണി സൃഷ്ടിക്കുകയാണ്. എറണാകുളം, കോട്ടയം ഭാഗത്തേക്ക് പോകുന്ന വാഹനങ്ങള് വഴിതെറ്റി പോകുന്നതും സാധാരണകാഴ്ചയാണ്. റോഡിനു നടുവില് നിര്ത്തി വഴി ചോദിക്കുന്നതിനിടയില് പിന്നിലുള്ള വാഹനം മറ്റ് വാഹനങ്ങളില് ഇടിക്കുന്നതും സാധാരണമായിട്ടുണ്ട്. ജംഗ്ഷന് സമീപം കോട്ടയം റൂട്ടിലുള്ള ഓട്ടോറിക്ഷാ ഡ്രൈവര്മാരാണ് ഇപ്പോള് വഴികാട്ടികള്. ഇവരോട് ചോദിക്കുന്നതിന് പിന്നാലെ എറണാകുളത്തേക്കുള്ള വാഹനങ്ങള് തിരികെ ജംഗ്ഷനിലെത്തി തിരിയേണ്ടിവരുന്നത് ഗതാഗതക്കുരുക്കിനും കാരണമാകുന്നുണ്ട്. ദിശാബോര്ഡുകള് സ്ഥാപിക്കേണ്ട സ്ഥലങ്ങളില് സ്ഥിരമായി ചരമ അറിയിപ്പ് ബോര്ഡുകളാണ് കാണാറുള്ളത്.
ജംഗ്ഷനില് സ്ഥാപിച്ച ഡിവൈഡറുകളിലടക്കം ചില രാഷ്ട്രീയ പാര്ട്ടികള് കൊടിമരം നാട്ടിയും പതാക ഉയര്ത്തിയും സാന്നിധ്യമറിയിക്കാനും ശ്രമിച്ചിട്ടുണ്ട്. ശബരിമല സീസണില് ബിജെപി പഞ്ചായത്ത് കമ്മിറ്റിയുടെ നേതൃത്വത്തില് താല്ക്കാലികമായി ബോര്ഡ് സ്ഥാപിച്ചിരുന്നുവെങ്കിലും പരസ്യബോര്ഡുകളുടെ പ്രളയത്തില് അത് നഷ്ടപ്പെട്ടു. ഈ മേഖലയിലടക്കം ദിശാബോര്ഡുകളും തെരുവ് വിളക്കുകളും ഉടന് സ്ഥാപിക്കുമെന്ന് കെഎസ്ടിപി അറിയിച്ചിരുന്നുവെങ്കിലും ഇതുവരെ ബോര്ഡുകള് എത്തിയിട്ടില്ല.
