നെല്സണ്: ലോകകപ്പില് വെസ്റ്റിന്ഡീസിനെതിരെ നാല് വിക്കറ്റിന്റെ അട്ടിമറി വിജയം സ്വന്തമാക്കി അയര്ലന്ഡ് തങ്ങളുടെ വരവ് അറിയിച്ചു.
വിന്ഡീസ് ഉയര്ത്തിയ 304 റണ്സെന്ന ലക്ഷ്യം 45.5 ഓവറില് ആറ് വിക്കറ്റ് നഷ്ടപ്പെടുത്തി അയര്ലന്ഡ് മറികടന്നു. 115 പന്തുകളില് 92 റണ്സ് സ്വന്തമാക്കിയ പീറ്റര് സ്റ്റിര്ലിംഗാണ് അയര്ലന്ഡിന്റെ വിജയ ശില്പി. സ്റ്റിര്ലിംഗാണ് കളിയിലെ കേമന്
സ്ക്കോര്- വെസ്റ്റിന്ഡീസ്: ഏഴ് വിക്കറ്റിന് 304 (50 ഓവര്)
അയര്ലന്ഡ്: ആറ് വിക്കറ്റിന് 307 (45.5 ഓവര്)
ടോസ് നേടി ഫീല്ഡിംഗ് തിരഞ്ഞെടുത്ത അയര്ലന്ഡിന് പിഴച്ചില്ല. സക്കോര് ബോര്ഡില് 30 റണ്സ് ചേര്ക്കുമ്പോള് വിന്ഡീസിന് ഡെയ്ന് സ്മിത്തിന്റെ(18) വിക്കറ്റ് നഷ്ടമായിരുന്നു. വെറും ഒരു റണ്സ് മാത്രം കൂട്ടിച്ചേര്ത്തപ്പോള് അവര്ക്ക് അടുത്ത വിക്കറ്റും നഷ്ടമായി. റണ് ഔട്ടിലൂടെ ഇത്തവണ പവലിയനില് തിരിച്ചെത്തിയത് ഡാരന് ബ്രാവോ(പൂജ്യം) ആയിരുന്നു.
വിന്ഡീസ് സ്ക്കോര് 78ല് എത്തി നില്ക്കുമ്പോള് അവര്ക്ക് ഗെയ്ലിനേയും(36) നഷ്ടമായി. തുടര്ന്നെത്തിയ സാമുവല്സ്(21) കാര്യമായ സംഭാവനകള് നല്കാതെ മടങ്ങി.
പിന്നീടായിരുന്നു വിന്ഡീസിനെ ഭേദപ്പെട്ട സ്ക്കോറിലെത്തിച്ച സിമ്മണ്സ്(102) സമ്മി(89) കുട്ടുക്കെട്ട് പിറന്നത്. ആറാം വിക്കറ്റായി സമ്മി ക്രീസ് വിടുമ്പോള് വിന്ഡീസ് 241ലെത്തിയിരുന്നു. തുടര്ന്ന് വിന്ഡീസിന്റെ കടിഞ്ഞാണ് സ്വന്തം കൈപിടിയിലൊതുക്കിയ സിമ്മണ്സ് വിന്ഡീസിനെ 302 റണ്സിലെത്തിച്ച് മടങ്ങി. അയര്ലന്ഡിന് വേണ്ടി ഡോക്ക്റെല് മൂന്ന് വിക്കറ്റ് വീഴ്ത്തി.
മറുപടി ബാറ്റിംഗിനിറങ്ങിയ അയര്ലന്ഡിന്റേത് മികച്ച തുടക്കമായിരുന്നു. സ്ക്കോര് 71ല് നില്ക്കുമ്പോഴാണ് പോര്ട്ടര്ഫീല്ഡിന്റെ (23) വിക്കറ്റ് നഷ്ടമായി അയര്ലന്ഡിന്റെ ഓപ്പണിംഗ് കൂട്ടുക്കെട്ട് പിരിയുന്നത്. മറുഭാഗത്ത് സ്റ്റിര്ലിംഗ് നങ്കൂരമുറപ്പിച്ച് കഴിഞ്ഞിരുന്നു. പിന്നീടെത്തിയ ജോയ്സ്(84) ഒബ്രീന്(79*) എന്നിവര് മികച്ച സംഭാവനകള് നല്കി അയര്ലന്ഡിനെ ലക്ഷ്യത്തിലെത്തിച്ചു. വെസ്റ്റിന്ഡീസിനായി ടെയ്ലര് മൂന്ന് വിക്കറ്റുകള് പിഴുതു.
