കണ്ണൂര്: ബന്ധുനിയമന വിവാദത്തില് മന്ത്രിസ്ഥാനം നഷ്ടപ്പെട്ട സിപിഎം കേന്ദ്രക്കമ്മറ്റി അംഗം ഇ.പി.ജയരാജന്റെ മന്ത്രസഭാ പുന:പ്രവേശം അനിശ്ചിതത്വത്തില് തന്നെയെന്ന് സൂചന. ജയരാജന്റെ സഹോദരി പുത്രന് സുധീര് നമ്പ്യാരെ കേരള സ്റ്റേറ്റ് ഇന്റസ്ട്രിയല് എന്റര് പ്രൈസസിന്റെ എംഡിയാക്കി നിയമിച്ചത് വിവാദമായതോടെയാണ് ഇ.പി.ജയരാജന് വ്യവസായ മന്ത്രി സ്ഥാനം രാജിവെച്ച് ഒഴിയേണ്ടി വന്നത്. ഇടതു മന്ത്രി സഭ അധികാരത്തിലെത്തി മാസങ്ങള്ക്കകം മന്ത്രിസഭയിലെ രണ്ടാമന് തന്നെ സ്വജനപക്ഷപാത കാട്ടി പുറത്തേക്ക് പോയത് പാര്ട്ടിക്കും മന്ത്രിസഭക്കും ഏറെ നാണക്കേടുണ്ടാക്കിയിരുന്നു.
ബന്ധുനിയമന കേസില് തുടര് നടപടിക്ക് സാധ്യയില്ലെന്ന് കണ്ടാല് കേസ് എഴതിത്തള്ളാന് തടസ്സമില്ലെന്ന് ഹൈകോടതി കഴിഞ്ഞ ദിവസം വ്യക്തമാക്കിയിരുന്നു. ജയരാജനെതിരായ തുടര്നടപടി കോടതി സ്റ്റേ ചെയ്യുകയും വിജലന്സ് ഡയരക്ടര് സ്ഥാനത്ത് നിന്ന് ജേക്കബ് തോമസ് പടിയിറങ്ങുകയും ചെയ്തതോടെ ജയരാജന്റെ മന്ത്രിസഭാ പുനപ്രവേശം എളുപ്പമാകുമെന്നായിരുന്ന ധാരണ. എന്നാല് ഇത് തെറ്റിച്ച് കൊണ്ടാണ് പാര്ട്ടി സംസ്ഥാന സെക്രട്ടറി കോടിയേരി തന്നെ ഇതിന് വിലങ്ങുതടിയായി നില്ക്കുന്നത്. പാര്ട്ടിക്കകത്തും പുറത്തും കടുത്ത അഭിപ്രായ ഭിന്നതയുള്ള കോടിയേരിയാണ് ഇ.പി.യുടെ രാജി വേഗത്തിലാക്കിയത്. മുഖ്യമന്ത്രി പിണറായി വിജയനെതിരായ ലാവ്ലിന് കേസില് വിചാരണ നടക്കുന്ന സാഹചര്യത്തില് മന്ത്രിസഭയിലെ രണ്ടാമനായി ഇ.പി.ജയരാജന് ഉയര്ന്നുവരുന്നതില് കോടിയേരിക്ക് കടുത്ത അതൃപ്തിയുണ്ടായിരുന്നു.
തനിക്ക് ലഭിച്ച അനുകൂല സാഹചര്യം കോടിയേരി കൃത്യമായി മുതലെടുത്തതാണ് ജയരാജന്റെ പെട്ടന്നുള്ള രാജിയില് കലാശിച്ചത്. ബന്ധുനിയമന വിവാദത്തില് സംസ്ഥാന സെക്രട്ടേറിയറ്റില് ഇ.പി. ജയരാജന് വിശദീകരണം നല്കാന് പോലും പാര്ട്ടി അവസരം നല്കിയിരുന്നില്ല. വിഷയം പാര്ട്ടിവേദികളില് ഉന്നയിക്കാനുള്ള ജയരാജന്റെ ശ്രമവും നേതൃത്വത്തിന്റെ കര്ശന നിലപാടുകാരണം വിജയിച്ചില്ല. ഏതെങ്കിലും തരത്തിലുള്ള വിശദീകരണവുമായി രംഗത്തെത്തിയാല് നടപടിയുണ്ടാകുമെന്ന ഭയം കാരണമാണ് ജയരാജന് മാധ്യമങ്ങളില് നിന്ന് പോലും അകന്ന് നിന്നത്. നേതാക്കന്മാരുടെ ഭാഗത്ത് വീഴ്ചയുണ്ടായാല് ശരി തെറ്റുകള് തീരുമാനിക്കേണ്ടത് കോടതിയല്ലെന്നും അന്തിമ വിധി പാര്ട്ടിയുടെതാണെന്നുമാണ് നേതൃത്വത്തിന്റെ നിലപാട്. അതുകൊണ്ട് തന്നെ ഇ.പി.ജയരാജന്റെ ഭാഗത്തു നിന്നുണ്ടായത് ഗുരുതരമായ വീഴ്ച തന്നെയാണെന്ന നിഗമനത്തിലാണ് പാര്ട്ടി നേതൃത്വം. കോടതി കനിഞ്ഞാലും പാര്ട്ടി കനിയാത്തതിനാല് ജയരാജന് മന്ത്രി സ്ഥാനത്തിന് പുറത്തു തന്നെയായിരിക്കും.
