ലണ്ടന്: ചാമ്പ്യന്സ് ലീഗിന്റെ ആദ്യപാദ പ്രീക്വാര്ട്ടറില് കരുത്തരായ ആഴ്സണലിനും നിലവിലെ റണ്ണേഴ്സപ്പായ അത്ലറ്റികോ മാഡ്രിഡിനും അട്ടിമറി തോല്വി. എമിറേറ്റ്സ് സ്റ്റേഡിയത്തില് നടന്ന കളിയില് മൊണാക്കോയാണ് ഒന്നിനെതിരെ മൂന്ന് ഗോളുകള്ക്ക് ആഴ്സണലിനെ തകര്ത്തത്. എവേ മത്സരത്തില് അത്ലറ്റികോ മാഡ്രിഡ് 1-0ന് ബയേര് ലെവര്ക്യൂസനോടാണ് കീഴടങ്ങിയത്.
മൊണാക്കോയോടേറ്റ അപ്രതീക്ഷിത കനത്ത തിരിച്ചടി ആഴ്സണലിന്റെ ക്വാര്ട്ടര് സാധ്യതകളാണ് ഏറെക്കുറെ ഇല്ലാതാക്കിയത്. രണ്ടാം പാദത്തില് മറുപടിയില്ലാത്ത മൂന്ന് ഗോളുകളുടെയെങ്കിലും വ്യത്യാസത്തില് ആഴ്സണലിന് വിജയിക്കാന് കഴിഞ്ഞാലേ ഇനി ക്വാര്ട്ടര് പ്രതീക്ഷക്ക് വകയുള്ളൂ. എന്നാല് രണ്ടാം പാദം മൊണാക്കോയുടെ ഹോം ഗ്രൗണ്ടിലാണ്.
പന്ത് കൂടുതല് കൈവശം വെച്ചത് ഗിറൗഡും സാഞ്ചസും മെസ്യൂട്ട് ഓസിലും വെല്ബാക്കും ഉള്പ്പെട്ട ആഴ്സണലായിരുന്നെങ്കിലും കൂടുതല് ഷോട്ടുകള് ലക്ഷ്യത്തിലേക്ക് പായിച്ചത് മൊണാക്കോ താരങ്ങളായിരുന്നു. അവര് പായിച്ച പത്ത് ഷോട്ടുകളില് ഏഴെണ്ണം പോസ്റ്റിന് നേര്ക്കായപ്പോള് ആഴ്സണലിന് നാലെണ്ണം മാത്രമാണ് ഉതിര്ക്കാന് കഴിഞ്ഞത്. ഇരുടീമുകളും മികച്ച ആക്രമണ പ്രത്യാക്രമണങ്ങള് കളിയിലുടനീളം നടത്തിയെങ്കിലും ആദ്യഗോള് പിറക്കാന് 38-ാം മിനിറ്റ് വരെ കാത്തിരിക്കേണ്ടിവന്നു. ജോ മൗടീഞ്ഞോയുടെ പാസില് നിന്ന് ജെഫ്രി കോന്ഡോഗ്ബിയ ബോക്സിന് പുറത്തുനിന്ന് പായിച്ച ഷോട്ടാണ് ഗണ്ണേഴ്സ് വലയില് കയറിയത്. ഈ ഒരു ഗോളിന് ആദ്യപകുതിയില് മൊണാക്കോ മുന്നിട്ടുനില്ക്കുകയും ചെയ്തു.
പിന്നീട് കളിയുടെ 53-ാം മിനിറ്റില് മൊണാക്കോ ലീഡ് ഉയര്ത്തി. ആന്റണി മാര്ഷ്യലിന്റെ പാസില് നിന്ന് ഡിമിറ്റര് ബര്ബറ്റോവാണ് ഇത്തവണ ലക്ഷ്യം കണ്ടത്. രണ്ട് ഗോളുകള്ക്ക് പിന്നിലായതോടെ ആഴ്സണല് ആക്രമണം കൂടുതല് ശക്തമാക്കി. തുടര്ച്ചയായി എതിര്ഗോള്മുഖത്ത് ഗണ്ണേഴ്സ് താരങ്ങള് പന്തെത്തിച്ചെങ്കിലും മൊണാക്കോ ഗോളിയുടെ മികവും ആഴ്സണല് സ്ട്രൈക്കര്മാരുടെ പിഴവും കൂടിയായതോടെ ഗോള് മാത്രം വിട്ടുനിന്നു. എന്നാല് തുടര്ച്ചയായ
മുന്നേറ്റങ്ങള്ക്കൊടുവില് ഇഞ്ചുറി സമയത്തിന്റെ ആദ്യ മിനിറ്റില് ആഴ്സണല് ഒരു ഗോള് മടക്കി. ബോക്സിന് പുറത്തുനിന്ന് അലക്സ് ചേംബര്ലെയ്ന് പായിച്ച വലംകാലന് ഷോട്ടാണ് മൊണാക്കോ വലയില് കയറിയത്. എന്നാല് രണ്ട് മിനിറ്റിനുശേഷം മൊണാക്കോ പട്ടിക പൂര്ത്തിയാക്കുകയും ചെയ്തു. ബെര്നാര്ഡോ സില്വയുടെ പാസില് നിന്ന് യാനിക് ഫെരേരയാണ് ഗണ്ണേഴ്സ് വല കുലുക്കിയത്.
അതേസമയം മറ്റൊരു പോരാട്ടത്തില് നിലവിലെ റണ്ണേഴ്സപ്പായ അത്ലറ്റികോ മാഡ്രിഡിനെ ഏകപക്ഷീയമായ ഒരു ഗോളിനാണ് ജര്മ്മന് ക്ലബ് ബയേര് ലെവര്ക്യൂസന് കീഴടക്കിയത്. ഗോള്രഹിതമായ ആദ്യപകുതിക്കുശേഷം കളിയുടെ 57-ാം മിനിറ്റില് ഹകന് കല്ഹാനോഗ്ലുവാണ് ലെവര്ക്യൂസന്റെ വിജയഗോള് നേടിയത്. എട്ട് തവണ ചാമ്പ്യന്സ് ലീഗിന്റെ നോക്കൗട്ട് റൗണ്ടില് കളിച്ച ലെവര്ക്യൂസന്റെ ആദ്യ വിജയമാണ് ഇത്. അതേസമയം ചാമ്പ്യന്സ് ലീഗില് കഴിഞ്ഞ ആറ് മത്സരങ്ങളില് ആദ്യമായാണ് അത്ലറ്റികോ വല കുലുങ്ങുന്നത്.
