കോട്ടയം: തലയാഴം ഒരു പ്രതീകമാണ്. കുടിവെള്ളക്ഷാമത്തിന്റെയും വികസന മുരടിപ്പിന്റെയും കാര്ഷിക മേഖലയുടെ തകര്ച്ചയുടേയും പ്രതീകം. വൈക്കം നഗരസഭയോട് ചേര്ന്ന് കിടക്കുന്ന വേമ്പനാട് കായല്തീരം ഉള്ക്കൊള്ളുന്ന പ്രദേശമാണ് തലയാഴം പഞ്ചായത്ത്. സംസ്ഥാനത്തെതന്നെ ഏറ്റവും പിന്നാക്കാവസ്ഥയിലുള്ള പ്രദേശങ്ങളിലൊന്നാണിത്.
1963ലാണ് തലയാഴം പഞ്ചായത്ത് രൂപീകരിച്ചത്. 1990 മുതല് 95 വരെയുള്ള കാലത്തൊഴികെ പഞ്ചായത്തിന്റെ ഭരണം ഇടതുമുന്നണിക്കായിരുന്നു. ഇടത്തോട്ടുചിന്തിച്ച പഞ്ചായത്തിനെ നേര്വഴിക്കെത്തിക്കുന്നതില് എല്ഡിഎഫ് പരാജയപ്പെടുകയായിരുന്നു. ഇതിന്റെ സാക്ഷിപത്രമാണ് ഇന്നുകാണുന്ന തലയാഴം.
പരമ്പരാഗത കര്ഷക തൊഴിലാളികളും മത്സ്യത്തൊഴിലാളികളും തിങ്ങിപ്പാര്ക്കുന്ന മേഖലയിലെ അടിസ്ഥാന സൗകര്യങ്ങള്പോലും ഇന്നും മെച്ചപ്പെട്ടിട്ടില്ല. തകര്ന്ന റോഡുകള് ഇന്നും ഈ നാടിന്റെ ശാപമാണ്. ജനകീയ ക്ഷേമത്തിന് പ്രാമുഖ്യം നല്കുന്നവര് എന്ന് സ്വയം വിശേഷിപ്പിക്കുന്ന ഇടതുമുന്നണി പതിറ്റാണ്ടുകള് ഭരണം നടത്തിയിട്ടും കുടിവെള്ള പ്രശ്നംപോലും പരിഹരിക്കാന് കഴിഞ്ഞിട്ടില്ല. വോള്ട്ടേജ് ക്ഷാമവും വഴിവിളക്കുകള് കണ്ണടയ്ക്കുന്നതും തലയാഴം പഞ്ചായത്തിനെ മറ്റുസ്ഥലങ്ങളില്നിന്നും ഇന്നും ഒറ്റപ്പെടുത്തുന്നു.
കുടിവെള്ളത്തിനായി നിരവധി സമരങ്ങള് അരങ്ങേറിയനാടാണ് തലയാഴം. കഴിഞ്ഞ വേനലില് മെമ്പര്മാരെ പഞ്ചായത്ത് ഓഫീസില് തടഞ്ഞുവെച്ച സംഭവങ്ങള്വരെ ഉണ്ടായി. ഒരു പതിറ്റാണ്ടിലേറെയായി കേള്ക്കുന്ന തലയാഴം ശുദ്ധജല വിതരണ പദ്ധതി ഇന്നും പൂര്ത്തിയാക്കാന് കഴിഞ്ഞിട്ടില്ല. സ്വകാര്യ വിതരണക്കാരില്നിന്നും പണം നല്കിയാണ് പഞ്ചായത്തിലുള്ളവര് കുടിവെള്ളം ഇപ്പോള് വാങ്ങുന്നത്.
ഈ പ്രദേശത്തെ പ്രധാന വരുമാന മാര്ഗ്ഗങ്ങളിലൊന്നായിരുന്ന തഴപ്പായ നിര്മ്മാണം നിലച്ചിരിക്കുന്നു. സ്ത്രീകള് പായനിര്മ്മാണത്തിലൂടെ മുന്പ് വരുമാനം കണ്ടെത്തിയിരുന്നു. തരിശ് രഹിത പഞ്ചായത്ത് എന്ന് പ്രഖ്യാപനം ഉണ്ടായെങ്കിലും പാടശേഖരങ്ങള് കാടുകയറിക്കിടക്കുകയാണ്. മത്സ്യത്തൊഴിലാളികള്ക്കുവേണ്ടി പുതിയ പദ്ധതികള് ഒന്നുംതന്നെ നടപ്പാക്കിയിട്ടില്ല. നാളികേരോല്പാദനവും കുത്തനെ ഇടിഞ്ഞു. ഇതിനുപുറമേ അഴിമതിയാരോപണങ്ങളും ഇവിടെ ഉയര്ന്നു. ചുരുക്കത്തില് അവഗണിക്കപ്പെട്ട പഞ്ചായത്തായി തലയാഴം മാറി. 22 ചതുരശ്ര കിലോമീറ്ററിലധികം വരുന്ന പ്രദേശത്തെ ഇരുപതിനായിരത്തില്പരമുള്ള ജനങ്ങള് ഇന്ന് മോചനം കാത്ത് കഴിയുകയാണ്.
തലയാഴത്ത് 15 വാര്ഡുകളാണുള്ളത്. സംസ്ഥാനത്തെ മാറിയ രാഷ്ട്രീയ സാഹചര്യങ്ങളനുസരിച്ച് എസ്എന്ഡിപിയുടെ സ്വാധീനം ഇക്കുറി തലയാഴത്ത് പ്രതിഫലിക്കും. വെള്ളാപ്പള്ളി നടേശന് നേതൃത്വം നല്കുന്ന പുതിയ രാഷ്ട്രീയ നീക്കങ്ങള്ക്ക് ചുക്കാന് പിടിക്കുന്ന പ്രധാനികളില് ഒരാളായ കെപിഎംഎസ് സംസ്ഥാന പ്രസിഡന്റ് എന്.കെ. നീലകണ്ഠന് മാസ്റ്റര് തലയാഴം സ്വദേശിയുമാണ്.
കുടിവെള്ള പ്രശ്ന പരിഹാരവും അടിസ്ഥാന സൗകര്യവികസനവും ഈ നാടിന്റെ ഒഴിച്ചുകൂടാനാവാത്ത ആവശ്യമാണ്. ഉള്നാടന് ടൂറിസവികസനം തലയാഴത്തിന്റെ മുഖച്ഛായതന്നെ മാറ്റുമായിരുന്നു. എന്നാല് ഇവിടെയും ഭരണാധികാരികളായ ഇടതുമുന്നിണി പരാജയപ്പെട്ടു. അതിനാല് ജനമനസറിയാതെ ദേശീയ രാഷ്ട്രീയത്തിലെ വിയോജിപ്പുള്ള മേഖലകള് മാത്രമാണ് ഇവിടെ നേതാക്കള് ചര്ച്ചാവിഷയമാക്കുന്നത്.
പ്രാദേശിക പ്രശ്നങ്ങള് അവഗണിക്കുകയാണ്. എല്ലാ ജില്ലകളിലും തലയാഴം പോലുള്ള പ്രദേശങ്ങളുണ്ട്. അവഗണിക്കപ്പെട്ട ജനത കുടിപാര്ക്കുന്ന മേഖലകള്. വികസനം സ്വപ്നങ്ങളില് മാത്രം കാണുന്നവര്. ഇവയുടെ വിലയിരുത്തല് കൂടിയായിരിക്കും ഇക്കുറി തെരഞ്ഞെടുപ്പ്.
