അപരാജിത ഇന്ത്യ

മെല്‍ബണ്‍: ലോകകപ്പിലെ രണ്ടാം ക്വാര്‍ട്ടര്‍ ഫൈനലില്‍ ബംഗ്ലാദേശിനെ 109 റണ്‍സിന് തകര്‍ത്തെറിഞ്ഞ് അപരാജിതരായി ഇന്ത്യ സെമിയില്‍.

ദുര്‍ബലരായ യുഎഇയോട് നേടിയ അര്‍ദ്ധസെഞ്ച്വറി ഒഴിച്ച് തീര്‍ത്തും നിറംകെട്ട് പോയ രോഹിത്ത് ശര്‍മ്മയുടെ തിരിച്ചുവരവാണ് ഇന്ത്യയുടെ സെമി പ്രവേശനത്തിന്‌ മുതല്‍ കൂട്ടായത്. രോഹിത്ത് 126 പന്തില്‍ നിന്ന് 137 രണ്‍സുമായി കളനിറഞ്ഞു വാണപ്പോള്‍ ബംഗ്ലാ കടുവകള്‍ തീര്‍ത്തും നിഷ്പ്രഭരായി മാറി. രോഹിത്ത് തന്നെയാണ് കളിയിലെ കേമന്‍

സ്‌കോര്‍- ഇന്ത്യ: 302/6 (50 ഓവര്‍); ബംഗ്ലാദേശ്: 193 (45.0 ഓവര്‍)

ടോസ് നേടി ബാറ്റിംഗ് തെരിഞ്ഞെടുത്ത ഇന്ത്യ മെല്ലെ പോക്കിന് ശേഷമാണ് താളം കണ്ടെത്തിയത്. ഇന്ത്യന്‍ സ്‌കോര്‍ 75ല്‍ നില്‍ക്കുമ്പോള്‍ ശിഖര്‍ ധവാനാണ്(30) വിക്കറ്റിന് മുന്നില്‍ ആദ്യം കുടുങ്ങിയത്. ഷക്കീബ് ഹസനായിരുന്നു വിക്കറ്റ്. തുടര്‍ന്ന് എത്തിയ കോഹ്‌ലി(3) വന്നതും പോയതും പെട്ടെന്നായിരുന്നു. രഹാനെ 19 റണ്‍സെടുത്ത് കൂടാരം കയറുമ്പോള്‍ ഇന്ത്യന്‍ സ്‌കോര്‍ 115 ആയിരുന്നു. പിന്നീടെത്തിയ റെയ്‌നയുമായി ചേര്‍ന്ന് രോഹിത്ത് സ്‌കോര്‍ 237ല്‍ എത്തിച്ചു. 65 രണ്‍സെടുത്ത റെയ്‌ന വീണതോടെ ഈ കൂട്ടുകെട്ട് പിരിഞ്ഞു. മൊര്‍ത്താസയ്‌ക്കായിരുന്നു റെയ്‌നയുടെ വിക്കറ്റ്. അതിനിടെ 42 ഓവറില്‍ രോഹിത്ത് തന്റെ കന്നി ലോകകപ്പ് സെഞ്ച്വറി കുറിച്ചു. അഞ്ചാം വിക്കറ്റായി രോഹിത്ത് ഡ്രസിംഗ് റൂമിലെത്തുമ്പോള്‍ ഇന്ത്യ ഭേദപ്പെട്ട നിലയിലെത്തിയിരുന്നു. തസ്‌ക്കീന്‍ അഹമ്മദിനായിരുന്നു രോഹിത്തിന്റെ വിക്കറ്റ്. ബംഗ്ലാദേശിന് വേണ്ടി തസ്‌ക്കിന്‍ മൂന്ന് വിക്കറ്റ് നേടി.

303 എന്ന വിജയ ലക്ഷ്യവുമായി മറുപടി ബാറ്റിംഗിനിറങ്ങിയ ബംഗ്ലാദേശിന്റെ തുടക്കം മോശമായിരുന്നു. ടീം സ്‌കോര്‍ 33ല്‍ നില്‍ക്കുമ്പോള്‍ ബംഗ്ലാദേശിന് അവരുടെ ഓപ്പണിംഗ് ബാറ്റ്‌സ്മാനായ തമീം ഇഖ്ബാലിനെ(25) നഷ്ടപ്പെട്ടു. അതേ സ്‌കോറില്‍ തന്നെ ഇമ്‌റുള്‍ കെയ്‌സും റണൗട്ടായി പവലിയനിലെത്തിയപ്പോള്‍ ബംഗ്ലാദേശ് അപകടം മണത്തു. പിന്നീടെത്തിയത് മിന്നുന്ന ഫോമിലായിരുന്ന മഹമ്മുദുള്ളയായിരുന്നു. 21 റണ്‍സെടുത്ത മഹമ്മദുള്ള അത്രയധികം ശോഭിക്കാതെ പവലിയനില്‍ തിരിച്ചെത്തി. പിന്നീട് സൗമ്യ സര്‍ക്കാരും 29 റണ്‍സെടുത്ത് മടങ്ങിയതോടെ ബംഗ്ലാദേശ് 4ന് 90 എന്ന നിലയില്‍ പരുങ്ങി. ഷക്കീബ് ഹസന്റെ സംഭാവന 10 റണ്‍സായിരുന്നു. തുടര്‍ന്നെത്തിയ മുഷ്ഫീക്കര്‍ റഹീം (27), സബീര്‍ റഹ്മാന്‍ (30), നാസിര്‍ ഹൊസൈന്‍ (35) എന്നിവര്‍ മികച്ച പ്രകടനം കാഴ്‌ച്ച വച്ചെങ്കിലും അവയൊന്നും ഇന്ത്യ മുന്നോട്ട് വച്ച വിജയ ലക്ഷ്യം മറികടക്കാന്‍ പ്രാപ്തിയുള്ളതായിരുന്നില്ല. ഇന്ത്യയ്‌ക്ക് വേണ്ടി ഉമേഷ് യാദവ് നാല് വിക്കറ്റ് വീഴ്‌ത്തി.

