തിരുവനന്തപുരം: 56-ാമത് സംസ്ഥാന സ്കൂള് കലോത്സവത്തിന്റെ പ്രൗഢി വിളിച്ചറിയിച്ച് നടന്ന ഘോഷയാത്ര സാംസ്കാരിക തനിമ വിളിച്ചറിയിക്കുന്നതായി. നഗരത്തിലെ സ്കൂളുകളില് നിന്നും അന്യ ജില്ലകളില് നിന്നും എത്തിയവരായി പതിനായിരത്തിലധികം കൗമാര പ്രതിഭകള് നഗരം കീഴടക്കി ഘോഷയാത്രയില് അണിനിരന്നു.
ഘോഷയാത്രയുടെ ഏറ്റവും മുന്നിലായി 56-ാം സംസ്ഥാന കലോത്സവത്തിന്റെ സൂചകമായി 56 മോട്ടോര് സൈക്കിളുകള്. സാഹസിക മോട്ടോര് സൈക്കിള് യാത്രിക ആതിരമുരളി ഉള്പ്പെടെ ആറുപേര് അഭ്യാസ പ്രകടനങ്ങളുമായി മുന്നിരയിലുണ്ടായിരുന്നു. ഇവര്ക്ക് പിന്നിലായി കേരളാ പോലീസിന്റെ അശ്വാരൂഢ സേന, ബാന്റ് വാദ്യം, സ്റ്റുഡന്റ്സ് പോലീസ് കേഡറ്റുകള്, എന്എസ്എസ് വോളന്റിയേഴ്സ് എന്നിവര് അണിനിരന്നു.
പാരിസ്ഥിതിക മൂല്യങ്ങള് വരച്ചുകാട്ടിയ നിശ്ചലദൃശ്യങ്ങള്, സോഷ്യല്മീഡയകളുടെ ചതിക്കുഴിയില് വീഴുവാനുള്ളതല്ല ബാലജന്മങ്ങള്, പ്ലാസ്റ്റിക്കില് നിന്നു മോചനം തുടങ്ങി വേറിട്ട ആശയങ്ങളുടെ സമ്മേളനമായിരുന്നു വിവിധ സ്കൂളുകളും ശുചിത്വമിഷനും അവതരിപ്പിച്ച നിശ്ചല ദൃശ്യങ്ങള്. ശിങ്കാരിമേളം, വഞ്ചിയും വാദ്യവും, ശലഭനൃത്തം, പൂത്താലമേന്തിയ മാലാഖകള്, കലാരൂപങ്ങള് തുടങ്ങി കണ്ണിനും കാതിനും കുളിര്മ പകരുന്ന ഘോഷയാത്രയെ വര്ണ്ണശബളമാക്കാന് സംഘാടകര് പ്രത്യേകം ശ്രദ്ധിച്ചിരുന്നു.
ഇന്നലെ വൈകുന്നേരം മൂന്നിന് ഘോഷയാത്ര കണ്വീനര് ശാലു കൈമാറിയ പതാക വീശി ഡിജിപി ടി.പി. സെന്കുമാര് ഘോഷയാത്ര ഫ്ളാഗ് ഓഫ് ചെയ്തു. സംസ്കൃത കോളേജിനു മുന്നില് നിന്നാരംഭിച്ച ഘോഷയാത്രയ്ക്ക് മന്ത്രി അബ്ദുറബ്ബ്, എംഎല്എ മാരായ കെ.എസ്. ശബരിനാഥന്, ബി. സത്യന്, പൊതുവിദ്യാഭ്യാസ ഡയറക്ടര് എം.എസ്. ജയ, ജയിംസ് കുര്യന്, കുറുപ്പ്, മനോജ് എബ്രഹാം, ഷീല കെ. നായര് തുടങ്ങിയവര് നേതൃത്വം നല്കി.
