ചങ്ങനാശേരി: വൃദ്ധയെ മാരകായുധങ്ങള് കാട്ടി ഭീഷണിപ്പെടുത്തിയ ശേഷം അതിക്രമിച്ച് കയറി വഴിവെട്ടിയെന്ന പരാതിയില് 15 പേര്ക്കെതിരെ കേസെടുത്തു. മാടപ്പള്ളി പുളിയാംകുന്ന് കാവുങ്കല് ഏലിയാമ്മ ആന്റണിയാണ് ഇത് സംബന്ധിച്ച് പരാതി നല്കിയത്. ഭര്ത്താവ് മരിച്ചതിനെതുടര്ന്ന് വീട്ടില് ഏലിയാമ്മ തനിച്ചാണ് താമസിച്ചിരുന്നത്.
ശനിയാഴ്ച രാത്രിയായിരുന്നു സംഭവം. സമീപവാസികളായ ഒരുസംഘം ആളുകള് വീട്ടിലേക്ക് കത്തിയും വടിവാള് ഉള്പ്പെടെയുള്ള മാരകായുധങ്ങളുമായി വന്ന് തങ്ങള്ക്ക് വഴി വേണം എന്ന് പറഞ്ഞ് ഏലിയാമ്മയെ ഭീഷണിപ്പെടുത്തി. തുടര്ന്ന് മരം മുറിക്കുന്ന യന്ത്രം ഉപയോഗിച്ച് പുരയിടത്തില് നിന്നിരുന്ന റബറും തെങ്ങും ഉള്പ്പെടെയുള്ള മരങ്ങള് ചുവടെ മുറിച്ച് മാറ്റി വഴി വെട്ടി. പോലീസ് സ്ഥലത്തെത്തിയെങ്കിലും ഇവര് രക്ഷപെട്ടു.