സ്‌കോര്‍ബോര്‍ഡ്

ഇന്ത്യ ഇന്നിംഗ്‌സ്

രോഹിത് ശര്‍മ്മ ബി തസ്‌കിന്‍ അഹമ്മദ് 137, ശിഖര്‍ ധവാന്‍ സ്റ്റമ്പ്ഡ് മുഷ്ഫിഖര്‍ ബി ഷക്കിബ് 30, വിരാട് കോഹ്‌ലി സി മുഷ്ഫിഖര്‍ ബി റൂബല്‍ ഹൊസൈന്‍ 3, അജിന്‍ക്യ രഹാനെ സി ഷക്കിബ് അല്‍ ഹസ്സന്‍ ബി തസ്‌കിന്‍ അഹമ്മദ് 19, സുരേഷ് റെയ്‌ന സി മുഷ്ഫിഖര്‍ റഹിം ബി മൊര്‍താസ 65, ധോണി സി നാസിര്‍ ഹൊസൈന്‍ ബി തസ്‌കിന്‍ അഹമ്മദ് 6, രവീന്ദ്ര ജഡേജ നോട്ടൗട്ട് 23, ആര്‍. അശ്വിന്‍ നോട്ടൗട്ട് 3, എക്‌സ്ട്രാസ് 16, ആകെ 50 ഓവറില്‍ ആറ് വിക്കറ്റിന് 302.

വിക്കറ്റ് വീഴ്ച: 1-75, 2-79, 3-115, 4-237, 5-173, 6-296.

ബൗളിംഗ്: മഷ്‌റഫെ മൊര്‍താസ 10-0-69-1, തസ്‌കിന്‍ അഹമ്മദ് 10-0-69-3, നാസിര്‍ ഹൊസൈന്‍ 9-0-35-0, മഹ്മദുള്ള 1-0-4-0, റൂബല്‍ ഹൊസൈന്‍ 10-0-56-1, ഷക്കിബ് അല്‍ ഹസ്സന്‍ 10-0-58-1.

ബംഗ്ലാദേശ് ഇന്നിംഗ്‌സ്

തമിം ഇഖ്ബാല്‍ സി ധോണി ബി ഉമേഷ് യാദവ് 25, ഇംറുള്‍ കെയ്‌സ് റണ്ണൗട്ട് (ജഡേജ/ഉമേഷ്) 5, സൗമ്യ സര്‍ക്കാര്‍ സി ധോണി ബി ഷാമി 29, മഹ്മദുള്ള സി ധവാന്‍ ബി ഷാമി 21, ഷക്കിബ് അല്‍ ഹസ്സന്‍ സി ഷാമി ബി ജഡേജ 10, മുഷ്ഫിഖര്‍ റഹിം സി ധോണി ബി ഉമേഷ് 27, സാബിര്‍ റഹ്മാന്‍ സി ഷാമി ബി യാദവ് 30, നസിര്‍ ഹൊസൈന്‍ സി അശ്വിന്‍ ബി ജഡേജ 35, മൊര്‍താസ സി ധോണി ബി മോഹിത് ശര്‍മ്മ 1, റൂബല്‍ ഹൊസൈന്‍ സി അശ്വിന്‍ ബി ഉമേഷ് 0, തസ്‌കിന്‍ അഹമ്മദ് നോട്ടൗട്ട് 0, എക്‌സ്ട്രാസ് 10, ആകെ 45 ഓവറില്‍ 193ന് ഓള്‍ ഔട്ട്.

വിക്കറ്റ് വീഴ്ച: 1-33, 2-33, 3-73, 4-90, 5-104, 6-139, 7-189, 8-192, 9-193, 10-193.

ബൗളിംഗ്: ഉമേഷ് യാദവ് 9-1-31-4, മുഹമ്മദ് ഷാമി 8-1-37-2, മോഹിത് ശര്‍മ്മ 7-0-36-1, അശ്വിന്‍ 10-1-30-0, സുരേഷ് റെയ്‌ന 3-1-15-0, ജഡേജ 8-0-42-2.