വടക്കാഞ്ചേരി: ”നിന്നെ അവര് എന്തുചെയ്തു ഞാന് കൂടി ഒന്നറിയട്ടെ” പീഡനത്തിനിരയായ പന്ത്രണ്ടുകാരിയോട് എരുമപ്പെട്ടി എഎസ്ഐ ടി.ഡി.ജോസിന്റെ ചോദ്യം. കുട്ടിയുടെ അമ്മയേയും ഇയാള് അസഭ്യവര്ഷംകൊണ്ട് മൂടി.
സംഭവത്തെത്തുടര്ന്ന് സസ്പെന്ഷനിലായ എഎസ്ഐയെ രക്ഷിക്കാന് ഒരുവിഭാഗം ഊര്ജ്ജിത ശ്രമം തുടങ്ങി. നെല്ലുവായില് പീഡനത്തിനിരയായ ബാലികയെ അവഹേളിച്ചതിന് സസ്പെന്ഷനിലായ എഎസ്ഐ ടി.ഡി.ജോസിനെതിരെ മുമ്പും നിരവധി പരാതികള് ഉയര്ന്നിട്ടുണ്ട്.
സ്റ്റേഷനില് പരാതിയുമായെത്തുന്നവരെ ഭീഷണിപ്പെടുത്തി പണം വാങ്ങുന്നതുള്പ്പെടെയുള്ള കാര്യങ്ങള് പതിവാണെന്ന് നാട്ടുകാര് ആരോപിക്കുന്നു. പലവട്ടം ഇയാള്ക്കെതിരെ പരാതി പറഞ്ഞിട്ടും നടപടി ഉണ്ടായിട്ടില്ല.
കഴിഞ്ഞദിവസം പീഡനത്തിനിരയായ കുട്ടിയും അമ്മയും കുട്ടിയുടെ അച്ഛന്റെ വീട്ടില് വസ്ത്രങ്ങളെടുക്കാന് വന്നപ്പോഴാണ് സസ്പെന്ഷന് ഇടയാക്കിയ സംഭവമുണ്ടായത്.
കുട്ടിയെ പീഡിപ്പിച്ചതിന് അറസ്റ്റിലായ പ്രതികളുടെ ബന്ധുക്കള് കുട്ടിയെയും അമ്മയെയും തടഞ്ഞുവെച്ച് അസഭ്യം പറയുകയും കയ്യേറ്റം ചെയ്യുകയും ചെയ്തു. വിവരമറിഞ്ഞെത്തിയ എഎസ്ഐ ജോസും ഇവരെ രക്ഷിക്കുന്നതിനു പകരം പ്രതികളോടൊപ്പം ചേരുകയായിരുന്നു.
കേസ് ഒതുക്കി തീര്ക്കാനുള്ള ശ്രമമാണ് പോലീസ് നടത്തുന്നതെന്ന ആരോപണം ശക്തമാണ്. പ്രതികളില് നിന്ന് പണം വാങ്ങി കുട്ടിയെയും ഭീഷണിപ്പെടുത്തി കേസ് അവസാനിപ്പിക്കാനുള്ള ശ്രമമാണ് ജോസ് നടത്തിയത്.
സ്പെഷല് ബ്രാഞ്ച് റിപ്പോര്ട്ടിനെ തുടര്ന്നാണ് ജോസിനെ റൂറല് എസ്പി സസ്പെന്റ് ചെയ്തത്. അയല്വാസിയായ മധ്യവയസ്കനും മകനും ചേര്ന്നാണ് പന്ത്രണ്ടു വയസ്സുള്ള പെണ്കുട്ടിയെ പീഡിപ്പിച്ചത്. സംഭവത്തില് ഇവരുടെ ബന്ധുക്കളായ മുപ്പതുപേര്ക്കെതിരെ പോലീസ് കേസെടുത്തു. എഎസ്ഐ ജോസിനെതിരെ കുട്ടിയുടെ അമ്മ പരാതി നല്കിയിട്ടുണ്ട്.
