തിരുവനന്തപുരം: ശ്രീപദ്മനാഭ സ്വാമി ക്ഷേത്രോത്സവത്തോടനുബന്ധിച്ച് ഇക്കുറിയും ആചാരം മുടങ്ങാതെ വേലകളി നടന്നു. വേലകളി കാണാന് നഗരവാസികള്ക്കും ഗ്രാമവാസികള്ക്കും പുറമെ അന്യസംസ്ഥാനങ്ങളില് നിന്നുള്ളവരും വിദേശികളും കൂട്ടമായെത്തി. ശ്രീചിത്തിര തിരുനാള് മെമ്മോറിയല് സാംസ്കാരിക സമിതിയുടെ നേതൃത്വത്തിലാണ് ശ്രീപദ്മനാഭസ്വാമി ക്ഷേത്രത്തിന്റെ കിഴക്കേനടയില് എട്ടാം ഉത്സവദിവസമായ ഇന്നലെ വേലകളി അവതരിപ്പിച്ചത്. തുടര്ച്ചയായ ഏഴാം വര്ഷമാണ് വേലകളി അവതരിപ്പിക്കുന്നത്. ക്ഷേത്രാനുഷ്ഠാനകലയായ വേലകളിയും വ്യത്യസ്തമായ ശിങ്കാരിമേളവുമാണ് അവതരിപ്പിച്ചത്. കിഴക്കേനടയില് വൈകുന്നേരം 5 ന് മൂലംതിരുനാള് രാമവര്മ്മ ദീപം തെളിച്ചതോടെയാണ് വേലകളി ആരംഭിച്ചത്. അമ്പലപ്പുഴ രാജീവ് പണിക്കരുടെ നേതൃത്വത്തില് 101 കലാകാരന്മാര് ചേര്ന്നാണ് വേലകളി അവതരിപ്പിച്ചത്. തുടര്ന്ന് നാദബ്രഹ്മം വാദ്യകലാസംഘത്തിന്റെ ശിങ്കാളിമേളം അവതരിപ്പിച്ചു. ശ്രീപദ്മനാഭസ്വാമി ക്ഷേത്രത്തിലെ പൈങ്കുനി ഉത്സവത്തോടനുബന്ധിച്ച് നടന്നിരുന്ന അനുഷ്ഠാനകലയായ വേലകളി ദശാബ്ദങ്ങളായി മുടങ്ങിക്കിടന്നിരുന്നു. തുടര്ന്ന് ശ്രീചിത്തിര തിരുനാള് മെമ്മോറിയല് സാംസ്കാരിക സമിതി 2011 മുതല് വേലകളി അവതരിപ്പിച്ചുവരികയാണ്. ശ്രീപദ്മനാഭസ്വാമി ക്ഷേത്രത്തിന്റെ കിഴക്കേനടയിലെ പാണ്ഡവരുടെ പ്രതിമകള്ക്കു മുന്നിലാണ് വേലകളി അവതരിപ്പിച്ചത്. മലവേടരുടെ വേഷത്തില് കൗരവര് എത്തുന്നത് പ്രതീകാത്മകമായി അവതരിപ്പിക്കുന്ന കലാരൂപമാണ് വേലകളി.
ആചാരം മുടങ്ങാതെ വേലകളി
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.